Eldar Qasımovla Nigar Camal

Azərbaycanı "Eurovision-2011"də təmsil edəcəklər

Fevralın 11-də Azərbaycan Dövlət Akademik Milli Dram Teatrının binasında "Eurovision-2011" mahnı müsabiqəsində Azərbaycan təmsilçisini müəyyənləşdirmək üçün milli final konserti keçirilib. Eldar Qasımov-Nigar Camal dueti müsabiqənin qalibi elan edilib.

Final konsertində münsiflər heyətinin tərkibinə "İTV"nin baş direktoru İsmayıl Ömərov, sənətşünas Lalə Kazımova, bəstəkar Rauf Babayev, Mədəniyyət və Turizm Nazirliyinin nümayəndəsi Mənzər Nurəliyeva, bəstəkar Faiq Sücəddinov, "Eurovision-2011" Azərbaycan üzrə musiqi koordinatoru Zəhra Bədəlbəyli və xalq artisti Zülfiyyə Xanbabayeva daxil olublar.

Final konsertində açılışı "Nero" rəqs qrupu edib. Konsertin aparıcısı Leyla Əliyeva konsert izləyicilərini 4 müxtəlif dildə salamlayıb. Ötən il Azərbaycanı "Eurovision-2010" Mahnı müsabiqəsində təmsil edən ifaçı Səfurə Əlizadə ilk olaraq səhnəyə çıxıb, "Drip-drop" mahnısını ifa edib.

Daha sonra təmsilçilik uğrunda mübarizə aparacaq beş ifaçının ifaları başlayıb.

İştirakçılar arasında səhnəyə birinci Nigar Camal çıxıb. Daha sonra Aynişan Quliyeva, İlqarə İbrahimova, Eldar Qasımov, İlhamə Qasımova ardıcıl olaraq səhnə alıblar.

Finalçılardan sonra Gürcüstanın "Eurovision-2010"dakı təmsilçisi Sofo Nicaradze mahnısını oxuyub, tamaşaçıları salamlayıb: "Mənim üçün hansı iştirakçının seçıiləcəyi önəmli deyil, mən Azərbaycana səs verəcəm, çünki sevimli ölkəmdir!"

Gürcü ifaçı sonra "Eurovision-2010"da səsləndirdiyi "Shine" adlı mahnını Bakı səhnəsində ifa edib.

Gənc müğənnilər şou günü səhnədə xüsusi geyimlərdə olublar. Eldar Qasımovu səhnədə rəqqaslar və bək-vokalçılar Kazım və Miya müşayiət edib. Tamaşaçılar E.Qasımovun ifasında üç xarici, bir Azərbaycan mahnısını dinləmək imkanı qazanıb.

İlqarə İbrahimovanın bu gün üçün eksklüziv geyimlərini Arzu Məlikzadə hazırlayıb. Aynişan Quliyevanın səhnə geyimini isə əməkdar incəsənət xadimi, modelyer Fəxriyyə Xələfova hazırlayıb

Nigar Camalı final konsertində stilist Anar Ağakişiyev geyindirib. Finalçını səhnədə rəqsləri ilə "Nero" rəqs qrupu müşayiət edib.

Final gecəsinin irəliləyən dəqiqələrində İsveçrənin "Eurovision" təmsilçisi Anna Rossinelli səhnədə öz ifası ilə tamaşaçı qarşısına çıxıb ("Lent.az").

Ümumilikdə ifaçilarin hər biri 4 mahnıdan ibarət xüsusi repertuarla çıxış ediblər. San Marinonun "Eurovision-2011"dəki təmsilçisi də gecənin qonaqları sırasında olub.

Milli Final konserti İctimai Televiziya ilə yanaşı, Eurovision TV, TRT və Gürcüstanın İctimai Televiziyası ilə canlı yayımlanıb.

Konsert üç saat davam edib və sonda münsiflər heyətinin üzvləri qapalı görüş keçiriblər. 15 dəqiqəlik müzakirələrdən sonra İTV-nin baş direktoru İsmayıl Ömərov bildirib ki, münsiflər müsabiqəyə Eldar Qasımovla Nigar Camalın göndərilməsini qərara alıblar. Onlar müsabiqədə duet ifa edəcəklər.

"Hərənin özünün həqiqəti var və inandığı kimsə var. Böyük auditoriyanın istəyi ilə olan bir seçimdir. Eurovision formatı başqa formatlardan köklü surətdə fərqlənir. Təmsilçidə hər şey kompleks şəklində olmalıdır. Bu doğru seçimdir və bu iki gəncin simasında bunu gördük. Əminəm ki, Eldar və Nigar Azərbaycanı layiqincə təmsil edəcək. Bu iki təmsilçinin vizual görünüşü də, səsləri də bir-birinə uyğundur",-deyə milli münsiflərin rəhbəri İsmayıl Ömərov deyib. Onun sözlərinə görə, bu il münsiflər heyəti arasında mübahisə olmayıb: "Qaliblər sadəcə, ona görə gec açıqlandı ki, biz duet ortaqlarını seçirdik. Vaxtımız da buna getdi, elə münsiflərin rəyi üst-üstə düşdü. Burada özünə qapanmadan çox milliliyimizi göstərməkdir. Mahnının kim tərəfindən yazılması önəmli deyil, əsas odur layiqli olsun. Biz bacardığımızı edəcəyik ki, Azərbaycan layiqli təmsil olunsun"(APA) .

İ.Ömərov qeyd edib ki, seçimlər dövründə artıq söz-söhbət olmasın deyə finalçıların heç biri ilə əvvəlcədən görüşməyiblər: "Bu müddət ərzində bir dəfə də olsun zəng olmayıb. Nə finalçıların valideynlərini görmüşük, nə də bir zəng olub. Bu tamamilə şəffaf seçimdir və buna heç bir şübhəniz olmasın".

İ.Ömərov bildirib ki, bu duetə uyğun bir mahnı seçiləcək və mahnı müsabiqəsinə təqdim olunan çoxsaylı musiqilərdən biri seçiləcək: "Azərbaycan 2009-cu ildə Aysel və Araşın dueti ilə üçüncülük qazanıb. Duet Azərbaycana uğur gətirəcək. Qəpiyimizi saya-saya çox sərfəli xərcləyəcəyik. Biz o qədər də dövlətli bir təşkilat deyilik. Biz hər dəfə Avropaya birincilik üçün gedirik, bu dəfə də birincilik üçün gedəcəyik".

Mətbuat konfransında çıxış edən Eldar Qasımov bildirib ki, onlar "Eurovision-2012"-ni Azərbaycana gətirməyə qadirdirlər və bunun üçün yüksək səviyyədə çalışacaqlar: "Azərbaycanı bu müsabiqədə layiqli təmsil etməyə qadirik. Bu gücü özümüzdə hiss edirdik. Bu yarışmada qalib olmaq üçün öz üzərimizdə dayanmadan çalışacağıq".

Nigar Camal da bu müsabiqədə Azərbaycanı layiqincə təmsil edəcəyinə söz verib: "Biz çox xoşbəxtik. Sadəcə bizə inanın və hər şey yaxşı olacaq".

Azərbaycanı Düsseldorf səhnəsində keçiriləcək 56-cı "Eurovision" müsabiqəsində təmsil edəcək Eldar Qasımov və Nigar Camal müsabiqənin mayın 10-da keçiriləcək I yarımfinalında finala çıxmaq uğrunda mübarizə aparacaq. "Eurovision-2011"də 43 ölkənin iştirakı təsdiqlənib.

Ekspress.- 2011.- 12-14 fevral.- S.18.