"Amalımız Azərbaycana xidmət etməkdi"

Diaspor qurumları içərisində Danimarka Azərbaycan Dostluq Cəmiyyətinin xüsusi yeri var. Bu qurumun sədri Elxan Hüseynovla müsahibə götürmək istəyimiz çoxdan vardı, amma müəyyən səbəblərdən söhbətimiz alınmırdı. Sonuncu dəfə isə eşitdiyimiz onun acı ölüm xəbəri bizləri sarsırtdı. Elxan Hüseynovdan müsahibə götürə bilməsək də, Azərbaycanı dünyada layiqli təmsil etmiş bu insan haqqında geniş fikir söyləməyi özümüzə borc bildik.

Elxan Hüseynov diasporumuzun fəal üzvü kimi

Ermənistanın Azərbaycana qarşı təcavüzünə biganə qalmayan Elxan Hüseynov Danimarkada yaşadığı ilk vaxtlarda Danimarka Azərbaycan Dostluq Cəmiyyətini təsis edərək Azərbaycanı bu ölkədə tanıtdırmağa başlayır. Onun fəaliyyəti sayəsində Danimarka ictimaiyyətinin Azərbaycan həqiqətləri, Ermənistanın Azərbaycana qarşı təcavüzü, Xocalı soyqırımı haqqında məlumatları artmış, ölkənin ictimai rəyində Azərbaycanın ədalətli mövqeyinə dair fikirlərin formalaşması daha da sürətlənib. Sonuncu dəfə Dünya Azərbaycanlılarının III Qurultayında vətəndə səfərdə olan Elxan Hüseynovun müsahibələrinin birində diasporla bağlı geniş fikirləri var: "Bütün dünya bilir ki, ermənilər Rusiya, Ukrayna, Fransa, Almaniya və s. ölkələrdə hərbi dəstələr yaradırlar. Mən müharibə başlayarsa, Azərbaycan diasporunun mobilizə olunması təklifi ilə çıxış edəcəyəm. Çünki birinci Qarabağ müharibəsində müxtəlif ölklərdən nə qədər erməni yaraqlısının gəlib döyüşlərdə iştirak etməsinin şahidi olmuşuq. Artıq Diasporla İş üzrə Dövlət Komitəsinə bu təklifi vermişəm. Biz bu gün keçmişdəkindən fərqli olaraq təşkilatlanmalı, hazır olmalıyıq. Azərbaycanın bu gün artıq formalaşmış güclü diasporu, güclü intellektual potensialı, maliyyə mənbələri, iş adamları var. Döyüşlər başlasa, Ali Baş Komandan əmr verərsə, diasporumuzu təşkilatlandıraraq ondan düzgün istfadə etməliyik".

Ermənilərə qarşı sərt mübarizə üsulu

Fəaliyyəti dövründə daim üzdəniraq qonşularımızın yalanlar üzərində qurulan fikirlərini dünya ölkələrinə çatdırmasına mane olan, Azərbaycanı bir ölkə kimi diqqətdən kənar saxlamaq istəklərinə qarşı çıxan Elxan Hüseynov ömrünün son gününə qədər bu mübarizəni davam etdirdi. Dünya ölkələrindən erməniləri daim təqib edən Elxan Hüseynov deyirdi: "Skandinaviyada ermənilərin mövqeləri çox zəifdir. Son illər Azərbaycan diasporu orada daha da güclənib. Mən ermənilərin yalan informasiyasına qarşı gündəlik mübarizə aparıram. Danimarka mediasında biz hər zaman çıxışlarımızda ermənilərin Azərbaycan torpaqlarını işğal etməsi barədə ətraflı məlumatlar veririk. Artıq üç ildir Danimarka dövləti tərəfindən maliyyələşdirilən "Birgə və fərqli" adlı çox böyük layihə həyata keçirilir. 2007-ci ildə biz bu layihənin sadəcə iştirakçısı idik. Amma o qədər gözəl iştirak etdik ki, 2008-ci ildən artıq biz bu layihənin işçi qrupunun üzvüyük. Bu layihəyə baxmağa minlərlə insan gəlir. Demək olar ki, keçmiş Sovet İttifaqında yaşayan bütün millətlərin nümayəndələri gəlib bizim bayraq altında Azərbaycanın qrupu ilə birgə iştirak edirlər, yəni bu məsələdə erməniləri kənarda qoymuşuq. Layihə Danimarkanın aparıcı KİV-ləri tərəfindən hər zaman işıqlandırılır. Layihə çərçivəsində Azərbaycanla bağlı böyük stendlər sərgiləyirik. Keçmiş hərbçi kimi böyük bir xəritə üzərində tamaşaçılara faktları göstərirəm. Stenddə dövlət rəmzlərimiz, işğal olunmuş ərazilərimizin xəritəsi və bununla bağlı ətraflı izahat, eləcə də ölkəmiz haqqında digər bilgilər tədbirə qatılanların marağına səbəb olur. Danimarkalılar çox da siyasiləşmiş millət deyil, eyni zamanda hansısa bir tərəfin mövqeyini tam tutmurlar. Amma son illər Danimarkada Azərbaycan haqqında konkret bir fikir formalaşıb. Artıq onlar bilirlər ki, torpaqlarımız Ermənistan tərəfindən işğal olunub və Azərbaycan Avropaya lazım olan enerji dövlətidir. Yeri gəlmişkən, türk təşkilatlarının da bizə dəstəyi böyükdür. Ötən il Türk Cəmiyyətləri Birliyi ilə birgə Danimarkada "Gerçək soyqırım - Xocalı" layihəsini təqdim etdik. Həmin tədbirdə xəritə üzərində "Ermənilərin Xocalı soyqırımı planı" layihəsini də təqdim etdim. Keçən il Danimarkada "Xocalıya yardım" adlı humanitar və məlumatlandırıcı kütləvi aksiyalar keçirildi. Növbəti illərdə də belə tədbirlər keçirməyi planlaşdırırıq".

