Aytokya
Mircavad Mircavad haqqında
Məqalə Azərbaycanın görkəmli rəssamı
Mircavad Mircavadovun həyat yoldaşı tərəfindən
lent yazısına köçürülmüş xatirələri
əsasında hazırlanıb. Böyük rəssamın həyatı
və yaradıcılığı barədəki fikirləri
ilk dəfə mediada - "Ekspress"də çap olunur.
(əvvəli ötən şənbə
saylarımızda)
...1950-ci ildə Leninqrada gedərkən yolüstü
Konçalovskiyə baş çəkdim, Ermitajın fondunda
saxlanılan Sezannı və bütün yeni qərb sənətini
görmək üçün izn almaq istədiyimi ona bildirdim.
Pyotr Petroviç "bundan bir şey çıxmayacaq" -
dedi, vaxtı ilə o da buna cəhd edib, hətta onun
sözünü yerə salıblar. "Siz məni
yaxşı tanımırsınız" - qoca rəssama belə
cavab verdim. Mixail İllarionoviç Artamanovun kabinetinə
soxulub tələb elədim: "Sezannı mənə
göstərin, yoxsa sizi öldürəcəm". O
gülümsədi və dedi: "Öldürmək niyə,
biz sənə hər şeyi göstərərik". Mən
tərəddüd elədim, hər şeyin belə
asanlıqla baş tutacağına inanmadım, mənə
yazılı surətdə icazə verilməsini istədim. O
bunu da təbəssümlə elədi. Nəhayət, əlimdə
möhürlü, imzalı, daşdan keçən
kağızla Ermitajın gizli xəzinəsinin
qapısındayam, siqaret çəkməkdən səsi
korlaşmış qadın qapını açır:
"Siz bura necə düşmüsünüz? Bura kənar
adamın ayağı dəyməyib".
Budur, barmaqlarımın ucuyla tablolara toxunuram, Van Qoq,
Matiss, Sezann, Qogen... tabloları əməlli-başlı
görmürəm, onlarla nəfəs alıram, onları hava
kimi uduram, su kimi içirəm. Gözlərim dolur,
ağlayıram.
İki gündən sonra şokdan ayılıb
özümə gəlirəm, yenidən izn almaq
üçün Ermitaja yollanıram. Ağ mərmər pilləkənlərlə
qalxıram, yuxarıda bir qrup elmi işçi bir yerə
toplaşıb, ayağım büdrəyir,
yıxılıram, onlar gülürlər. Alim
qardaşların arasında dayanmış bir qadın "Nə
istəsə, ona göstərin. O, dəlidi, əsl dəlidi"
deyir. Qadının sözləri mənə çox pis təsir
elədi, əhvalım təlx oldu, ətrafında çərkəzi
paltar geyinmiş iki balaca dəcəl oğlan dolaşan
qadının özü heç də normal
görünmürdü. Səhəri gün muzey
işçilərindən birindən ətrafında çərkəzi
paltar geyinmiş iki uşağın dolaşdığı
qadının kim olduğunu soruşdum. "Orbelinin
xanımıdır, amma onların cəmi bir oğulları
var" - dedilər. Mən iki uşaq gördüyümü
söylədim. "Sizə elə gəlib, bəzən belə
şeylər olur". Bir qədər sakitləşəndən
sonra yenidən Artamanovun yanına gedib kobudluğuma görə
ondan üzr istədim. O, məni səmimiyyətlə qarşıladı,
mən xəcalət çəkdim, ondan soruşdum: "Məni
asanlıqla başınızdan edə bilərdiniz, məni
aldadardınız, sonra milis çağırardınız, rəssamlıq
institutunun tələbəsi deyiləm, nüfuzlu valideynlərim
də yoxdu, niyə belə etmədiniz?" Artamanov cavab verdi:
"Bu əsərlər bütün ölkədə
heç kimə lazım deyil. Birdən siz rüzgar kimi
içəri soxulursunuz, sanki hansısa başqa bir dünyadan
gəlmiş adamsınız, sizə yalnız rəngkarlıq,
rəngkarlıq və rəngkarlıq lazımdı. Bircə
özünüzü kənardan görə bilsəydiniz! Necə
ola bilər ki?"
