Çində Azərbaycan Mədəniyyəti Günləri

Mayın 24-dən 27-dək Çin Xalq Respublikasında Azərbaycan Mədəniyyəti Günləri keçiriləcək. İki ölkə arasında mədəni sahədə əlaqələri möhkəmləndirmək, Azərbaycan mədəniyyətini Çində daha geniş tanıtmaq məqsədi daşıyan tədbir çərçivəsində Qara Qarayev adına Azərbaycan Dövlət Kamera Orkestrinin, Dövlət Rəqs Ansamblının solistlərinin və muğam ifaçılarının çıxışları, Azərbaycana həsr olunmuş fotosərginin, habelə milli geyimlərimizdən və miniatür kitablardan ibarət sərgilərin təşkili nəzərdə tutulub.

Mədəniyyət günləri çərçivəsində Azərbaycan incəsənət ustaları Çinin tarixi şəhərlərindən olan Yentayda da konsert proqramı ilə çıxış edəcəklər. Bundan əlavə, Azərbaycan rəsmi nümayəndə heyətinin ÇXR-in Mədəniyyət Nazirliyində, Çin Milli Turizm Administrasiyasında, Çin Milli Muzeyində görüşləri də planlaşdırılır.

Azərbaycanla Çin arasında mədəni əlaqələrin böyük tarixi var. Qədim İpək Yolu dövründə bu münasibətlər xüsusilə möhkəmlənib. Azərbaycan 1991-ci ildə müstəqilliyini bərpa etdikdən sonra iki ölkə arasında mədəni əlaqələr də yeni müstəviyə qədəm qoyub. Müxtəlif səviyyəli qarşılıqlı səfərlər zamanı mədəni məsələlərə dair bir sıra sənədlər imzalanıb. 2006-cı ilin dekabrında Azərbaycanın Çindəki səfirliyinin nəzdində "Şuşa" Mədəniyyət Mərkəzi fəaliyyətə başlayıb. Ötən ilin noyabrında Azərbaycanın Çindəki səfirliyinin dəstəyi ilə Üzeyir Hacıbəylinin "Arşın mal alan" operettası Pekində çin dilində səhnələşdirilib.

Ekspress.- 2011.- 11 may.- S. 23.