Əcəl aman versəydi, Elxan Hüseynov planlı şəkildə gördüyü işlərlə millət uğrunda apardığı təbliğatı davam etdirəcəkdi...

"Seyran Ohanyan etdiyi cinayətlərə görə cavab verməlidir"

Ermənilərin necə fitnə-fəsadlara sahib olduqlarını bilən Elxan Hüseynov mübarizəyə hələ tələbəlik illərindən başlamışdı. Ermənistanın indiki müdafiə naziri Seyran Ohanyanla bir məktəbdə oxuyan Elxan Hüseynovun onun haqqında dediklərinə nəzər salaq: "1980-1984-cü illərdə Bakı Hərbi Məktəbində (İndiki Heydər Əliyev adına Ali Hərbi Məktəb) təhsil almışam. Ohanyan isə həmin məktəbdə 1979-1983-cü illərdə təhsil alıb. Onu şəxsən tanıyırdım, hərdən söhbət edirdik. O vaxt azərbaycanlılarda ermənilərə nifrət yox idi. Ohanyanı ilk dəfə görəndə məktəbə daxil olmağa təzə hazırlaşırdım. Mənimlə Zaqataladan olan Musa adında oğlan da var idi, sonradan o, Əfqanıstanda həlak oldu. Günlərin birində Musa ilə söhbət edirdik ki, bu zaman Ohanyan erməni tələbələrlə bizə yaxınlaşdı. Musaya suallar verməyə başladı, kollecə niyə daxil olmaq istədiyini soruşdu. Musa da ona cavab verdi. Bundan sonra Ohanyan ona istehza eləməyə başladı, "Səndən komandir olar? Qayıt kəndinə, özünə bir neçə qoyun al, otar, sonra evlən və həyatını yaşa" deyib güldü. Ohanyanın məktəbdə azərbaycanlı dostu yox idi, o ancaq erməni və ruslarla oturub-dururdu. Məktəbi bitirəndən sonra Ohanyanı leytenant kimi Almaniyaya xidmətə göndərdilər. O vaxt xaricə ancaq əlaçı tələbələr göndərilirdi, Ohanyan isə məktəbdə erməni kafedra müdirinə rüşvət verib buna nail olmuşdu. Biz o vaxtdan Ohanyanın şovinist fikirlərinin şahidi olurduq. Ohanyan əli qana batmış qəddar canidir, Xocalı qətliamına şəxsən rəhbərlik edib, Ermənistan hərbçiləri arasında bəlkə də onun qədər Azərbaycana nifrət edən tapılmaz. Bakıdan gedən ermənilər tanıyıram ki, onlar Ohanyana nifrət edirlər. Xocalı hadisələrindən sonra mən ATƏT-in cəbhə xəttini izləyən missiyasının ukraynalı üzvü ilə təmasda oldum. Həmin missiya erməni tərəfə keçməliymiş. Ukraynalı nümayəndə mənə dedi ki, qarşı tərəfə keçəndə Ohanyanın əlini sıxmayacaq, çünki onun əli dırnaqlarına qədər qana batıb. O dedi ki, Xocalıda baş verənlər haqda hər şeyi bilirlər. Ohanyan bir gün etdiyi cinayətlərə görə cavab verəcək. Təkcə azərbaycanlı olduqlarına görə yüzlərlə, minlərlə günahsız insanın qanına bais olan bu şəxs rahat yaşaya bilməz. Şərəfi və vicdanı olsaydı, indi Ohanyan özünü öldürmüşdü".

