Cəmil Quliyev: "Bu təyinat mənim üçün də gözlənilməz oldu"

 

"Məqsədəuyğun olsa, Filmfondda da işimi davam etdirməyə hazıram"

 

Cəmil Quliyev dünən "Mədəniyyət" kanalının baş direktoru kimi işə başlayıb. Müxbirimizlə söhbətində o bu təyinatın özü üçün də gözlənilməz olduğunu bildirib: "Sözün düzü, bu təyinat mənim üçün də gözlənilməz oldu. Bu gün işə başlamışam. Telekanalın açılışına bir neçə saat qaldığı üçün bütün kollektiv kimi mən də həyəcanlıyam. Bəri başdan heç nə deyə bilmərəm. Amma çalışacağıq ki, "Mədəniyyət" kanalının verilişləri rəngarəng, zəngin olsun. Milli mədəniyyətimizin təbliğində, inkişafında mühüm rol oynasın. Bu gün Azərbaycanda "Mədəniyyət" kanalının yaranması prezidentimizin, dövlətimizin mədəniyyətə göstərdiyi böyük qayğını sübut edir. Vaxtilə ulu öndər Heydər Əliyev demişdi: "Hər bir xalqın mədəniyyəti həmişə onu yüksəldir, bütün dünyada tanıdır, mənəviyyatını zənginləşdirir".

Mən də mənə tapşırılan bu vəzifədə çalışaraq mədəniyyətimizin təbliğində öz zəhmətimi, əməyimi əsirgəməyəcəyəm. "Mədəniyyət" kanalının kollektivini çox ciddi və məsuliyyətli bir iş gözləyir. Bizə göstərilən etimadı doğrultmaq üçün əlimizdən gələni edəcəyik. Çalışacağıq ki, kanalın verilişləri milli mədəniyyətimizin təbliğində, inkişafında mühüm rol oynasın".

Kanalın proqramının artıq tərtib olunduğunu deyən Cəmil Quliyev kadr və digər məsələlər barədə danışmağın hələ tez olduğunu söyləyib.

Dövlət Film Fondunun direktoru vəzifəsində də qalıb-qalmayacağı məsələsinə gəlincə, Cəmil Quliyev bunu zamanın göstərəcəyini vurğulayıb: "Mən hazırda Filmfondun direktoruyam. Amma bu vəzifədən gedib-getməyəcəyimi zaman göstərəcək. Məqsədəuyğun olsa, bu işi davam etdirməyə hazıram. Bu vəzifənin də icrası mənə tapşırılsa, canla-başla yerinə yetirərəm. Çünki Filmfond mənim üçün doğma və əziz təşkilatdır".

Azərbaycan Televiziya və Radio Verilişləri Qapalı Səhmdar Cəmiyyətinin (AzTV) mətbuat xidmətinin rəhbəri Xatirə Qasım isə APA-ya bildirib ki, dünən saat 20.30-da Beynəlxalq Muğam Mərkəzində təntənəli açılışı keçirilən "Mədəniyyət" kanalı bu gündən saat 12.00-dan 2.00-a qədər fəaliyyət göstərəcək.

Qeyd edək ki, Milli Televiziya və Radio Şurasının (MTRŞ) qərarı ilə Azərbaycanda ixtisaslaşdırılmış televiziya kanalının ("Mədəniyyət" televiziya kanalının) açılması üçün Bakı və Abşeron ərazisində televiziya üzrə 44-cü tezlik resursuna müsabiqə ötən il avqustun 4-dən sentyabrın 4-dək elan edilib. Lakin müsabiqədə iddiaçıların sayı 3-dən az olduğuna görə Şuranın qərarına əsasən müsabiqə baş tutmamış hesab edilib. MTRŞ-nın sentyabrın 6-da verdiyi qərara əsasən, "Televiziya və radio yayımı haqqında" qanunun 15-ci maddəsinin tələblərinə uyğun olaraq "Mədəniyyət" televiziya kanalının açılması üçün sentyabrın 7-dən oktyabrın 7-dək müsabiqə elan edilib. Müsabiqədə yalnız bir iddiaçı - Azərbaycan Televiziya və Radio Verilişləri Qapalı Səhmdar Cəmiyyəti iştirak edib. Şura "Televiziya və radio yayımı haqqında" qanunun 15.5-ci və "Teleradio yayımı sahəsində xüsusi razılıq (lisenziya) üçün keçirilən müsabiqənin Qaydaları"nın 2.1.10-cu bəndinin tələblərini rəhbər tutaraq AzTV-ni müsabiqənin qalibi elan edib.

  

 

AYXAN

 

Ekspress.-2011.- 15 fevral.- S. 23.