"Xəzər"in uğurları

İmanyar Quliyev: "Nəşriyyatımız yeni nəslin ehtiyacının ödənilməsinə nail olmağa çalışır"

2007-ci ildən fəaliyyət göstərən "Xəzər" nəşriyyatı oxucuları bir-birindən maraqlı kitablarla sevindirməyə davam edir. Nəşriyyatın redaktoru İmanyar Quliyevin sözlərinə görə, əsas məqsədləri elmi, tarixi-mənəvi, tərbiyəvi, əxlaqi mövzularda yeni, orijinal kitablar nəşr edərək savadlı, ağıllı və mədəni gənc nəslin yetişməsinə az da olsa yardım etməkdir.

- "Xəzər" nəşriyyatı hansı vəzifələri gerçəkləşdirməyə çalışıb?

- Nəşriyyatın qarşıya qoyduğu əsas vəzifələrdən biri anbaan dəyişən dünyamızın inkişaf tələblərinə uyğun və yeni nəslin bu dəyişmədə kitab ehtiyacının ödənilməsinə, istədiyi mövzuda, istədiyi kitabı əldə etməsinə nail olmaqdır. Əslində biz gənc nəsillərin kitab oxumasını, maariflənməsini cəmiyyətimizin daim diqqət mərkəzində olan əsas məsələ, ulu öndərimiz Heydər Əliyevin bizə qoyub getdiyi bir ənənə və tövsiyə kimi qiymətləndirməliyik. Hazırda nəşriyyat oxucularına elmi, əxlaqi-didaktik əsərlər, ailə, hekayə kitabları təqdim edir.

- Bu günlərdə nəşriyyatınızın üç kitabı ayrı-ayrı nominasiyalar üzrə "2010-cu ilin kitabı" adına layiq görüldü. Bunlar hansı kitablardı?

- Bildiyiniz kimi, "Yeni yazarlar və sənətçilər qurumu"nun Azərbaycan Yazıçılar Birliyi İQƏAİM, Gənclər və İdman Nazirliyi, Mədəniyyət və Turizm Nazirliyi və M.F.Axundov adına Milli Kitabxananın dəstəyi ilə təşkil etdiyi XI Bakı Kitab Bayramı İlin Milli Kulturoloji Mükafatı Sənət Müsabiqəsinə yekun vuruldu. Müxtəlif nəşriyyatların və müəlliflərin rəngarəng kitab və nəşrlərlə qatıldığı müsabiqədə nəşriyyatımızın üç kitabı - "Riyazus-Salehin", "110 sualda Yaradılış və Təkamül", "Könül taxtımızın bənzərsiz sultanı: Peyğəmbərimiz 1,2" fərqli nominasiyalar üzrə "2010-cu ilin kitabı" adına layiq görüldü.

"Xəzər" nəşriyyatında nəfis şəkildə işıq üzü görmüş, böyük Məhəmməd Peyğəmbərin nəsillərə, hər bir insana nümunə sayılacaq nicat yolu haqqında qələmə alınmış dəyərli əsərə, İslam mədəniyyətinin zənginliyini əks etdirdiyinə, ilahiyyat elmi barədə geniş bilgilər verdiyinə görə teoloq, nüfuzlu düşüncə sahibi İmam Nəvəvinin "Riyazus Salehin" müxtəsər kitabı "2010-cu ilin Ədəbi-ilahiyyat kitabı", yüksək poliqrafik səviyyədə nəşr edildiyinə, yaradılış və təkamül probleminə alternativ baxış, intellektual nəzər salındığına, fəlsəfi təsəvvürlər baxımından oxunaqlı dildə yazıldığına, elmi göstəriciləri özündə cəmləyən müxtəsər ensiklopedik formada, maraqlı üslubda qələmə alındığına görə professor Arif Sarsılmazın "110 sualda Yaradılış və Təkamül" araşdırması "2010-cu ilin Elmi-kütləvi kitabı", bəşəriyyətə nicat gətirmiş Məhəmməd Peyğəmbərin həyatı - müqəddəs İslam yolu barədə qələmə alınmış dəyərli, oxunaqlı biblioqrafik, elmi-kütləvi əsərin səviyyəsinə, müsəlman sivilizasiyasının tarixinə həsr olunmuş intellektual baxışların inkişafındakı xidmətlərinə və nəfis şəkildə çap edildiyinə görə Türkiyənin tanınmış imza sahibi Rəşid Haylamazın ikicildlik "Könül taxtımızın bənzərsiz sultanı: Peyğəmbərimiz" kitabı "2010-cu ilin Biblioqrafik kitabı" nominasiyası üzrə qalibiyyətə nail olub.

- "Riyazus-Salehin" kitabı haqqında nə deyə bilərsiniz?

