Operamızın Gülçöhrəsi 87 yaşında dünyasını dəyişdi

Vaxtilə opera səhnəsində "Gülçöhrə"ni, "Nigar"ı, "Əsli"ni böyük məharətlə oynayan, çox sevilən və ən arzulanan müğənnimiz Sona Aslanova Los-Anceles şəhərinin "Kaiser" xəstəxanasında 87 yaşında vəfat edib. O, 20 ilə yaxın idi Amerikanın Los-Anceles şəhərində yaşayırdı.

Sona Aslanova 1924-cü il oktyabrın 4-də Bakı şəhərində anadan olub. Orta və ali təhsilini doğma şəhərində alıb. Burada ailə qurub, sənətin zirvəsinə yüksəlib. Özünə yüzlərlə pərəstişkar qazanan Sona Aslanovanın səsini dahi Üzeyir Hacıbəyov "qəlbləri ovsunlayan səs" adlandırırdı. Üzeyir Hacıbəyovdan dərs alan Sona Aslanova 200-dən çox mahnı ifa edib və 12 bədii filmə çəkilib. "Bizim Cəbiş müəllim", "Görüş", "Telefonçu qız", "Bizim küçə", "O qızı tapın" kimi filmlərdə yadda qalan obrazlar yaradıb. 1952-ci ildə konservatoriyanı (Bakı Musiqi Akademiyası) bitirəndən həmin tədris ocağında pedaqoq kimi çalışan Sona Aslanova 20-dən artıq kadrın yetişməsində fədakarlıq göstərib. İtaliyalı Sofe İkonovna Qorskadan dərs alan əməkdar artist uzun illər Azərbaycan televiziyası, Dövlət Filarmoniyası və estrada orkestrinin solisti olub. Azərbaycan və xarici bəstəkarların nəğmələrini böyük coşqu və məharətlə ifa edib.

O, 1956-ci ildə "xalq artisi" adına, 1959-cu ildə isə "Şərəf" nişanı ordeninə layiq görülüb.

Sona Aslanova 1994-cü ildən Amerika Birləşmiş ştatlarında yaşayırdı.

AYXAN

Ekspress.-2011.-11 mart.-S.14.