Qızıl Qran-Pridən 9 qızıl

8-10 iyul günlərində Heydər Əliyev adına İdman və Konsert Kompleksində böyüklər arasında sərbəst, yunan-Roma və qadın güləşi üzrə Qızıl Qran-Pri turniri keçirildi. Yarışda 34 ölkəni təmsil edən 400-dək güləşçi mükafatlar uğrunda mübarizə apardı.

Sərbəst güləşənlərin çıxışı ilə startı verilən turnirə bazar günü "klassiklər"in qurşaq tutması ilə yekun vuruldu. Baş məşqçi Fərid Mansurovun rəhbərlik etdiyi yunan-Roma güləşi üzrə yığmamız çıxışını 2 qızıl, 3 gümüş və 4 bürünc medalla başa vurdu. "Klassiklər"imiz arasında ən yaxşı nəticəni Rövşən Bayramovla (55 kq) dünya və Avropa çempionu adını daşıyan Həsən Əliyev (60 kq) göstərdi.

Qeyd edək ki, finalda öz komanda yoldaşı Taleh Məmmədovu məğlubiyyətə uğradan tanınmış pəhləvanımız Bayramov finala qədər isə ardıcıl olaraq, Zurab Maçaraşvilini (Gürcüstan), Mohsen Hacı Puru (İran) və Orxan Əhmədovu mübarizədən kənarlaşdırmışdı. Maraqlıdı ki, bu çəki dərəcəsində bütün medalları Azərbaycan pəhləvanları qazandı. Belə ki, finalda Rövşənə uduzan Taleh turnirin gümüş, Orxan Əhmədovla Eldəniz Əzizli isə bürünc medala layiq görüldü.

60 kq-da mübarizə aparan Həsən Əliyevə gəlincə, iki ay öncə Avropa çempionatında qalib gələn Həsən Qızıl Qran-Pridə müvafiq ardıcıllıqla Casem Əmirini (İran), Tonimir Sokolu (Xorvatiya), Kamran Məmmədovu və serbiyalı Davor Stefanekanı məğlub edincə çempionluq zirvəsini ələ keçirdi.

Komandanın aktivinə yazılan daha iki gümüş medal finalda ukraynalı Dmitro Pinkova uduzan Elvin Mürsəliyevlə (74 kq) öz iranlı həmvətəni Həbibulla Əhlaniyə uduzan legionerimiz Saman Təhmasibinin (84 kq) payına düşdü. "Klassiklər"in aktivinə yazılan daha iki "bürünc"ün sahibi isə Kamran Məmmədovla Vitali Rəhimov (66 kq) oldu.

Yarışın maraqlı və təəssüfləndirici məqamları isə iki ay öncə Avropa çempionu adını qazanan Rafiq Hüseynovun (74 kq) iştirakı ilə keçirilən görüşlər oldu. Yarımfinalda Rafiq Azərbaycan yığmasında özünün əsas rəqibi olan Elvin Mürsəliyevlə qarşılaşdı. AÇ-2011-in ardından Qızıl Qran-Prini də udub olimpiya təsnifatlı dünya çempionatına gedəcək yığmanın heyətində yer almaq iddiasında olan Rafiq Elvinlə görüşdə uduzmaqla qızıl medala olan ümidini heçə çıxardı. Hələ bu azmış kimi, Avropa çempionumuz ardından üçüncülük uğrunda mübarizədə də məğlub olaraq, turnirlə əliboş vidalaşmaq məcburiyyətində qaldı. Bu isə onun həm də DÇ-2011-ə gedəcək yığmada yer almaq şansını sual altına saldı.

"Klassiklər"dən bir gün öncə zəriflərimiz turnirdə uğurla çıxış edib. Baş məşqçi Rövşən Umudovun rəhbərliyi altında turnirə qatılan xanımlarımız heç də nə onlardan sonra çıxış edən "klassiklər"dən, nə də yarışın birinci günü meydana atılan sərbəst güləşənlərdən geri qalmayıb. Mariya Stadnik (48 kq) və Sona Əhmədlinin (59 kq) simasında qızıl medal qazanan qadın yığmamız yalnız finalda uduzan Gözəl Zutova (63 kq) ilə 1 "gümüş"ə və 4 "bürünc"ə sahib çıxıb. Zəriflərimizdən bürünc medalları Yuliya Radkeviç (55 kq), Olesiya Zamula (59 kq), Zümrüd Qurbanhacıyeva və Dina İvanova (72 kq) qazanıb.

Xatırladaq ki, dağıstanlı mütəxəssis Saypulla Absaidovun rəhbərliyi altında Qızıl Qran-Prinin ilk günü döşək üzərinə çıxan sərbəst güləş üzrə yığmamız isə 5 qızıl, 1 gümüş və 2 bürünc 8 medal qazanmışdı. "Qızıllar"ın sahiblərinə gəlincə, Mahmud Məhəmmədov (55 kq), Zəlimxan Hüseynov (60 kq), Cəbrayıl Həsənov (66 kq), Şərif Şərifov (84 kq) və Xetaq Qazyumov (96 kq) çempionluq sevincini yaşayıb, daha iki pəhləvanımız gümüş, birisə bürünc medal qazanıb.

Beləliklə də, Azərbaycan pəhləvanları ümumilikdə 24 medal qazanıb ki, onlardan da 9-u "klassiklər"in, 7-si qadınların, 8-i də sərbəst güləşənlərin payına düşüb.

Yeri gəlmişkən, reqlamentə uyğun olaraq, turnirdə hər çəki dərəcəsində qalib adını qazanan idmançıya 10, ikinci yerin sahiblərinə 5, üçüncü yeri tutanlara isə 2 min dollar mükafat verilib. Qalib idmançıların məşqçiləri isə 2000 dollara sahib çıxıblar.

İNTİQAM

Ekspress.- 2011.- 12 iyul.- S. 20.