İnsan olan belə vəhşilik etməz!

Tovuz rayonunun Əlibəyli kəndində erməni vəhşiliyinin qurbanı olan 13 yaşlı Aygün Zirəddin qızı Şahmalıyevanın ölümü ilə bağlı cinayət işinə başlanıb. Baş Prokurorluğun məlumatına görə, Tovuz Rayon Prokurorluğunda Cinayət Məcəlləsinin 120.2.12-ci (milli, irqi, dini ədavət və ya düşmənçilik niyyəti ilə adam öldürmə) maddəsi ilə iş başlanıb, istintaq hərəkətləri aparılır.

Xəbər verdiyimiz kimi, iyulun 14-də Ermənistanla həmsərhəd olan Əlibəyli kəndində partlayıcı qurğunun işə düşməsi nəticəsində Şahmalıyeva Aygün həlak olub, onun 32 yaşlı anası Şahmalıyeva Elnarə Məmmədtağı qızı isə bədəninin bud nahiyəsindən yaralanıb.

Partlayıcı qurğu quraşdırılmış "itəbənzər" uşaq oyuncağı Tovuz çayı yaxınlığında oynayan Aygün Cəfərov, Elsəvər Həsən oğlu ilə birgə taparaq sonuncunun evinə gətiriblər. Evdə oynayan zaman Aygün oyuncağı masanın üstünə vurub, nəticədə partlayış baş verib.

Hadisənin şahidi olan Elsevər ANS-ə olayı belə danışıb: "Çayda çimib evə qayıdanda suyun kənarında itə bənzər oyuncağı ayağımla vurub kənara tulladım. Sonra onu Aygün götürdü, ona oyuncağı atmasını dedim. Lakin yanımızda olan balaca uşaq ağladı və oyuncağı istədi. Aygün yenidən o oyuncağı götürdü və evə gətirib stolun üstünə qoydu. Elə həmin an itə bənzər oyuncaq partladı".

Dünən Daxili İşlər Nazirliyi (DİN) Tovuz çayının kənarından tapılan oyuncağın partlaması nəticəsində baş verən faciə ilə bağlı məlumat yayıb: "İyulun 14-də saat 15.30 radələrində Tovuz rayonunun Yuxarı Mülkülü kənd sakini, 16 yaşlı Elsevər Cəfərov və onlarda qonaq olan 13 yaşlı Aygün Şahmalıyeva Tovuz çayının kənarından tapdıqları oyuncağı evə gətiriblər. Həmin oyuncaq evdə partlayıb. Nəticədə Aygün hadisə yerində dünyasını dəyişib, onun anası Elnarə isə ayaqlarından xəsarət alaraq xəstəxanaya yerləşdirilib. Faktla əlaqədar rayon Prokurorluğu tərəfindən araşdırma aparılır".

Şahmalıyevlər ailəsi Sankt-Peterburqda yaşayır və Tovuza qonaq gəliblər. Ailənin başçısı Zirəddin Şahmalıyev faicədən 2 gün əvvəl Tovuzdan Rusiyaya qayıdıb.

Dünya erməni vandalizmini qətiyyətlə pisləməlidir

Tovuz rayonundan millət vəkili, Azərbaycanın AŞPA-dakı nümayəndə heyətinin üzvü Qənirə Paşayeva bildirib ki, partlayış nəticəsində yaralanan Elnarə Şahmalıyeva hazırda xəstəxanadadır: "Həkimlər onun vəziyyətini orta ağır qiymətləndirirlər. Onun müalicəsi davam edir".

Qənirə Paşayeva bunun Ermənistanın azyaşlı uşaqlara qarşı törətdiyi ilk vandalizm aktı olmadığını xatırlabı: "Bir neçə il bundan əvvəl həmin ərazidə analoji hadisə baş vermişdi. Ermənistandan çaya buraxılan oyuncağı götürərkən partlayış baş verməsi nəticəsində iki azyaşlı uşaq həlak olmuş, biri isə yaralanmışdı. Bu il mart ayının 8-də Ermənistan silahlı qüvvələri Ağdam rayonunun Orta Qərvənd kəndinin 9 yaşlı sakini Fariz Bədəlovu evinin həyətində oynayan vaxt snayperlə hədəfə alaraq qətlə yetirmişdi".

Millət vəkili deyib ki, Ermənistanın törətdiyi vandalizm aktı Avropa Şurası Parlament Assambleyası daxil olmaqla bütün beynəlxalq təşkilatlar qarşısında qaldırılacaq. Azərbaycanın rəsmi qurumları ilə yanaşı, diaspor və qeyri-hökumət təşkilatları da bu vandalizm aktını beynəlxalq ictimaiyyətin diqqətinə geniş şəkildə çatdırmalıdırlar: "ATƏT-in Minsk qrupunun həmsədrləri başda olmaqla beynəlxalq təşkilatların Ermənistanın törətdiyi bu cür vandalizm aktlarına qarşı heç bir tədbir görməməsinin, laqeyd münasibət bəsləməsinin nəticəsidir ki, Ermənistan bütün dünyanın gözü qarşısında bu cür insanlıq əleyhinə vandalizm aktlarını törətməkdə davam edir".

