"Yeddi gözəl" Moskva səhnəsində

Bakıda isə I Ümumdünya Mədəniyyətlərarası Dialoq Forumu keçiriləcək

Dünən Moskvada Rusiya Akademik Böyük Teatrının əsas səhnəsində Azərbaycan Dövlət Akademik Opera və Balet Teatrının balet truppası artistlərinin ifasında dahi bəstəkarımız Qara Qarayevin "Yeddi gözəl" baleti nümayiş etdirilib. Nümayişdən əvvəl mədəniyyət və turizm naziri Əbülfəs Qarayevin iştirakı ilə mətbuat konfransı keçirilib. Tədbirdə çıxış edən nazir bildirib ki, Qara Qarayevin "Yeddi gözəl" baletinin Böyük Teatrda nümayiş olunması Azərbaycan mədəniyyəti üçün mühüm hadisədir.

Ə.Qarayev bu təşəbbüsə görə, Rusiya Federasiyası Mədəniyyət Nazirliyinə və Moskva Böyük Teatrının rəhbərliyinə təşəkkürünü bildirib: "İndi biz ayrı-ayrı ölkələrik. Balet tamaşalarının nümayiş olunması o qədər də asan məsələ deyil".

Nazir baletin quruluşçu baletmeysterinin Vasili Medvedyev, musiqi rəhbəri və dirijorunun İstanbul Opera və Balet Teatrında çalışan Elşad Bağırov, quruluşçu rəssamının Dmitri Çerbaci, geyim üzrə rəssamının Tahir Tahirov olduğunu bildirib: "Tamaşada Bəhram şah rolunu Mixail Lobuxin oynayacaq. Gözəllər gözəli rolunda isə Azərbaycanın əməkdar artisti Kamilla Hüseynova çıxış edəcək".

Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy çıxışında Qara Qarayevin rus teatrları ilə əməkdaşlığından danışıb. O, dahi bəstəkarın rus teatrlarında bir neçə əsərinin səhnələşdirildiyini söyləyib.

Azərbaycanın Rusiyadakı səfiri Polad Bülbüloğlu isə çıxışında müəllimi olan Qara Qarayevin əsərinin Moskva Böyük Teatrında səhnəyə qoyulmasından çox şad olduğunu bildirib: "Bu çox böyük bir işdir. 130 teatr əməkdaşının buraya gətirilməsi böyük zəhmət tələb edir. Bu zəhmət bu gün öz nəticəsini verir. Artıq tamaşaya bilet yoxdur. Bütün biletlər satılıb".

P.Bülbüloğlu Rusiyada fəaliyyət göstərən 20 xarici ölkə səfirinin tamaşanı izləməyə gələcəyini söyləyib.

Yeri gəlmişkən, bu il Mədəniyyət və Turizm Nazirliyi Azərbaycan rəssamı Tahir Salahovun Rusiyanın bir çox şəhərlərində sərgilərinin keçirilməsini, Azərbaycan teatrlarının Rusiya şəhərlərinə qastrol səfərlərinin təşkilini planlaşdırır.

Ə.Qarayev Azərbaycanın son zamanlar beynəlxalq simpoziumların məkanına çevrildiyini söyləyib: "Bu il aprelin 7-9-da Bakıda I Ümumdünya Mədəniyyətlərarası Dialoq Forumu keçiriləcək. Bu forum Avropa Şurası, UNESCO, İSESCO və bir sıra beynəlxalq təşkilatların dəstəyi ilə keçiriləcək.

Azərbaycanla Rusiya mədəniyyət sahəsində əməkdaşlığını daim davam etdirir. Son 2-3 ildə Rusiya ilə birgə bir sıra mədəniyyət layihələri həyata keçirmişik. Bizim teatr truppalarımız Rusiya teatrlarında bir sıra tamaşalar səhnələşdiriblər. Dahi rus dramaturqu Çexovun əsəri Azərbaycanda tamaşaya qoyulub. Kinematoqrafiya sahəsində də əməkdaşlığımız var".

Mixail Şvıdkoy Azərbaycanın Rusiya üçün mədəniyyət və humanitar sahədə mühüm strateji əməkdaş ölkə olduğunu söyləyib. O, bu ilin payızında Bakıda Rusiya-Azərbaycan Humanitar Forumunun keçiriləcəyini bildirib. Ə.Qarayev Azərbaycanın son zamanlar beynəlxalq simpoziumların məkanına çevrildiyini söyləyib.

Ekspress.- 2011.-22 fevral.-S.23.