Sabir şeirlərinin bədii qiraət müsabiqəsi başlayır

Söz Azadlığını Müdafiə Fondu və Azərbaycanda Vətəndaş Cəmiyyətinin İnkişafına Yardım Assosiasiyası Şamaxıda Mirzə Ələkbər Sabirin yaradıcılığına həsr olunmuş "Bədii qiraət" müsabiqəsinə start verib. İki mərhələdən ibarət olacaq müsabiqəyə Sabirin doğum günü -30 may tarixində yekun vurulacaq.

Müsabiqənin birinci mərhələsi orta məktəblərdə, Azərbaycan Müəllimlər İnstitutunun Şamaxı Filialında, Şamaxı Humanitar Kollecində keçiriləcək. Artıq təşkilat komitəsinin üzvləri qeyd olunan təhsil ocaqlarında olaraq adıçəkilən müəssisə rəhbərləri ilə müsabiqənin əsasnaməsini, o cümlədən, layihənin icrası ilə bağlı məsələləri müzakirə ediblər.

Qeyd edək ki, müsabiqənin təşkilində əsas məqsəd Sabir yaradıcılığını təbliğ etmək, tədris prosesində tətbiqinə metodiki dəstək vermək, tədris prosesində fəal şagirdləri üzə çıxarmaqla həvəsləndirməkdir. Yekun mərhələsində qalibləri tanınmış mədəniyyət və incəsənət xadimlərinin, habelə Şamaxıda fəaliyyət göstərən elm adamlarının da qatıldığı münsiflər heyəti seçəcək.

Xatırladaq ki, ənənəvi olaraq keçirilməsi planlaşdırılan müsabiqənin qaliblərinə qiymətli hədiyyələr və Fəxri Fərmanlar veriləcək.

AYXAN

Ekspress.-2011.- 1 mart .-S.23.