"Muğam aləmi"nin proqramı

Martın 14-də Bakıda Heydər Əliyev Fondunun, Mədəniyyət və Turizm Nazirliyinin, Azərbaycan Bəstəkarlar İttifaqının birgə təşkilatçılığı ilə "Muğam aləmi" II Beynəlxalq Muğam Festivalının açılışı olacaq. Mədəniyyət və Turizm Nazirliyinin mətbuat xidmətindən verilən məlumata görə, martın 21-dək davam edəcək festivalın proqramı artıq müəyyən edilib. Bir həftə davam edəcək festival çərçivəsində muğama həsr olunan müzakirələr keçiriləcək, klassik və simfonik muğamlar səsləndiriləcək.

Festivalın açılışı martın 14-də, saat 17.00-da Beynəlxalq Muğam Mərkəzində olacaq. Martın 15-də, saat 11.00-da isə Milli Elmlər Akademiyasının Tarix Muzeyində "Azərbaycan muğamı və Orta Şərq musiqisi" adlı elmi simpoziumun açılış mərasimi olacaq. Həmçinin, festival çərçivəsində Azərbaycan Dövlət Akademik Opera və Balet Teatrında Üzeyir Hacıbəylinin "Leyli və Məcnun", Müslüm Maqomayevin "Şah İsmayıl", Fikrət Əmirovun "Sevil" operaları nümayiş etdiriləcək.

Heydər Əliyev Sarayında isə "Muğam-latinos" adlı konsert keçiriləcək. Festival iştirakçıları Beynəlxalq Muğam Mərkəzində əməkdar artist Zabit Nəbizadənin ifasında "Rast" muğamını dinləyəcəklər. Xalq artistləri Nəzakət Teymurova "Cahargah", Aygün Bayramova "Bayatı-Şiraz", əməkdar artistlər Təyyar Bayramov "Şur", Cabir Abdullayev "Segah", Simarə İmanova "Şüştər", Teyyub Aslanov "Humayun" muğamını oxuyacaqlar.

Bundan başqa, festival çərçivəsində müxtəlif ölkələrin ifaçılarının konsertləri də təşkil ediləcək.

Həmçinin, dünya şöhrətli xanəndə, xalq artisti Alim Qasımovun ustad dərslərinin keçirilməsi gözlənilir.

Festival martın 21-də Heydər Əliyev Sarayında keçiriləcək qala-konsertlə başa çatacaq.

Ekspress.-2011.-12-14 mart.-S.31.