Mir Cəfərin məhkəməsi necə
hazırlanmışdır
Azərbaycanda ötən
əsrin ən qalmaqallı və indiyədək ətrafında
söz-söhbətlərin dolaşdığı məhkəmələrdən
biri Mir Cəfər Bağırovun məşhur məhkəməsi
olmuşdur. Tanınmış yazıçı-tədqiqatçı
Teyyub Qurban bu məhkəmə, onun necə və kimlərin
sifarişi ilə hazırlanmasını arxiv materialları əsasında
araşdırıb.
(əvvəli ötən
şənbə
saylarımızda)
Bağırov və Şəkinski
Azərbaycan
Respublikası Prezidenti İşlər İdarəsi Siyasi Sənədlər
Arxivində tanış olduğumuz materiallar göstərir
ki, Tahirə Tahirovanın da yüksəliş illəri Mir Cəfər
Bağırovun adı ilə bağlıdır. Sənədlərə
diqqət yetirin:
"Ümum İttifaq
Qommunist (bolşevik) Firqəsi
AQ(b)F Mərkəzi
Qomitəsi
4 fevral 1940-cı il
Azərbaycan neft kombinatı trestləri
müdirlərinin təsdiqi barədə
Tahirova Tahirə Əkbər
qızı (Azərbaycan Neft Elmi-Tədqiqat İnstitutu), mədən
mühəndisi, Azərbaycan Sənaye İnstitutunun
aspirantı, trest müdiri təsdiq olunsun.
Məsələ
Ümum İttifaq Qommunist (bolşevik) Firqəsi Qomitəsinin
təsdiqinə göndərilsin.
Azərbaycan Q(b)F MK
katibi M.C.Bağırov
4 fevral 1940-cı
il."
İki ildən sonra,
1942-ci ildə M.C.Bağırov Tahirə Tahirova haqqında
aşağıdakı qərarı imzalamışdır:
"Azərbaycan K(b)P
MK-nın neft şöbəsinin müdiri barədə
Tahirova Tahirə Əkbər
qızı, 1939-cu ildən partiya üzvü, partiya bileti N
3320181, Kuybışev adına Azərbaycan Neft Elmi-Tədqiqat
İnstitutunun direktoru vəzifəsindən azad edilməklə,
Azərbaycan K(b)P MK-nın Neft şöbəsinin direktoru təsdiq
olunsun.
ÜİK(b)P MK-dan bu
qərarın təsdiq olunması xahiş edilsin.
Azərbaycan K(b)P MK
katibi M.C.Bağırov 20 mart 1942-ci il."
Daha sonra Tahirə
xanım Azərbaycan K(b)P MK katibinin neft üzrə müavini
vəzifəsinə irəli çəkilmişdir. Mir Cəfər
Bağırovun təşəbbüsü ilə 1936-cı
ildə Lenin ordeni ilə təltif olunmuş Azərbaycan
qadını müharibə illərində rəşadətli
əməyinə görə də
mükafatlandırılmışdır. 1944-cü ildə
Qırmızı Əmək Bayrağı, 1946-cı ildə
"Şərəf nişanı" ordenləri ilə təltif
edilmişdir. Gecə-gündüz istirahət bilmədən
çalışmış yorulmaz insan 1946-cı ilin
yazında xəstəliyə düçar olmuş, xəstəxanada
yatmışdır. Mir Cəfər Bağırov Tahirə
Tahirovaya ən yüksək səviyyədə qayğı
göstərmişdir. Arxiv sənədi ilə tanış
olun:
"Azərbaycan K(b)P
MK Bürosunun 1946-cı il 5 iyul tarixli 517 nömrəli
protokolundan
Çıxarış
Azərbaycan K(b)P MK
katibinin müavini T.Tahirova yoldaşa xəstəliyi ilə əlaqədar
1946-cı il iyul ayının 10-dan növbəti məzuniyyət
verilsin.