Elxan Hüseynov Azərbaycanı bütün dünyada tanıtmaq yolunu seçmişdi. O, son müsahibərindən birində deyir: "Biz hər bir üsuldan istifadə edərək ilk növbədə Qarabağ problemini önə çəkirik. Silahı əldən yerə qoymaq olmaz. Silah tək səngərdə deyil, həm də informasiyadadır. Azərbaycanlı gənclərimiz xarici ölkələrdə təhsil alırlar. Bu da gələcək silahlarımızdan biridir. Erməni yalanlarının artıq 99 faizi puç olub. Əsas məsələ azərbaycanlıların Danimarka cəmiyyətinə inteqrasiyasıdır. Məsələn, bir neçə il bundan qabaq DİDK-nin yardımı ilə Hillerod şəhərinin vitse-meri Tyu Tortsenin Azərbaycana səfərini təşkil etdik. O həm də Danimarkada nüfuzlu bir həmkarlar ittifaqının katibidir. Burda görüşlər keçirib, Azərbaycanın gözəl guşələrini gəzdirdik. İndi onun kabinetində gözə çarpan iki şey var: Azərbaynın bayrağı və neft quyusunun maketi. T.Tortsen təbii ki, hər bir qonağına Azərbaycan haqqında danışır. Yeni təyin olunmuş vitse-meri də şəxsi dostumuz olaraq Azərbaycana gətirmək istəyirik. Eyni zamanda fikrimiz var ki, Danimarkanın "Hafla" instrumental ansamblının Azərbaycana səfərini təşkil edək".

Danimarka-Azərbaycan Dostluq Cəmiyyəti

Danimarka-Azərbaycan Dostluq cəmiyyəti yarandığı gündən hər iki dövlət arasında isti münasibətlərin yaranması istiqamətində böyük işlər görmüşdü ki, bunda da Elxan Hüseynovun böyük rolu olub. "Biz Danimarka və Azərbaycan xalqları arasında dostluq körpüsü yaratmaq yolunu tutmuşuq", - deyən E.Hüseynovun bu barədə daha geniş fikirləri vardı: "Təşklatın tərkibində Azərbaycan Mədəniyyət Mərkəzi və Gənclər Təşkilatı var. Mən həmişə deyirəm, amalımız azərbaycanlılara deyil, Azərbaycana xidmət etməkdir. Mən həm də Fredensborq bələdiyyəsinin mədəniyyət və ictimaiyyət bölməsində fəaliyyət göstərirəm. Tez-tez tədbirlər, konsertlər təşkil edirik. Əsas məqsədimiz bizim tamaşaçıların danimarkalılardan ibarət olmasıdır. Bundan başqa hər il keçirilən Dünya Türk Mahnıları Olimpiadasının təşkilatçılarından biriyik. Yarışmada danimarkalı qız Yohanna Eybubidstrum xalq mahnımız "Sarı gəlin"i Azərbaycan dilində ifa etməsi çox böyük uğurdur. Bu baxımdan düşünürəm ki, azərbaycanlı ailələrinin dilimizin qorunması, hətta əcnəbilərə öyrətməyə belə səy göstərməsi çox önəmlidir. Əgər belə bir səy göstərsək o zaman Avropada bizi daha yaxından tanıtma imkanları olacaq", - deyə əminliklə bildirdi Elxan Hüseynov.

Müsahibələrinin birində o, əcnəbi ölkələrində olan cəmiyyətlərin yararsız fəaliyyətindən də bəhs edib:

"On il bundan qabaq söhbət Azərbaycanı tanıtmaqdan gedirdisə, bu günlər məsələ Azərbaycanın mövqeyini tanıtmaqdan gedir. Əfsus ki, bir çox diaspor təşkilatları yararsızdırlar. Məsələn, Hollandiyada olan diaspor təşkilatlarının bir-birləri ilə çəkişmələri bir azərbaycanlı kimi məndə narahatçılıq doğurur. Danimarkada da həllini tapmamış məsələlər var. Bir də görüsən ki, kimsə yazılar yazıb mövqeyini bildirir, müzakirələrdə iştirak edir. Amma dərinə getdikdə, aydın olur ki, bu adam tək özündən və kompyuterindən ibarətdir, yəni heç bir sosial dəstəyi yoxdur, sadəcə şəxsi mövqeyini bildirir. Bəzən də diaspor təşkilatları hansısa qrupları təmsil edirlər. Təbii ki, bu qruplar bir-biri ilə ədavət aparırlar. Bu da bizim işimizə, ümumi xəttimizə böyük bir zərbə vurur. Diaspor işi özünü gözə soxmaq deyil, fəaliyyətin real bəhrəsi olmalıdır. Diasporumuz hələ ki təşkilatlanma prosesini yaşayır. Təbii ki, bu proses getdikcə hər şey ortaya çıxacaq. Doğrudan da, Azərbaycanı sevən, bu yolda canından keçməyə hazır olan diaspor qurumlarımız öz layiqli yerlərini tutacaqlar. Amma bir özü, ailəsi, bir də kompyuterindən ibarət olanlar təbii ki, tarixin zibilliynə gedəcəklər". Bunları da Elxan Hüseynov söyləyirdi...

... Arzuları çox idi, tükənməzdi, millət üçün çalışmağı özünə şərəf bilirdi. Qarabağda qızğın döyüşlərdə sağ-salamat evinə dönən Elxan Hüseynov, çox təəssüf ki, amansız xəstəliklə mübarizə aparmaqda çarəsiz qaldı...

Elxan Hüseynovun vəfatı tək onun ailəsi üçün deyil, bütövlükdə Azərbaycan və türk diasporları üçün ağır zərbə oldu. Allah rəhmət eləsin.

Ulduzə QARAQIZI

Ekspress.- 2011.- 1 noyabr.- S. 12.