"Teleskop"(l)a növbəti
baxış
Azərbaycan Dövlət
Akademik Milli Dram Teatrında xalq yazıçısı
Elçinin "Teleskop" tragikomediyası əsasında
hazırlanmış ikihissəli eyniadlı tamaşa
nümayiş etdirilib. APA-nın məlumatına görə,
tamaşanın quruluşçu rejissoru, Finlandiyada yaşayan
azərbaycanlı Kamran Şahmərdan, quruluşçu rəssamı
məşhur səhnə tərtibatçısı Eduard
Koçerg, geyim rəssamı Anna Koçergina, musiqi tərtibatçısı
Həmid Kazımzadədir.
Tamaşada baş rolda
aktyor Füzuli Hüseynov və aktrisa İlahə Həsənova
çıxış edir.
Digər rolları
Ramiz Novruz, Sabir Məmmədov, Əli Nur, Əjdər Həmidov,
Sevinc Əliyeva, Elşən Cəbrayılov, Məsmə
Aslanqızı və başqaları canlandırırlar.
Tamaşada rollar
üç hissəyə bölünür - mələklər,
ruhlar və insanlar. Rejissor tamaşada ruhlar aləmi ilə
insan aləmini üz-üzə qoyur.
Səhnə əsərində
komaya düşən baş rol ifaçısı Füzuli
Hüseynov ruhlar aləminə düşür və teleskop
vasitəsilə yaşadığı mühiti, ailə
üzvləri və yaxınlarını izləyir,
özü haqda düşüncələrini öyrənir. Övladları,
ikinci həyat yoldaşı, qayınanası, yaxın dostu və
həkimi tərəfindən sevilmədiyini görən qəhrəman
ruhlar aləmindən ayrılmamaq üçün komadan
ayılmaq istəmir.
İlahə Həsənova
tamaşada F.Hüseynovun birinci həyat yoldaşı
obrazında çıxış edir. Bir-birindən ayrılan
iki insan məhz ruhlar aləmində uzun illərdən sonra
qarşılaşanda, bir-birilərinə böyük sevgi bəslədiklərini
anlayırlar. Tamaşanın sonunda izləyiciyə iki sonluq təqdim
edilir: teleskopsuz, hər şeydən xəbərsiz komadan
ayılan, yaxınlarını görən, şad olan,
yaşadığına sevinən insan və komadan ayılan,
bütün həqiqətləri bilən, yenidən ruhlar aləminə
qayıtmaq üçün intihar edən insan...
Qeyd edək ki,
tamaşada narahatlıq doğuran bəzi məqamlar diqqətdən
yayınmayıb. Belə ki, tamaşaya az sayda teatrsevər gəlib.
Onların əksəriyyəti isə Azərbaycan Dövlət
Mədəniyyət və İncəsənət Universitetinin
tələbələri olub. Eyni zamanda, iradlara baxmayaraq, izləyicilərin
tamaşa zamanı mobil telefonlarının səsini
almamaları, telefonla danışmaları, tamaşa gedə-gedə
zalı tərk etmələri da narazılıq doğurub.
Bundan başqa, aktyorlar
da ifalarında müəyyən xətalara yol veriblər. Bəzi
aktyorlar tamaşa zamanı sözləri unudub, bəziləri
isə tez-tez çaşıblar.
Sevindirici məqam isə
sona qalmış tamaşaçıların aktyorları ayaq
üstə alqışlaması olub.
Ekspress.- 2011.- 18 noyabr.- S. 23.