Ən gözəl "Eurovision" Azərbaycanda keçiriləcək

Nigar Camal və Eldar Qasımov mətbuat konfransı keçirdi

Dünən İctimai Televiziyada (İTV) "Eurovision-2011" müsabiqəsinin nəticələrinə həsr edilən mətbuat konfransı keçirildi. Tədbiri açan İTV-nin baş direktoru İsmayıl Ömərov hələ də final gecəsinin həyəcanından ayılmadığını bildirdi:

"Bu gün biz sevinc, bayram içindəyik. Qələbə var ki, bir diyarın sevincidir, amma bizim bu qələbəmiz bütün türk dünyasının sevincidir. Bu sevinci bizlərə Eldar və Nigar bəxş edib. Hisslərimi ifadə etmək üçün sözün gücü yoxdur və söz tapmaq çox çətindir. İllərdir arxasınca qaçdığımız, inanılmaz gördüyümüz zirvəyə ucaldıq. 14 may -Azərbaycan tarixinə qızıl hərflərlə yazıldı. Hər şeyin əsası seçimdən asılıdır. Bu seçimi edən, bu qərara gələn münsiflər heyətinə təşəkkür edirəm. Münsiflər heyətinin seçimi zamanı böyük tərəddüdlər oldu, ancaq çox düzgün qərar verildi. Bu, ideal seçim idi. Artıq bu, bütün dünyanın seçimidir".

Baş direktor qeyd etdi ki, "Eurovision"a 2012-ci ildə ev sahibliyini təsdiqləyən sənəd artıq Azərbaycana təqdim edilib: "Bu gün bizə zəng vurdular. Gələn ayın 20-də Cenevrədə EBU-nun mərkəzi ofisində yarışmanı harada və necə keçirməklə bağlı məsələlər müzakirə olunacaq. Əminəm ki, yarışmanın ən gözəl və təmtəraqlısı məhz Azərbaycanda keçiriləcək".

"Eurovision-2011" müsabiqəsinin qalibi Eldar Qasımov çıxışına qələbə münasibətilə bütün türk dünyasının təbrik etməklə başladı: "Bu tək bizim yox, hamımızın qalibiyyətidir. Əgər nə isə çatışmasaydı, o zaman istəyimizə nail ola bilməzdik. Çox sağ olun ki, bizə inandınız".

Nigar Camal isə onlara inanan və etibar edən hər kəsə təşəkkürünü ünvanladı və Azərbaycan xalqını qələbə münasibətilə təbrik etdi: "Əlimdə türk bayrağı tutmuşdum. Bütün Türk dünyasını təmsil etdiyimiz üçün səhnəyə bu bayraqla çıxdım. Bu o deməkdir ki, biz doğrudan da bir millət, iki dövlətik. Əgər bu yarışmada təmsilçilik hüququnu yenə bizə versələr, Azərbaycana ikinci dəfə bu qələbəni bəxş edərik".

Daha sonra KİV nümayəndələrinin sualları cavablandırıldı.

Ermənistanın Bakıda keçiriləcək "Eurovision-2012" müsabiqəsində iştirak edib-etməyəcəyi ilə bağlı sualı cavablandıran İsmayıl Ömərov hələlik bu barədə heç nə deyə bilməyəcəyini qeyd etdi: "Ermənistan təmsilçisinin bu yarışmada iştirakına gəldikdə, mənə məlumat veriblər ki, ermənilərə bununla bağlı sual verilib və onlar müsabiqəyə qatılmayacaqlarını bildiriblər. Əgər onlar bu fikirdədirsə, buna çox təəssüf edirəm. "Eurovision" yarışması insanları humanizmə çağıran müsabiqədir. Biz ayrıca heç kəsi dəvət etmirik. Bu, çox uzun bir prosesdir və burada ciddi qaydalar var, biz bütün bu qaydalara əməl edirik".

İ.Ömərov budəfəki müsabiqəyə xərclənən vəsaitin məbləğinə toxunaraq bildirdi ki, Azərbaycan təmsilçilərinin bu il keçirilən "Eurovision" müsabiqəsində iştirakına ötən ildəkindən az vəsait xərclənib.

