"Mərakeş telekanalları Azərbaycan haqda proqramlar yayımlayacaq

 

Mədəniyyət və turizm naziri Əbülfəs Qarayev Mərakeşin xarici əlaqələr üzrə dövlət katibi Lətifə Axerbaşın rəhbərlik etdiyi nümayəndə heyətini qəbul edib. APA-nın məlumatına görə, görüş zamanı həm ikitərəfli, həm də beynəlxalq təşkilatlar çərçivəsində mədəniyyət və turizm sahəsində əməkdaşlıq məsələləri müzakirə olunub.

Ə.Qarayev Mərakeş tərəfini BMT Təhlükəsizlik Şurasına üzv seçilməsi münasibətilə təbrik edib.

Nazir Azərbaycanda Mərakeş Mədəniyyət Günlərinin yüksək səviyyədə keçməsi və Mərakeş mədəniyyət naziri Ben Salem Himmişin rəhbərlik etdiyi nümayəndə heyətinin ölkəmizə səfərinin nəticələri barədə qonağa məlumat verib.

Qeyd edib ki, növbəti ildən etibarən hər iki ölkədə qarşılıqlı mədəniyyət günlərinin keçirilməsi üçün razılıq əldə olunub.

Lətifə Axerbaş da ölkələrimiz arasında olan əməkdaşlığı yüksək qiymətləndirib, Azərbaycanın da BMT Təhlükəsizlik Şurasına üzv seçilməsinin müsbət hal olduğunu deyib.

Görüş zamanı Mərakeşin müvafiq turizm təhsil müəssisəsi ilə Azərbaycan Turizm İnstitutu arasında əməkdaşlıq, tələbə mübadiləsi, azərbaycanlı tələbələr üçün Mərakeşdə təqaüd proqramlarının açılması, Mərakeş turizm şirkətləri ilə yerli şirkətlər arasında əməkdaşlıq və qarşılıqlı tanışlıq səfərlərinin təşkil olunması, Mərakeş televiziya kanallarında Azərbaycan haqqında proqramların nümayişi, habelə digər layihələr müzakirə olunub. Müzakirələr zamanı, həmçinin, muzey işi, xalq tətbiqi sənəti, əl işləri, abidələrin bərpası sahəsində də fikir mübadiləsi aparılıb.

 

 

Ekspress.- 2011.- 18 noyabr.- S. 14.