- Öncə qeyd edim ki, İmam Nəvəvi orta əsr Müsəlman Şərqinin tanınmış alimidir. O, cəmi 44 illik ömründə müxtəlif elm sahələrinə aid 42 əsərdən ibarət zəngin elmi irs qoyub getmişdir. Onun hər bir əsəri dərin elmi məzmunu, faktların dəqiqliyi və orijinallığı ilə seçilir ki, "Riyazus Salehin" adlı çoxcildlik əsəri də məhz bu qəbildəndir. Hədis elmində ən mötəbər mənbələrdən sayılan bu kitab yazıldığı vaxtdan İslam coğrafiyasında, o cümlədən Azərbaycanda stolüstü kitaba çevrilmişdir. Nəvəvi şəxsiyyəti, onun dərin hədis biliyi, hədis seçimində əsas götürdüyü prinsip və mənbələr (Kütubi-Sittə - "Səhih" (Buxari), "Səhih" (Müslim), "Sünən" (Əbu Davud), "Sünən" (Tirmizi), "Sünən" (Nəsai) və "Sünən" (İbn Macə) göstərir ki, bu kitabda əksini tapan hədislərin böyük əksəriyyəti səhihdir. O, "Təmiz niyyət, ixlas, səmimiyyət", "Səbir", "Doğruluq və istiqamət", "Xeyirxahlıq və yaxşılıq etməkdə yarışmaq" "Yaxşılığı yaymaq, pislikdən çəkindirmək", "Alimlərə, böyüklərə, fəzilətli insanlara ehtiram", "Qadınlarla yaxşı rəftar etmək," "Gözəl əxlaq" kimi 372 başlıq altında müvafiq ayə və hədisləri təqdim etmişdir. Əsərdə seçilən mövzular, ayə və hədislərdə əksini tapan məsələlər müasir cəmiyyət üçün də aktuallıq kəsb edir, mənəvi-insani dəyərləri qoruyub saxlamaq, yaşatmaq, yaşamaq üçün bir yol göstərir.

- "110 sualda Yaradılış və Təkamül" kitabında təkamül nəzəriyyəsi necə əks olunub?

- Təkamül nəzəriyyəsi ortaya atılandan bu günədək bir sıra mübahisə və müzakirələrə səbəb olmuş, haqqında - lehinə və ya əleyhinə xeyli araşdırmalar aparılıb. Alimlər daha çox bu nəzəriyyənin mütləq elm kimi təqdim edilməsini, faktlarla təsdiq olunmamasını, keçid formalarının tapılmamasını, təhriflərə yol verməsini, ideoloji xarakter daşımasını tənqid ediblər. Burada bir məqamı da qeyd edim ki, hal-hazırda Avropa və ABŞ-da Təkamülün yanlışlığını isbat edən xeyli elmi tədqiqatlar mövcuddur və bu nəzəriyyəyə əleyhinə çıxışlar get-gedə artır. Professor Arif Sarsılmazın "110 sualda Yaradılış və Təkamül" adlı kitabı da məhz bu mövzuya həsr olunub. Müəllif müasir elmi məlumatlara, bir çox Avropa və Amerika alimlərinin araşdırmalarına, öz təcrübəsinə və digər sanballı qaynaqlara əsaslanaraq Təkamülün yeganə elmi nəzəriyyə olmadığını, mühüm məsələləri düzgün, məntiqli, elmi cavablandırmadığını, elmi əsas qayəsindən uzaqlaşdırdığını ətraflı şəkildə izah edir. Kitab sual-cavab şəklində tərtib edilmiş, hər mövzuya aid faktların və ya fakt kimi istifadə edilən materialların fotoşəkilləri verilib.

- "2010-cu ilin Biblioqrafik kitabı"nda hansı tarixi hadisələrə toxunulub?

- İlahiyyatçı alim Rəşid Haylamazın Peyğəmbərimiz Həzrəti Məhəmmədin ömür yoluna həsr olunmuş "Könül taxtımızın bənzərsiz sultanı Peyğəmbərimiz - 1,2" kitabı 15 illik gərgin araşdırmalar nəticəsində ərsəyə gəlmişdir. Müəllif siyər ənənəsinə sadiq qalsa da, gələcəyimizə yön verən həqiqətləri quru xronloji ardıcıllıqla sadalamamış, roman üslubunda, sadə və anlaşıqlı dildə canlandırmışdır. Yazar oxucunu kitabın səhifələrində əksini tapan Allah Rəsulunun (s.ə.s.) nümunəvi həyatı ilə Peyğəmbər dünyasına çəkib aparır, o dövrün məşəqqətlərlə dolu acılı-şirinli günlərinə canlı şahid edir. Kitabı oxuduqca gah Rəsulullahın haqqa çağıran səsini, Ona arxa olan Hz. Xədicənin təsəllisini, gah səhabənin işgəncələrdən dilə gələn iniltisini eşidir, gah da müqəddəs yerlərdən hicrəti, Məkkə həsrətini görür və nəhayət, İslam bağında açan güllərin xoş rahiyəsini hiss edir, könüllərin İslamla, Rəsululahla, Quranla bütünləşməsinə şahid oluruq.

Sadə dildə, axıcı üslubda qələmə alınan duyğu yüklü bu əsərlə Peyğəmbərimizlə (s.ə.s.) aramızdakı məsafələrin qismən də olsa, qısalacağını düşünür və insanların səadətinə həsr edilən bu həyatı öyrənməklə öhdəmizə düşən vəzifələrə daha möhkəm sarılacağımıza ümid edirik.

Aynurə MƏMMƏDOVA

Ekspress.- 2011.- 8 iyun.-S. 23.