"Gənc Tamaşaçılar" "Fəcr ongünlüyü"ndə

Kollektiv uğurlu ifaya görə diplomlarla təltif olunub

Azərbaycan Dövlət Gənc Tamaşaçılar teatrının bir qrup aktyoru İran İslam Respublikasında hər il ənənəvi olaraq keçirilən 32-ci Beynəlxalq "Fəcr ongünlüyü" Teatr Festivalında iştirak edib.

Teatrın mətbuat xidmətindən verilən məlumata görə, dünyanın müxtəlif ölkələrinin aparıcı teatr kollektivlərinin iştirak etdiyi festival İran İslam İnqilabının 32-ci ildönümünə həsr olunub. "Dramatik İncəsənət Mərkəzi"nin dəvəti ilə İrana yola düşən kollektiv fevral ayının 5-də İranın Gülüstan Vilayətinin Kurqan, fevralın 6-da isə Qumbat Qavuz şəhərlərində dahi ingilis yazarı V.Şekspirin "Otello" tamaşası ilə çıxış edib. Tamaşanın quruluşu, səhnə və musiqi tərtibatı mərhum rejissor İrina Perlovaya məxsusdur.

Teatrın baş rejissoru, xalq artisti Cənnət Səlimovanın rəhbərlik etdiyi kollektivə əməkdar artistlər Leyli Vəliyeva, Gülər Nəbiyeva, Şövqi Hüseynov, İlqar Cahangirov, Nofəl Vəliyev, Seyidşah Məmmədov, aktyorlar Şəbnəm Hüseynova, İradə Rəşidova, Günel Məmmədova, Vüqar Məmmədəliyev, Rəşad Səfərov, Rövşən Abbasov, Aydın Dəmirov daxildir. Aktyorlar uğurlu ifalarına görə diplomlarla təltif olunublar.

AYXAN

Ekspress.- 2011.- 15 fevral.- S.14.