Beş il Ermitajın divarları arasında dərs
aldım, Avropa klassiklərindən Sezann metodu ilə improvizələr
elədim. Rubens
obrazları üzərində işləyəndə yeməyimə
fikir vermirdim, çox yeyirdim, çəkim artırdı, El
Qreko sənətinə üz tutanda aclıq çəkirdim,
arıqlayırdım. Mənə elə gəlirdi ki, bu
minvalla obrazların ruhunu qoruyub saxlamaq mümkündür. Mən
əsərlərin üzünü
köçürmürdüm, yeni qərb rəssamlığının
gözü ilə onlara yanaşırdım, heç vaxt
kopiya çəkmədim, pulum olmasa, gedib kömür, kartof
boşaldıb başımı girləyərdim, bədii
salonlar, komission dükanları üçün bayağı
kopiyalar işləməzdim, bütün sovet tələbələri
belə eləyərdilər. Leniqradda Vasilyevski adasında
yaşayırdım, gələcək alim Rasim Əfəndiyev
bir neçə ay öz çarpayısını
dostcasına mənə həvalə elədi. Mənim o zaman
üçün təhlükəli sayılan fikirlərim
Rasimi qorxutmurdu, o heç zaman məndən üz döndərmədi.
Hələ Bakıda Muxtarovun gözəl qotik binasında
Rasimin mənzilində gənclərin toplantısında Avropa
rəngkarlığından ağızdolusu
danışardım, onda mənə kosmopolit kimi baxırdılar,
Sezann isə ümumiyyətlə formaliz kimi qadağan
olunmuşdu. Rasimin atası Səməd Mustafa oğlu Əfəndi
haçansa neft milyonçusu Muxtarovun kontorunda işləmişdi.
Vasilyevski adasında mənim dostum Bakı ədviyyatları
ilə dadlı düşbərə bişirərdi. Amma məsələ
bunda deyil, o, məni professor Levinson-Lesinq ilə tanış elədi,
bu səbirli insan mənə yardımçı oldu, onun sayəsində
Avropa fortlarını gördüm, amma mən acgöz, səbirsiz
və kobud idim, holland rəssamlarının - Van Deykin, Frans
Qalsın, Allah eləməsin, Vattonun adını eşidəndə
özümdən çıxırdım. Mənim də
öz ciddi səbəblərim vardı. Tablolarına əllərimlə
toxunduğum sənətkarlar Matiss, Pikasso sağ idilər,
yaşayıb yaradırdılar və hansısa əclaflar
onların əllərini sıxmağıma yol vermirlər.
Professor Levinson məndən Rasimə şikayətlənirdi,
Rasim də öz növbəsində həmişə
aranı sakitləşdirirdi. (Sonralar Rasim Əfəndi bir
çox elmi əsərlər yazacaq, professor, akademik olacaq,
Rasimin "Azərbaycanın daş plastikası" əsəri
mənim masaüstü kitabımdır).
Levinson məni görəndə sanki quldur
görürdü, baxışlarını
yayındırırdı, amma sən demə, mühazirələrində
məni tələbələrinə nümunə göstərirmiş
- rəssam belə olmalıdı...
Mən işlərimi muzeydə saxlayırdım, bir
gün tablolarımdan biri yoxa çıxdı. Piotrovskini xəbərdar
etdim, axtardıq, axtardıq, tablonu tapa bilmədim, onda Boris
Borisoviç dedi: "Dərd eləmə, deməli,
yaxşı əsər olub ki, kimsə oğurlayıb".
El Qrekonun "Pyotr və Pavel" tablosunun improvizəsi
üzərində uzun müddət işləmişdim, onda mənə
elə gəlirdi ki, improvizə alınmayıb, kətanı Neva
çayına atdım, aradan illər keçəndən
sonra Pikassonun "Menina"sını görüb sevindim, deməli
hələ o vaxtlar Nevada batan kətanı işləyəndə
mən düz yoldayammış...