Millət vəkili bəyan edib ki, həmsədrlər, habelə beynəlxalq təşkilatlar bu hadisəni kəskin pisləməli, bu hadisənin törədilməsində təqsirli olanların cəzalandırılmasını tələb etməli, bu kimi vandalizm aktlarının yenidən təkrarlanmasının qarşısını almaq məqsədilə rəsmi İrəvana qarşı ciddi təsir və təzyiq mexanizmlərini tətbiq etməlidirlər: "Əks halda, bütün bunlar onsuz da gərgin olan vəziyyətin gərginləşməsinə gətirib çıxaracaq. Bu zaman yarana biləcək vəziyyətə görə məsuliyyət Minsk qrupu həmsədrləri və digər beynəlxalq təşkilatların üzərinə düşəcək".

Düşmən Qarqar və Tərtər çayları ilə də mina axıdır

Azərbaycanın bir sıra qurumları artıq Ermənistanın bu barbar davranışı - çayla bomba-oyuncaq axıtması məsələsini beynəlxalq təşkilatlarda qaldırmaqla bağlı işlərə başlayıblar.

"Minalar Əleyhinə Kampaniya" İctimai Birliyi iyulun 14-də hadisə ilə bağlı araşdırma apararaq, ermənilərin törətdiyi bu hadisə barədə Piyadalar Əleyhinə Minaların Qadağan Olunması Beynəlxalq Kampaniyası və Kasetli Silahların Qadağan Olunması Kampaniyasının üzvlərinin elektron poçtuna məlumat göndərib.

Təşkilatın sədri Hafiz Səfixanov APA-ya açıqlamasında bildirib ki, faktla bağlı müvafiq beynəlxalq qurumların tədbirlərində ayrıca məlumatlar veriləcək: "Bizdə olan məlumata görə, bu, ermənilər tərəfindən törədilmiş ikinci analoji əməldir. Bundan 15 il əvvəl faciə ilə nəticələnmiş eyni hadisə baş vermişdi. Bu, insanlığa yaraşan hərəkət deyil və hazırda bütün dünya bu kimi hallarla mübarizə yolları arayır. Ermənistan tərəfi bununla bir daha beynəlxalq hüquq normalarına məhəl qoymadığını və düşmənçiliyini sübuta yetirdi".

Səfixanov ermənilər tərəfindən hər il Tərtər çayı vasitəsi ilə Azərbaycanın nəzarətində olan ərazilərə minalar axıdılması məsələsinin də dəfələrlə beynəlxalq təşkilatlarda qaldırıldığını deyib.

Azərbaycan Ərazilərinin Minalardan Təmizlənməsi üzrə Milli Agentlik (ANAMA) də məsələni beynəlxalq təşkilatlarda və minatəmizləmə əməliyyatlarına dəstək verən donorlar qarşısında qaldırmağa hazırlaşır.

ANAMA-nın baş əməliyyat mütəxəssisi Adil Aslanov APA-ya bildirib ki, piyada əleyhinə mina və əldə düzəldilmiş, müxtəlif formalara salınmış "sürpriz partlayıcılar"ın istifadəsi (İED) Ottava Konvensiyası ilə qadağan olunub. Hazırda BMT bununla bağlı geniş iş aparır.

"2000-2001-ci illərdə Əlibəylidə yerli əhali tərəfindən ermənilərin dəfələrlə uşaq oyuncaqlarına bağlanmış partlayıcıları su ilə kəndə axıtması barədə məlumat verilmişdi. Bununla bağlı orada dəfələrlə partlayış olub, ölüm hadisəsi baş verib, yaralanan olub. Belə hallar ermənilər tərəfindən mütəmadi olaraq həyata keçirilir", - deyə ANAMA nümayəndəsi bildirib.

ANAMA nümayəndəsi bu yaxınlarda ermənilər tərəfindən su ilə minaların axıdılması faktına Ağdam rayonunda Qarqar çayında və Tərtər çayında rast gəlindiyini də qeyd edib. Aslanovun sözlərinə görə, oyuncağa partlayıcının quraşdırılmasının səbəbi də aydındır: "Oyuncağı götürən uşağı öldürmək. Bu, düşünülmüş şəkildə edilib və cinayətdir".

Aslanov ermənilərin "sürpriz mina" hazırlamaq baxımdan "təcrübəli" olduqlarını, onların qaz balonları, su vedrələri və s. qabların içində hazırladıqları İED-lərə müxtəlif cəbhəyanı yaşayış məntəqələrində rastlaşıldığını da vurğulayıb.

E.Mirzə

Ekspress.- 2011.- 16-18 iyul.- S. 12