Sevil Xəlilova dünyasını dəyişdi

Azərbaycan Dövlət Akademik Milli Dram Teatrının aktrisası, əməkdar artist Sevil Xəlilova dünyasını dəyişib. Aktrisa noyabrın 28-də, saat 18 radələrində 58 yaşında vəfat edib.

Teatrın truppa müdiri Elnur Məmmədovun APA-ya verdiyi məlumata görə, aktrisanın ölüm səbəbi hələlik dəqiq məlum deyil: "İki gün əvvəl Sevil xanımla telefonla danışmışdım. Dedi ki, "qızdırmam var, sabah görüşərik". Guya bu gün (dünən -red.) onunla görüşməliydik. Dünən axşam zəng vurdular ki, Sevil xanım dünyasını dəyişib. Yəqin ki, səbəb ürək çatışmazlığıdır".

Sevil Xəlilova ilə vida mərasimi dünən yaşadığı mənzildə keçirilib. Mərasimdə aktrisanın yaxın qohumları, eləcə də uzun illər çalışdığı Akademik Milli Dram Teatrının rəhbərliyi, aktyor və aktrisalar iştirak ediblər (APA).

Aktrisanın yeganə övladı olan qızı anasının cənazəsi başında etiraz səsini ucaldıb: "Neynəyirəm indi gəlməyinizi, şəkil çəkməyinizi? Sənin belə də şəklin çəkiləcəkdi? Axı sən buna layiq deyildin, ana..."

Aktrisanın ən yaxın rəfiqələrindən biri olan xalq artisti Nuriyyə Əhmədova da onun ölümü ilə barışmadığını deyib: "Əziz bacım içini yeyə-yeyə getdi. Bütün dərdini, sərini öz içində apardı. Heç kim onun nə yaşadığını bilmədi. Buna inana bilmirəm".

Akademik Milli Dram Teatrının direktoru İsrafil İsrafilov mərhum Sevil Xəlilovanı hələ tələbəlik illərindən tanıdığını deyib: "İstər həyatı, istər fəaliyyəti mənim gözümün qabağında olub. O, çox özünəməxsus istedad sahibi idi. Sevil xanım sadə həyatı, sadə davranışı ilə hər zaman hörmət sahibi olub. Heç vaxt özünü gözə soxmazdı. Hələ heç kim Sevil xanımın zəif, uğursuz rolunu görməmişdi. Onun hələ ən yaxşı rolları qabaqda idi. Xəstəliyi var idi, onu incidirdi. Fiziki çətinliyi var idi. Bütün bunlara baxmayaraq, o, çox böyük fədakarlığı ilə sənətindən yapışmışdı. Hələ oynamaq istədiyi çox rollar var idi".

Teatr rəhbəri Sevil Xəlilovanın cənazəsinin teatrdan deyil, evindən götürülməsinə də münasibət bildirib və bu halı müsbət qarşıladığını vurğulayıb: "Bu günə kimi də çoxsaylı aktyorlar Sevil Xəlilovanın evini tanımırdı. Məgər pis haldır ki, onun evini tanıdılar? Sözsüz ki, hər bir insan son mənzilə öz evindən yola salınmalıdır və bu, yaxşı haldır".

Xalq artisti Ramiz Novruzov vaxtsız dünyasını dəyişən Sevil Xəlilova ilə bağlı xatirələrini bölüşüb: "Sevil xanım bizim çox sevdiyimiz sənət adamlarından biri idi. O, həqiqətən də əsl sənət adamı idi. Başqa xisləti yox idi. Son dəfə onunla "Ölüləri qəbiristanlıqda basdırın" tamaşasında birgə işlədik. Həmin tamaşada tənha qalmış bir qadın obrazını oynayırdı. Tamaşalarda çox az istifadə olundu, əslində, çox potensialı, imkanı olan bir aktrisa idi. Çox böyük rollar oynamağa qadir aktrisa idi".

Mərhum aktrisa ilə Adil İsgəndərovun kursunda oxuyan aktyor Kazım Abdullayev də Sevil Xəlilovanı tələbəlik illərindən tanıdığını vurğulayıb: "Biz onunla birgə bir kursda oxumuşuq və Adil müəllimin tələbələri olmuşuq. Çox gözəl, mehriban insan idi. Gözləmədiyimiz halda dünyasını dəyişdi. Sonuncu dəfə "Qarabağnamə" tamaşasında birgə oynamışıq. Onun çox arzuları var idi, nə qədər rollar oynamaq istəyirdi, amma qismət olmadı..."

