"The News İnternational": "Ermənistanın paytaxtı - tarixi Azərbaycan şəhəri"

Pakistan mətbuatında Azərbaycan həqiqətləri

Pakistanın nüfuzlu ingilisdilli "The News İnternational" və "Daily Times" qəzetlərinin 16 fevral tarixli sayında ermənilərin tarixi Azərbaycan torpaqlarında yerləşdirilməsi və burada yaşayan azərbaycanlıların deportasiyası barədə məqalələr dərc edilib. Xəbər APA-ya Azərbaycanın Pakistandakı səfirliyindən daxil olub.

Məlumata görə, "The News İnternational"da çap edilmiş "Ermənistanın paytaxtı - tarixi Azərbaycan şəhəri" sərlövhəli məqalədə Yerevan şəhərinin tarixən Ermənistana məxsus olması barədə iddiaların həqiqəti əks etdirmədiyi, heç bir tarixi fakta əsaslanmadığı, qədim Urartu dövlətinin indiki Ermənistanla əlaqəli olmasına dair erməni iddialarının da boş və mənasız olduğu qeyd edilərək əsl adı İrəvan olan şəhərin Azərbaycan hökmdarı I Şah İsmayılın əmri ilə sərkərdə Rəvanqulu xan tərəfindən 1515-ci ildə tikildiyi vurğulanıb. Yazıda XIX əsrin əvvəllərində Çar Rusiyasının işğal etdiyi Azərbaycan torpaqlarında özünə dayaq məntəqəsi yaratmaq məqsədilə İran və Türkiyədə yaşayan erməniləri İrəvan, Naxçıvan və Qarabağ xanlıqlarının ərazilərinə köçürdüyü, daha sonra isə bu ərazilərdə ermənilərin say tərkibini artırmaq üçün xüsusi tədbirlər həyata keçirdiyi oxucuların diqqətinə çatdırılıb.

Sovet imperiyası dövründə də azərbaycanlıların qədim Azərbaycan torpaqlarından qovulması prosesinin davam etməsi, imperiyanın süqutundan sonra isə indiki Ermənistan ərazisində yaşayan azərbaycanlıların kütləvi şəkildə deportasiya edilməsi və nəhayət, Ermənistanın şovinist "azərbaycanlılarsız Ermənistan" planının tamamlanması ətraflı təhlil olunub.

"Daily Times" qəzetinin tanınmış yazarı, qəzetin İslamabad ofisinin rəhbəri Səid Minhas isə öz sütununda qələmə aldığı "Qafqazda nifrət toxumları" sərlövhəli yazıda Çar Rusiyasının Qafqazda apardığı imperialist siyasətin tərkib hissəsi olaraq ermənilərin İran, Türkiyə və dünyanın digər ölkələrindən qədim Azərbaycan torpaqlarına köçürülməsinin və beləliklə, müsəlman azərbaycanlıların xristian ermənilər vasitəsilə öz dədə-baba torpaqlarından qovulmasının mərhələli şəkildə həyata keçirildiyini qeyd edib.

Müəllif çarizmin "parçala, hökm sür" siyasətinin Azərbaycan torpaqlarında tətbiq edilməsi nəticəsində Qafqazda heç vaxt olmamış xəyali "böyük Ermənistan" ideyasının ortaya atıldığını, halbuki hazırkı ermənilərin əksəriyyətinin başqa ölkələrdən regiona köçürüldüyünü yazıb. S.Minhas ermənilərin bu uydurma ideyalarına haqq qazandırmaq üçün indiki Yerevan şəhərinin mənşəyini Nuh peyğəmbərə bağlamaqla özlərini dünyanın ən qədim xalqı kimi qələmə verməkdən çəkinmədiyini, lakin bu əfsanələrin uğursuz olduğunu, 1950-ci ildən sonra isə ermənilərin qədim Urartu dövlətinin ermənilər tərəfindən qurulduğunu iddia etdiyini, bütün bu təşəbbüslərin saxta üsullarla tarix yaratmaq cəhdindən başqa bir şey olmadığını, tarixçilərin Urartu dövləti ilə indiki Ermənistan arasında əlaqə görmədiklərini xüsusi vurğulayıb.

Tanınmış yazar Türkmənçay müqaviləsindən sonra ermənilərin kütləvi şəkildə İrəvan və Qarabağ xanlıqlarının ərazisinə köçürülməsinə dair çarizmin planlarını səfir A.Qriboyedovun 1828-ci ildə yazdığı rəsmi məktubdan sitat gətirməklə göstərib: "Ermənilərin rus qoşunları tərəfindən işğal edilmiş Təbriz, Xoy, Salmas və Marağadan Naxçıvan, İrəvan və Qarabağa köçürülməsi vacibdir".

S.Minhas yazıçı N.Şavrovun 1911-ci il tarixli "İndi Qafqazda yaşayan 1,3 milyon erməninin 1 milyonu yerli əhali deyil" qeydlərinə də yer verib. O, ermənilərin Azərbaycan türklərini öz dədə-baba torpaqlarından qovmaq planlarını Sovet İmperiyası dövründə də həyata keçirdiklərini, 1948-53-cü illərdə sovet rəhbərliyinin dəstəyi ilə azərbaycanlıların Ermənistandan kütləvi deportasiyasına nail olduqlarını, bu prosesin mərhələ-mərhələ aparıldığını, SSRİ-nin dağılması ərəfəsində isə azərbaycanlıların Ermənistan ərazisindən tamamilə qovulduğunu oxucuların nəzərinə çatdırıb.

Ekspress.- 2011.-17 fevral.-S. 4.