Azərbaycan K(b)P MK
maliyyə-təsərrüfat bölməsinə
tapşırılsın ki, həkim komissiyasının rəyinə
müvafiq olaraq T.Tahirova yoldaşı sanatoriyaya putyovka ilə
təmin etsin və ona aylıq maaşı həcmində vəsait
ayırsın.
Azərbaycan K(b)P MK
katibi M.C.Bağırov."
Sağlamlığını
bərpa edərək Bakıya qayıtmış Azərbaycan
xanımı 1946-cı ilin noyabrında eyni zamanda Bakı
Partiya Komitəsinin katibi olan M.C.Bağırovun təklifi ilə
yeni fəaliyyət meydanına - Bakı Partiya Komitəsinin
kadrlar üzrə katibi vəzifəsində
çalışmağa göndərilmişdir. Azərbaycanlı
qadına kadr işinin həvalə edilməsi millətimizin
Bakı düşmənlərinin daşnak cildli xadimlərin
qəzəbinə gəlmişdir. 1949-cu il fevralın 3-də
Azərbaycan K(b)P Bakı Komitəsinin Büro iclasında
"T.Ə.Tahirova və A.S.Bayramov yolaşların partiyaya
zidd davranışı barədə" məsələ
müzakirə edilmiş və qərar qəbul edilmişdir.
Qərarda oxuyuruq:
"Müəyyən
edildiyi kimi, Azərbaycan K(b)P XVII qurultayı vaxtı (qurultay
1949-cu il yanvarın 25-28-də Bakıda keçirilmişdir -
T.Q.) gizli səsverməyə verilmiş namizədlərin
siyahısının araşdırılması zamanı Azərbaycan
K(b)P Bakı Plenumu üzvlüyünə gizli səsverməyə
verilmiş siyahının araşdırılması zamanı
müəyyən edilmişdir ki, Bakı şəhər
Partiya Komitəsinin katibi Tahirova yoldaş və onun əri, Azərbaycan
SSR Siyasi və Elmi Bilikləri Yayan Cəmiyyətin məsul
katibi Bayramov yoldaş 1948-ci ilin yayında Dəstəfur
rayonunda istirahətdə olarkən, dini adətlərə riayət
edərək oğullarını sünnət etmişlər.
Azərbaycan K(b)P
Bakı Komitəsi bürosu Tahirova və Bayramov
yoldaşların davranışını partiya üzvünə
yaraşmayan hərəkət kimi qiymətləndirir və T.Ə.Tahirova
yoldaşın rəhbər partiya işindən kənarlaşdırılmasını
Azərbaycan KP MK-dan xahiş edir."
Azərbaycan K(b)P
MK-nın birinci katibi "BK" katibi səlahiyyətindən
istifadə edərək qərara aşağıdakı bəndi
əlavə etmişdir: "Qeyri-partiyalı
davranışı ilə T.Tahirova yoldaş ÜİK(b)P
sıralarından çıxarılmaq cəzasına layiqdir.
Lakin T.Tahirova yoldaşın partiya sıralarında olduğu
müddətdə heç bir partiya cəzası
almadığını, əksinə, ona tapşırılan
işin öhdəsindən ləyaqətlə gəldiyini,
xüsusən Böyük Vətən müharibəsi illərində
cəbhənin fasiləsiz olaraq yanacaqla təchizatında
böyük əməyini və gələcəkdə belə
hallara yol verməyəcəyi vədini nəzərə
alaraq, Tahirə Əkbər qızı Tahirova yoldaşa
töhmət elan olunsun".
Bir ildən sonra isə
M.C.Bağırova Bakı Partiya Komitəsi Bürosunun
aşağıdakı qərarı
çatdırılmışdır:
"Azərbaycan K(b)P
Bakı Komitəsi qərara alır:
T.Ə.Tahirova
yoldaşın yol verdiyi səhvini dərindən dərk
etdiyini, hazırda şərəflə və vicdanla işlədiyini,
ictimai-siyasi həyatda fəal iştirak etdiyini nəzərə
alaraq, 1949-cu il fevralın 11-də Azərbaycan K(b)P Bakı
Komitəsi Bürosu tərəfindən ona verilmiş töhmət
üzərindən götürülsün.