Dəfələrlə məni Bakı ətrafında
alman cəsusuna oxşadıb həbs ediblər. Hər tərəf
hərbi obyektlərdi, heç kim mənim azərbaycanlı
olduğuma, rəssam olduğuma, sadəcə etüdə
çıxdığıma inanmırdı, hirsimdən ana
dilimdə söyüşü söyəndə adamlar təəccüblənirdilər,
orda bizim dilimizdə söyüş söyməyi də
öyrədirlər... Tübikləri ekspertizaya göndərirdilər,
rəssamlıq məktəbindən arayış istəyirdilər,
sonra anam dalımca gəlirdi. Adamların gözlərində
rişxənd, istehza görürdüm, şəkil çəkmək
üçün bulvara, parka, şəhərin mərkəzinə
gedərlər. Buzovnada başıma dəhşətli bir olay
gəlib, iki mənzərə, molbert və etüd qutusu ilə
üzü küləyə tərəf gedirəm, təzəcə
çəkdiyim mənzərələr sarıdan narahatam, bir
evin qapısını döyüb mənzərələr
quruyana qədər burda qalmasına izn istəyirəm. Ev sahibəsi Allaha, Qurana and içib məni arxayın
yola salır. İki həftədən sonra mənzərələrin
dalınca gələndə nə görsəm
yaxşıdı, uşaqlar cırılmış mənzərələrlə
oynayırlar, hirsimdən gözlərim dolur - bu, bir təsadüf
deyil. Beləcə, biz hər şeyimizi -
azadlığımızı, mədəniyyətimizi,
torpaqlarımızı itirəcəyik...
Məgər
bu təsadüfdürmü, gözlərimə qulyabani
görünür, əvvəlcə Gəncədə sovet əsgəri
məni cəsus kimi hərbi hissəyə təhvil verir,
Bakıda elektrik qatarında başında "aerodrom" var,
Əliayağı pirində molladı, Baksovet tərəfdə
dəlidi və s.
...Yük
maşınında Lənkərana gedirik, nağıla bənzər
bir bağın yanından keçirik, ağacların
budaqlarında portağallar, mandarinlər, ovuc boyda feyxoalar
sallanır. "Bunlar kimlər üçündü,
mağazalarda heç vaxt belə şey görməmişik".
Fazil (Azərbaycanın ən yaxşı heykəltəraşı,
xarici səfərlərdən qayıdanda ordakı
dünyanın çürüdüyünü dilinə gətirməzdi.
Fazil rus dram teatrı üçün iki maraqlı avanqard
barelyef işləyib, biri hələ divarda qalıb, ikinci daha
mürəkkəb, daha ifadəli barelyef bir neçə
gündən sonra MK-nın əmri ilə
götürüldü) onlar üçündü -
pıçıldadı. Marat, maşını saxla, -
sürücüyə qışqırıram. Mandarinlər
xalqa! - bu sözlərlə meyvələrdən dərib
maşının banına Fazilə və Rasim Babayevə
sarı atıram...
Xalaoğlum olmayanda tələbə yataqxanasında onun
çarpayısında yatırdım. Mən də
qışda öz təzə çəkmələrimi ona
verib, onun köhnə ayaqqabılarını geyərdim, onun
çəkmələri ayağımı sıxardı.
Uşaqlıqda olduğu kimi, yenə qardaşım Tofiqdən
çox Rasimlə oturub-durardım.
Aman Allah, mən
ki onları düşündüklərindən daha çox
sevirdim. Bəzən bütün dəstəmizlə Buzovnada
ucuz otaq kirayələyərdik, bir dəfə qəbiristanlığın
yaxınlığında həyətində böyük ərik
ağacı bitmiş ev kirayələmişdik, o qədər
ərik yemişdik ki, qarınağrısına
düşmüşdük, bir dəfə qızğın
mübahisə elədiyimiz yerdə qəbiristanlıqdan bizə
çörək və halva gətirdilər, o saat mübahisəmiz
kəsildi, ölüm bizə həyatı sevdirdi.
"Qəbiristanlığa
yaxın yerdə yaşamaq yaxşı şeydi, həmişə
bədbəxt rəsamın qarnını doydururlar".
Toğrul,
rəssamlıq məktəbi, gözləri dupduru, əynində
romantik paltar, köynəyinin yaxalığı altında
bant, tünd holland palitrası, gözəl anası var, onun
anası əslən Fransadandı, Toğrulgildə olmaqdan,
anası ilə söhbət etməkdən xoşum gəlirdi.