Rejissor Rövşən Almuradlı aktrisanı sonuncu görənlərdən biri olub: "Bütün kollektiv kimi, mən də onun ölümünə inanmıram. Sevil çox kövrək, səbirli, əxlaqlı xanım idi. Teatrda, kinoda, sənətdə əxlaqını qoruyub saxlayırdı, səmimiyyəti ilə seçilirdi. Sözün əsil mənasında teatr Sevili itirdi. Zamanmı, mühitmi imkan vermədi? Əslində, çox səbəbləri var. O, teatrda xanım adını daşımağa layiq insan idi".

Elə vida mərasimində yaxınlarından öyrəndik ki, aktrisanın ölümündən əvvəl yüksək temperaturu olub, hətta mərhum iki gecə yuxusuz qalıb...

Əməkdar artist Sevil Xəlilova Novxanı qəbiristanlığında valideynlərinin yanında torpağa tapşırılıb.

Allah rəhmət eləsin!

Sevil Rza qızı Xəlilova 1953-cü il yanvarın 10-da Bakıda anadan olub. C.Cabbarlı adına "Azərbaycanfilm" kinostudiyası nəzdindəki "Kino aktyoru" kursunun axşam şöbəsində (1969-1970) oxuyub, 1970-ci ildə Mirzağa Əliyev adına Azərbaycan Dövlət İncəsənət İnstitutunun kino aktyorluğu fakültəsinə daxil olub. Hələ tələbə ikən Akademik Milli Dram Teatrında N.Hikmətin "Şöhrət və ya unudulan adam" psixoloji dramında professorun qızı rolunu ifa edib.

Aktrisa 1974-cü ildən təyinatla Akademik Milli Dram Teatrında işləməyə göndərilib. Ötən illər ərzində milli və dünya klassiklərinin, müasir Azərbaycan və əcnəbi dramaturqların əsərlərinin tamaşalarında oynayıb.

S.Dağlının "Kölgələr pıçıldaşır" tamaşasında Çeşmə, Anarın "Şəhərin yay günləri" tamaşasında Qumru, C.Məmmədquluzadənin "Dəli yığıncağı" tamaşasında Zəvvar, S.Rəhmanın "Əliqulu evlənir" tamaşasında Humay, B.Vahabzadənin "Kimdir haqlı?" tamaşasında Məlahət, İ.Əfəndiyevin "Büllur sarayda" tamaşasında Səadət, Anarın "Təhminə və Zaur" tamaşasında Mədinə, B. Brextin "Üç quruşluq opera" tamaşasında Kitti, S.Rəhmanın "Nişanlı qız" tamaşasında Zərifə, S.Vurğunun "Vaqif" tamaşasında Gülnar, J.Rasinin "Fedra" tamaşasında Enona, Elçinin "Poçt şöbəsində xəyal" tamaşasında Züleyxa, Ə.Əmirlinin "Köhnə ev" tamaşasında Mələk, X.Qocanın "Hərənin öz payı" tamaşasında Xədicə xala, H.Cavidin "Afət" tamaşasında İlçay, Mir Cəlalın "Dirilən adam" tamaşasında Telli, C.Məmmədquluzadənin "Ölülər" tamaşasında Məşədi Orucun anası, İ.Şıxlının "Ölüləri qəbiristanlıqda basdırın" tamaşasında Güləndam, A.Şaiqin "Eloğlu" tamaşasında Cəvahir xanım rollarını oynayıb. Aktrisa Azərbaycan Dövlət Televiziyasının hazırladığı tamaşalarda da maraqlı obrazlar yaradıb. Bunlardan İ.Əfəndiyevin "Atayevlər ailəsində" Mehrican, M.F.Axundovun "Hacı Qara"sında Sona, Ə.Məmmədxanlının "Şərqin səhəri"ndə Nataşa, A.Məmmədovun "Kişilər"ində Səlimə, R.Kaşkauasın "Yağışlı gecə"sində Auşra, Anarın "Ötən ilin son gecəsi"ndə Gülarə, R.Qasımovanın "Yollar görüşəndə"sində Rahidə, A.Qəhrəmanovun "Müsabiqə"sində Sevinc və digər obrazları qeyd etmək olar.

Sevil Xəlilova teatr sənətindəki xidmətlərinə görə 1986-cı il iyun ayının 23-də Naxçıvan Muxtar Respublikasının əməkdar artisti, 24 dekabr 2002-ci ildə isə Azərbaycan Respublikasının əməkdar artisti fəxri adına layiq görülüb.

Ekspress.- 2011.- 30 noyabr.- S. 23.