Azərbaycan K(b)P
Bakı Komitəsinin katibi A.İ.Malyutin
11 fevral 1950-ci il."
Anasının töhməti
ləğv olunanda gələcəyin riyaziyyatçı alimi
"balaca Rauf kişi" ikinci sinifdə oxuyurdu. Əlaçı
şagirdin valideynləri bilmirdilər ki, respublikanın
kişi rəhbərinin iki oğlu - Cahangir və Cen də
birinci sinfə "balaca kişi" kimi getmişdilər. Fərq
bunda olmuşdur ki, Cahangirin "balaca toyundan" Qubada ancaq
M.C.Bağırovun bacıları Seyid Məsumə və Seyid
Fatimə, Cenin "əməliyyatı"ndan isə
yalnız atası Mir Cəfər xəbərdar olmuşdu.
1948-ci ildə Dəstəfurda Tahirə Tahirovanın və
Abdulla Bayramovun yeganə oğlunun balaca toyunun sədası isə
Kremlə çatmışdı...
Tahirə Tahirova
1983-cü ildə Azərbaycan SSR Xarici İşlər naziri vəzifəsindən
təqaüdə göndərilənədək məsul
işlərdə çalışmışdır. SSRİ
Parlametinin deputatı dünyanın bir çox ölkələrində
- İsveçrədə, Belçikada, Çexoslovakiyada,
ABŞ-da, Türkiyədə, Hindistanda, Əfqanıstanda,
Birmada, Tunisdə, Əlcəzairdə, Bolqarıstanda və
digər ölkələrdə respublikamızı təmsil
etmişdir. Arxivdə rəhmətliyin Azərbaycan Nazirlər
Soveti sədrinin müavini vəzifəsində işləyərkən
1967-ci il dekabrın 2-də Azərbaycan KP MK-nın birinci
katibi Vəli Axundova ünvanladığı bir məktub da
saxlanılır. Burada oxuyuruq: "1967-ci il iyun ayının
20-də Moskvada Azərbaycan SSR mədəniyyət günlərinin
açılışında nümayəndə heyətimizə
SSRİ Xalq Təsərrüfatı Nailiyyətləri Sərgisinin
Xatirə Qızıl medalı təqdim olunmuşdur. Göstərilən
medalın həmişəlik olaraq Azərbaycan tarixi muzeyində
saxlanılmasını məqsədəuyğun hesab edirəm.
Xahiş edirik, göstəriş
verəsiniz.
İmza: T.Tahirova".
Arxiv materialları
göstərir ki, altmışıncı illərdə Azərbaycan
Nazirlər Soveti yanında Arxiv İdarəsi tərəfindən
həyata keçirilən bir sıra tədbirlərdə
Tahirə xanım da yaxından iştirak etmişdir. Belə tədbirlərdən
biri - respublika arxivlərinin işinə baxış təşkil
olunması barədə Azərbaycan Respublikası Dövlət
Arxivində müvafiq sənədlər saxlanılır.
1961-ci il may ayının 10-da M.Şəkinski Azərbaycan KP
MK Təbliğat və Təşviqat Şöbəsinin
müdiri Məmməd Qazıyev yoldaşa
aşağıdakı məktubu göndərmişdir:
"Azərbaycan KP MK
katibi T.M.Tağıyev yoldaşın göstərişinə
uyğun olaraq, arxiv işinə baxışa
hazırlığın qeyri-qənaətbəxş olduğu
müəssisələrin siyahısını lazımi tədbir
görülməsi məqsədilə Sizə göndərirəm.
Azərbaycan SSR Nazirlər
Sovetinin 1961-ci il 5 may tarixli 388 nömrəli qərarı ilə
arxivlərin işinə baxışın müddəti
1961-ci il avqustun 1-dək uzadılmışdır.
M.Şəkinski".
(ardı var)
Teyyub Qurban
Ekspress.- 2011.- 12-14 noyabr.- S. 15.