Aşıq Alının 210 illiyi qeyd olundu

Fevralın 28-də Heydər Əliyev Sarayında görkəmli saz-söz ustası Aşıq Alının 210 illik yubileyi qeyd olunub. "Mahalım Göyçədi, əslim Qızılvəng" adlı təntənəli yubiley mərasimi Mədəniyyət və Turizm Nazirliyinin dəstəyi, Azərbaycan Aşıqlar Birliyinin təşkilatçılığı ilə baş tutub.

Tədbirdə çıxış edən Aşıqlar Birliyinin sədri, xalq şairi Zəlimxan Yaqub Aşıq Alının həyat və yaradıcılığına nəzər salıb, onun aşıq sənətindəki danılmaz xidmətlərindən söz açıb. Zəlimxan Yaqub Aşıq Alının Azərbaycan aşıq sənətində ən görkəmli yetirmələrindən olan Aşıq Ələsgərin adını xüsusi qeyd edib. Şair çıxışında Aşıq Alı və Aşıq Ələsgər yaradıcılığına da müraciət edib.

Daha sonra aşıqlardan Ədalət Nəsibov, Mahmud Məmmədov, İsfəndiyar Rüstəmov, Fətulla Əliyev, Ələddin Göyçəli, Mais Gəncəli, Bəhmən Göyçəli, Fəzail Miskinli, Ağamurad İsrafilov, Ədalət Dəlidağlı, Cahangir Quliyev, Xanlar Xəlilov, Məhərrəm Hüseynli, Azər Xanlaroğlu, Şöhrət Kərimov və digərlərinin ifasında maraqlı çıxışlar olub. Tamaşaçılar tərəfindən böyük maraqla qarşılanan yubiley gecəsi anşlaqla baş tutub.

Ekspress.- 2011.- 2 mart.- S.23.