"Azərbaycanın müsabiqədə iştirakı neçəyə başa gəlib" sualına cavab olaraq İ.Ömərov hələlik konkret hesablama aparılmadığından, bu barədə yaxın gələcəkdə açıqlama veriləcəyini dedi.

Müsabiqədə məğlub olan ölkə təmsilçilərinin Azərbaycanın qələbə qazanmasını maliyyə ilə bağlamaları barədə yanaşmaya münasibət bildirən İctimai Teleradionun direktoru bunu "məğlubiyyətə dözümsüzlük" kimi qiymətləndirdi: "Onlar bu qələbəni həzm edə bilmirlər. Sizlərdən də xahiş edirəm ki, maliyyə məsələsinin üstünə bu qədər getməyin. Bu qələbə Azərbaycan mədəniyyətinin, musiqisinin, Eldar və Nigarın qələbəsidir. Eldar və Nigara əsas rəqib kimi yanaşırdılar. Bu da sübut olundu".

Qeyd edək ki, Azərbaycanın 2010-cu ildə Norveçdə keçirilən "Eurovision" müsabiqəsinə 1 milyon 564 min manat vəsait xərclədiyi açıqlanıb.

Daha sonra Eldar Qasımov "Eurovision" səhnəsində nümayiş etdirdiyi əl işarəsinə aydınlıq gətirərək bildirdi ki, bu "mən sizi sevirəm" deməkdir". O, nümayiş etdirdiyi işarənin müxtəlif cür yozulmasına lüzum görmədiyini vurğuladı.

Daha sonra Eldar qeyd etdi ki, hələ də anası ilə görüşməyib: "O qədər tədbir var ki, hələ ki, anamla görüşməyə imkan tapmamışam".

E.Qasımov onu da qeyd etdi ki, muğam dərsləri almağı planlaşdırır.

İsmayıl Ömərov "Eurovision-2011"-də qalib gələn təmsilçilərimizin mükafatlandırma mərasimi zamanı səhnəyə Azərbaycan bayrağı ilə deyil, yalnız Türkiyə bayrağı ilə çıxmalarına da münasibət bildirdi. İ.Ömərov vurğuladı ki, Azərbaycan təmsilçiləri həyəcanlı olduqları üçün səhnəyə Türkiyə bayrağı ilə çıxıblar. Onun sözlərinə görə, Nigarın əlində Türkiyə bayrağı olub, Azərbaycan bayrağı isə Eldarın əlində olmalı idi. Lakin Eldar həyəcanlandığından, ona tapşırılan vəzifəni unudub.

"Həyat yoldaşım Böyük Britaniya vətəndaşı olan türkdür. Türkiyə bayrağı ilə səhnəyə çıxmağımla onu göstərmək istədim ki, bu, bütün türk dünyasının qələbəsidir", -bu sözləri də Nigar Camal deyib.

"Azərbaycanın müxalifət liderləri ilə görüş təklifini qəbul edərsinizmi" sualına isə Eldar və Nigar belə cavab veriblər: "Hər kəslə görüşməyə hazırıq. Niyə də olmasın?".

Təmsilçilər ötən gün Türkiyənin "Star" telekanalında yayımlanan proqramda suallara cavab verdiklərini də qeyd ediblər.

Rusiya mətbuatında yer almış "Running Scared" mahnısının plagiat olması ilə bağlı iddialara gəlincə, İ.Ömərov ictimaiyyəti bu cür təxribatlara uymamağa çağırdı.

Mətbuat konfransında o da məlum oldu ki, Eldarla Nigar yaxın gələcəkdə Türkiyəyə səfər edəcəklər. Onlar eləcə də bu yaxınlarda Almaniyaya gedəcəklərini qeyd etdilər.

Bir çox ölkələrdən dəvət aldıqlarını deyən "Eurovision" qalibləri gələcəklə bağlı bir sıra planları olduğunu söylədilər. Nigar Camal ona filmə çəkilmək təklifi gəlsə, buna razılıq verəcəyini bildirdi.

Konfransın sonunda Eldar və Nigar qalibiyyətdən sonra "Esprit Arena"da oxuduqları Müslüm Maqomayevin "Ey əziz anam, Azərbaycan" mahnısını və ölkəmizə qalibiyyət gətirən "Running Scared" mahnısını ifa etdilər.

İltifat Hacıxanoğlu

Ekspress.- 2011.- 18 may.- S. 23.