Ay uzun saç, qara göz...

Onun haqqında çox eşitmişdim. Eşitmişdim ki, düzəltdiyi gəlinciklərin hamısını milli üslubda hazırlayır. Amma düzəltdiyi gəlincikləri görməmişdim. "Yüz eşitməkdənsə bir görmək yaxşıdır" deyib, milli üslubda gəlincik hazırlayan Ruslan Hüseynovun emalatxanasına üz tutdum.

Ruslan Hüseynovun sözlərinə görə, gəlinciklər tarixi yaşadır. "Həmişə düşünürdüm ki, tariximizi yaşadan işlə məşğul olum. Beləcə milli üslubda gəlincik düzəltməyə başladım. Gəlinciklər yeni olsa da keçmişi yaşada bildilər".

R.Hüseynov onu da qeyd edir ki, çoxu xarici ölkədən gətirilmiş və keyfiyyətinə görə də uşaqlara ziyan olan gəlincikləri almağa üstünlük verir. "Uşaqlar əcnəbilərin nümunə göstərdikləri saçları müxtəlif rənglərə boyanmış, geyimi ilə bizim xanımlara uyğun gəlməyən gəlinciklərə oxşamağa can atır. Milli gəlinciklər isə qızlara xanımlığı öyrədir. Təəssüf olsun ki, milli gəlinciklərin istehsalı və bu istehsala tələbat çox azdır. Bəlkə də bu, təbliğat işlərinin zəif aparılması ilə bağlıdır".

Müsahibim düzəltdiyi gəlinciklərin geyiminə xüsusi diqqət verdiyini deyir. Onun sözlərinə görə, gəlinciklərin geyimi əl işləmələridir. "Onların çarıqlarına və rübəndlərinə də fikir verilir. O vaxt qadınlar çadra örtər, üzlərinə də rübənd vurardılar. Onları çarıqlarına görə tanıyırdılar. Çarıqlarından bilərdilər ki, bu subay xanımdır, yoxsa evli. Subay qadınlar əsasən rənbərəng və bəzəyi çox olan, evli qadınlar isə qırmızı bəzəkli çarıq geyinərdilər. Yaşlı qadınlar isə sadə dəridən çarıq geyinərdilər".

R.Hüseynov eyni zamanda sifarişlə milli üslubda gəlincik də hazırlayır. Dediyinə görə, sifarişlə hazırlanan gəlinciklər istənilən adamın surətinə uyğun düzəldilir. Belə gəlinciklərin qiyməti 90 manatdır. Gəlincik ustasının emalatxanasında insan hündürlüyündə olan rübəndlə örtülmüş gəlincik də vardı. Həmsöhbətimin dediyinə görə, belə gəlinciyin sifarişlə istənilən surətdə hazırlanması təxminən hazırlanma prosesinə və sərf olunan materiallardan asılı olaraq 600 manata başa gəlir. "Əsasən xınayaxdı və ya toy mərasimində bəylə-gəlinin surətinə bənzər gəlinciklər və başqa milli ruhda olan aksesuarlar sifariş olunur".

R.Hüseynovun sözlərinə görə, belə gəlincikləri uşaqlar üçün çox az adam alır. Əsasən hədiyyə etmək məqsədilə alınan bu gəlinciklərin alıcılarının böyük hissəsini turistlər təşkil edir.

Həmsöhbətim bir gəlinciyin düzəldilməsinə bir həftə vaxt sərf edir. Dediyinə görə, gəlinciyin düzəldilməsi birinci əllərdən başlanılır. "Əllər formaya salınır. Əgər süjetli gəlincikdirsə, misal üçün əlində qaval tutmalıdır. Plasmast və ya rezin gəlinciyin qolları çiyin hissədən, dirsək hissədən kəsilir və ona lazımi forma verilir. Daha sonra isə mimikasına fikir verilir. Makiyaj obraza uyğun edilir, dəri rənglənir. Tumanı və yubkası, sonra alt köynəyi və çəpkə tikilir. Sonra bəzək əşyaları, kəməri, bilərziyi, sinəbəndi, sırğası, alınlığı düzəldilir. Araxçın və baş örtüyü də geyimə uyğun tikilir".

Gəlinciklərin saçları təbii parikdən hazırlanır. "Təbii pariki mənə lazım olan qədər kəsib sifətin quruluşuna uyğun forma verirəm".

Müsahibim deyir ki, gəlinciklərin sifətlərini gipsdən hazırlamaq olar. "Əvvəl plastilindən gəlinciyin üzünə cizgilər verilir. Sonra həmin plastilinin üzərinə gips, gipsin də üzərinə rezin tökülür. Rezin quruduqdan sonra ondan qəlib düzəldilir. Hər dəfə bu qəlibə gipsi əlavə etmək olur. Bir müddət keçəndən sonra qurumuş gipsi qəlibdən çıxarıb bədənə yapışdırırıq. Sonda gəlincik akril boyası ilə rənglənir. Üzünə makiyaj edilir və üstü lakla örtülür".

Gəlincik ustasının sözlərinə görə, uşaqların milli ruhda böyüməsini, milli gəlinciklərlə oynamasını arzulayır: "Gəlinciklər sakit durmaqlarına baxmayaraq, Azərbaycanın mədəniyyəti, qadınların xanımlığı, kübarlığı, namusu barədə danışırlar".

Aynurə Məmmədova

Ekspress.- 2011.- 30 iyun.- S. 8.