II Respublika Muğam Müsabiqəsi açıldı

Fevralın 21-də Kamera və Orqan Musiqisi Zalında Heydər Əliyev Fondu, Mədəniyyət və Turizm, Təhsil nazirlikləri və Milli Konservatoriyanın təşkilatçılığı ilə keçirilən II Respublika Muğam Müsabiqəsinin açılış mərasimi olub. Mərasimdə mədəniyyət və turizm nazirinin müavini Sevda Məmmədəliyeva və təhsil nazirinin müavini Elmar Qasımov çıxış edərək II Beynəlxalq Muğam Festivalı barədə məlumat veriblər.

Qeyd olunub ki, II Respublika muğam müsabiqəsinin üç qalibi Azərbaycanı müvafiq festivalda təmsil edəcək.

Milli Konservatoriyanın rektoru Siyavuş Kərimi bildirib ki, müsabiqəyə qatılan 40 iştirakçıdan 18-i ilkin mərhələyə keçib. Ən güclü iştirakçılar növbəti mərhələdə mübarizə aparacaqlar. Üç qalib ifaçı isə fevralın 24-də müəyyənləşəcək. Həmin gün qaliblər mükafatlandırılacaq və festivalın bağlanış mərasimi olacaq.

Çıxışlardan sonra püşkatma keçirilib. Müvafiq olaraq 18 iştirakçı öz ifasını təqdim edib.

Qeyd edək ki, iştirakçıları peşəkar münsiflər heyəti müəyyənləşdirəcək. Siyavuş Kəriminin rəhbərlik etdiyi münsiflərin sırasında xalq artistləri Əlibaba Məmmədov, Arif Babayev, Ramiz Zöhrabov, Mənsum İbrahimov, Nəzakət Teymurova, Aygün Bayramova və Zabit Nəbizadə var.

Ekspress.- 2011.-22 fevral.- S.23.