Döyüşçü rəssamın "ümid" sərgisi

Sumqayıtda istedadlı rəssam, Qarabağ müharibəsi iştirakçısı İntiqam Ağayevin sərgisi açılıb

Sumqayıtda istedadlı rəssam, Qarabağ müharibəsinin iştirakçısı İntiqam Ağayevin əsərlərinin sərgisi keçirilir. Keçmiş döyüşçü vaxtilə onun çağırış siqnalı olmuş "Asiman" sözünü yaradıcılıq təxəllüsü kimi seçib. Xocalı faciəsinin növbəti ildönümünə həsr edilmiş vernisaj Sumqayıt Dövlət Rəsm Qalereyasında nümayiş etdirilir. Sərgi bu ayın sonuna qədər davam edəcək.

Qanlı cəbhə yollarından keçmiş, neçə-neçə itkilərin şahidi olmuş rəssam müharibənin dağıdıcı energetikasını ədalətin, həyatın qələbəsi və təntənəsi kontekstində təsvir edir. Sərgilənən əsərlər arasında "Ümid var" adlı rəsm tamaşaçıların xüsusi marağına səbəb olub. Bu əsərdə qarlı təpə üstündə əyləşmiş, əlində avtomat gözlərini uzağa zilləmiş Azərbaycan döyüşçüsü təsvir edilib. Onun yanında torpağın hələ donu açılmamış qatından baş qaldıran yaşıl fidan təsvir edilir. Bu əsər işıqlı gələcəyə, haqqın-ədalətin təntənəsinə inam rəmzidir.

Sərginin açılış mərasimində şəhər Mədəniyyət və Turizm idarəsinin rəhbərləri, yaradıcı ictimaiyyətin nümayəndələri və rəssamın cəbhə dostları iştirak ediblər.

AYXAN

Ekspress.- 2011.-19-21 fevral.- S.31.