Restoranda Toğrul südlü şorba sifariş verəndə
az qala gülməkdən öləcəkdim, onunçün
araq və kabab gətirdim, ilk dəfə "odlu su" onun
incə boğazını yandırdı... ona qarşı həmişə
isti hisslərim olub... "26 Bakı Komissarı" tablosunu
işləyəndə soruşdu: "Bilirəm, bilirəm,
mövzunu unut, əsər haqqında fikrini söylə, hə?"
- mən də ona həqiqəti söylədim, sovet realistik məktəbi
üçün maraqlı və təzədi, ekspressiv kompozisiya,
təmiz rənglər... bilirsinizmi, Toğrul ağladı.
Natürmortlarında, mənzərələrində,
uşaq obrazlarında o dupduru gözlü, məxmər
gödəkçəli oğlandan bir şeylər var.
Ayrı-ayrı qütblərdə dayansaq da, mənim sənət
qarşısında absolyut ədalətim haqqında daha bir
örnək, hardasa gərək ki, altmış
üçüncü ildə Tahir vatman kağızı
üzərində işlədiyi cizgi rəsmlərini mənə
göstərdi, rəsmlərin texnikası, dinamikası mənim
xoşuma gəldi. 1987-ci ildə Moskvada "Manej" sərgisində
Tahirin rəsmlərinin başqa əsərlər arasında
necə seçildiyini gördüm, ona yaxınlaşıb
dedim: "Sən burdasan, mən orda, amma sənə
düzünü deyəcəyəm, rəsmlərin çox
güclüdür, təbrik eləyirəm".
Yaxşı görülmüş işdən xoşum
gəlir, akademizm olsa belə, obyektliyimə görə
çoxları mənə hörmətlə
yanaşırdı. 60-cı illərdə pul qazanmaq məqsədi
ilə uşaq kitabları üçün müasir, rəngarəng
illüstrasiyalar işlədim, sərbəst mövzu idi, park,
uşaqlar, fəvvarələr, illüstrasiyalar
özümün də xoşuma gəlirdi, baş redaktor məni
formazilmdə günahlandırdı və bildirdi ki, nə qədər
ki, sağam, bu burjua işlərinə yol verməyəcəm,
mən də ondan geri qalmadım - onda sənin
ölümünü gözləyərəm. Qəpik-quruş
qazanmaq üçün xaltura eləməli oldum, Azərbaycanın
rayonlarında yolkənarı şitlər üzərində
plakatlar çəkirdim, toyuq-cücə, inək-qoyun, süd
bidonları...
Bir dəfə
Rəssamlar İttifaqında dilxor oturub barmaqlarımla dizimi
döyəcləyirdim, pəncərədən uçub gedən
buludlara baxırdım, yaxınlıqdan bir səs gəldi:
"Hə, Cavad, bütün müridlərin səni tək
qoyub". Dönüb baxdım, tanış adamdı, kədərli,
amma gümrah səslə ona dedim: "Bir nəfər də
döyüşçüdü..."
Artistlər,
yazıçılar, alimlər və rəssamlar
sürüsü hakimiyyət maşınına boyun əyirdi,
onlarla bir örkənlə addımlamaq istəyənlər
bunun bədəlini ödəməli olurdular, işgəncələr
altında can verirdilər, ya da buz heykəllərə
dönürdülər, Hüseyn Cavid kimi. Xruşşov
Amerikada olanda Amerika prezidentinə "gələn dəfə
bura Şoloxovla gələcəyəm" - demişdi,
ABŞ prezidenti isə "SSRİ-yə Heminqueylə gələcəyəm"
- söyləmişdi, yazıçı isə dövlət
başçısı ilə gəlməkdən imtina
etmişdi... bax belə!
Dəfələrlə
yalan və zor imperiyasını tərk etmək istəmişəm,
mənim irihəcmli tablolarım vardı, əgər bəstəkar
və ya şair olsaydım, kağızlarımı
çemodana doldurardım və haydı. Amma mən bu məngənədən
canlarını qurtaranların əvəzinə sevinirdim, sanki
mənim bir hissəm onlarla uçub gedirdi...
(ardı var)
Adil Mirseyid
Ekspress.- 2011.- 7-10 may.- S. 14.