Milli bəzək əşyalarımıza xaricilər daha çox maraq göstərir

Könül Allahverdiyeva: "Milli üslubda əşyaların, geyimlərin dünya bazarına çıxarılması mədəniyyətimizin daha da tanınmasında böyük rol oynayar"

Zamanın dəyişkənliyinə olan tələbi, müasirlik milli geyimlərimizin, naxışlarımızın, yalnız bizim xalqa məxsus əşyaların, həyat tərzinin, hətta davranışın getdikcə gündəlik həyatdan uzaqlaşmasına gətirib çıxarıb. Buna baxmayaraq, çoxları milliliyi qoruyub saxlamağa can atır. Könül Allahverdiyeva da məhz yalnız məhz millətimizə xas xüsusiyyətlər həyata daha da rəng qatan, parlaqlığı ilə bəzəyən müxtəlif əşyalar, çantalar, xalçalar, zinət əşyaları düzəltməyə ruhlandırır.

Onunla sərgidə tanış olduq. Yaratdığı gözəlliyə tamaşa etmək üçün hamı onun ətrafına toplaşmışdı. Dediyinə görə, əl işlərinə hələ uşaqlıqdan həvəsi olsa da, valideynləri dərslərindən ayrılmasın deyə, ona sevimli işi ilə məşğul olmağa icazə verməyiblər. "Ona görə də əl işləri ilə ailə qurduqdan sonra ciddi məşğul olmağa başladım. Artıq təhsilimi də başa vurmuşdum. Asudə vaxtımı bəzək əşyaları düzəltməyə, xalça toxumağa sərf etməyə başladım. Bəzək əşyalarını düzəldərkən də milli xalçalarımızın naxış və rənglərindən istifadə edirəm".

K.Allahverdiyevanın sözlərinə görə, bəzək əşyalarını düzəldərkən firuzəyi rəngə üstünlük versə də, bəzəklər arasında yaşıl, qırmızı, sarı rənglər də yer alır. "2008-ci ildən başlayaraq sərgilərdə iştirak edirəm. İl ərzində təxminən 10 sərgidə oluram. Sərgilərin yaradıcılıq üçün çox xeyri olur. Bəzən elə əl işim olur ki, onu yarımçıq qoyuram. Lakin sərgidə nümayiş olunsun deyə əl işlərini daha həvəslə və sürətlə hazırlayır, hər bir sərgiyə imtahan kimi hazırlaşıram".

Müsahibim deyir ki, əl işlərinin düzəldilməsi diqqət və həvəs tələb edir. Özü bəzək əşyaları düzəltsə də, onlardan istifadə etməyib. "Amma bir növ dəb halına gətirmək, insanların gözü öyrəşsin deyə düzəltdiyim müxtəlif milli üslubda hazırlanan boyunbağıları və başqa zinət əşyalarını taxmağa başladım. Misal üçün, bir neçə il əvvəl insanlar küçələrdə araqçın geyinib gəzməyə utanırdılar. Lakin tədricən bir-iki nəfərin araqçın taxıb gəzdiyini görəndən sonra, başqaları da bundan istifadə etməyə başladılar".

Onun sözlərinə görə, evdə də milli üslubda toxunan xalçalardan istifadə daha məqsədəuyğundur. K.Allahverdiyeva hesab edir ki, belə xalçalar evə gözəllik gətirməklə yanaşı, insanı da müsbət tərəfə doğru dəyişir. "Hiss edirsən ki, bu xalçalarda insanın əlinin istisi var. Sintetik müasir tipli xalçalar isə hətta revmatizmin inkişafına da gətirib çıxarır. Milliliyi unutmaq olmaz. Milliliyi unudursansa, onun əvəzini mütləq görəcəksən. İnsan doğulanda hansı millətdən olduğunu bilmir. Bunu anlamaq üçün müəyyən yetkinliyə çatmalıdır. İnsan özünü, milliətini anlayandan sonra, istər-istəməz özünə sual verir ki, məndə milliliyimi əks etdirən nəyim var? Niyə xalqımız xalçaçılığı sevib? Xalçaya gözəllik verən bütün bu naxışlar nə deməkdir? Bunları daha yaxşı başa düşmək üçün gərək o əşyaların içində yaşayasan, milli üslubda olan əşyalarla özünü əhatə edəsən".

Həmsöhbətimə görə, xarici ölkələrdən gələn qonaqlar milli üslubda hazırlanan əşyalarla, geyimlərlə daha çox maraqlanırlar: "Əl işlərinə demək olar ki, hamıda maraq var. Yerli alıcılarımız nədənsə müasir üslubda olan əl işlərinə meyllidirlər".

Onun dediyinə görə, milli üslubda əşyaların, geyimlərin kütləvi şəkildə hazırlanaraq dünya bazarına çıxarılması mədəniyyətimizin daha da tanınmasında böyük rol oynayar. 'Təəssüf olsun ki, bu sahədə böyük bir uçurum var. Hətta milli üslubda olan əl işlərinin hazırlanmasına həsr olunan saytlar da demək olar ki, yox dərəcəsindədir. Hal-hazırda belə saytın hazırlanması üzərində çalışıram".

Aynurə Məmmədova

Ekspress.- 2011.- 14 oktyabr.- S. 8.