Dünya Xocalını anır

Bu gün Xocalı soyqırımından 19 il ötür. Soyqırım qurbanları təkcə Azərbaycanda deyil, dünyanın ayrı-ayrı yerlərində də anılır.

Rusiya paytaxtında Xocalı faciəsinin əsil mahiyyətini, ermənilərin dinc əhaliyə qarşı törətdikləri vəhşilikləri dünya ictimaiyyətinin diqqətinə daha obyektiv və dolğun çatdırmaq məqsədilə rusiyalı ziyalılar Təşəbbüs Qrupu təsis ediblər. Qrupun rəhbəri həmyerlimiz Mir-əşrəf Fətiyevdir.

Təşəbbüs Qrupu bugünlərdə Moskvanın ROSBALT İnformasiya Agentliyinin Mətbuat Mərkəzində "Xocalı genosidi: Qarabağ münaqişəsinin faciələri barədə həqiqətlər" mövzusunda tədbir keçirib. Tədbir mərhum telejurnalist Çingiz Mustafayevin Xocalı genosidi barədə lentə aldığı süjetlərin göstərilməsi ilə başlayıb. Sonra tədbir iştirakçılarına keçmiş DQMV-nin sabiq komendantı olmuş general-mayor Aleksandr Voloxovun video-müraciəti təqdim olunub. Generalın sözlərinə görə, dünya birliyi Xocalı faciəsinə çox biganə yanaşır: "Çingizin lentə aldığı kadrlar mənə 1940-cı illərdə faşistlərin törətdikləri cinayətləri xatırlatdı. İnana bilmirəm ki, 90-cı illərdə belə hadisələr necə baş verə bilər. Bu, ermənilərin müstəqillik uğrunda deyil, torpaq uğrunda apardıqları müharibə idi".

Əslən Taqonroqdan olan şair-publist Aleksandr Fomenkovun çıxışı daha təsirli olub: "Mən o şəhərdə yaşayıram ki, hansı ki, onu azərbaycanlılar, 416-cı diviziya azad edib. Həm də qəribədir ki, burada yaşayanların əksəriyyəti ermənilərdir. Mənim azərbaycanlı döyüşçü dostum var Yaşar Süleymanov, onunla səmimi dostluğumuz var. Azərbaycanlıları yaxşı tanıyıram, mənim tanıdığım azərbaycanlılar terrorçu, qəddar ola bilməzlər".

Mirəşrəf Fətiyevin sözlərinə görə, Xocalıda 19 il əvvəl baş vermiş erməni vəhşilikləri insanlıq əleyhinə yönəlmiş genosid idi: "Bu, ermənilərin törətdikləri ilk faciə deyil, onlar əsrlərdir etdiyimiz yaxşılıqların əvəzinə başımıza Xocalı kimi faciələr gətirirlər. Azərbaycan xalqının səbri artıq tükənib".

Təşəbbüs Qrupunun üzvləri əldə etdikləri faktları bundan sonra da dünya ictimaiyyətinə çatdırılması istiqamətində iş aparacaqlar.

"Xocalıya ədalət" kampaniyası çərçivəsində Böyük Britaniyanın Lordlar Palatasında da Xocalı soyqırımı ilə bağlı konfrans keçirilib. Tədbirin təşkilatçıları Azərbaycanın Böyük Britaniyadakı səfirliyi, "Xocalıya ədalət" kampaniyası və Avropa Azərbaycanlılarının Cəmiyyətidir (TEAS).

Azərbaycanın Türkiyədəki səfirliyi tərəfindən Xocalı soyqırımının 19-cu ildönümü münasibətilə təşkil olunmuş silsilə xatirə tədbirləri çərçivəsində Türkiyənin tanınmış universitetlərindən biri olan Qazi Universitetində fevralın 24-də geniştərkibli anım gecəsi həyata keçirilib. Tədbirdə Xocalı faciəsinin dəhşətindən və türkiyəli jurnalistlərin Xocalı xatirələrindən bəhs edən sənədli film nümayiş etdirilib.

Xanoğlan ƏHMƏDOV

Ekspress.-2011.-26-28 fevral.-S.5.