Üzeyir Hacıbəyli Festivalı başladı

 

Sentyabrın 18-də Azərbaycan Dövlət Filarmoniyasında Üzeyir Hacıbəyli III Beynəlxalq Musiqi Festivalının təntənəli açılış mərasimi olub. Hər il olduğu kimi, bu il də dahi bəstəkar Üzeyir Hacıbəylinin doğum günü təntənəli şəkildə qeyd edilib. Üzeyir Musiqi Günü Fəxri Xiyabanı ziyarətlə başlayıb. İlk olaraq mərhum prezident Heydər Əliyev və akademik Zərifə Əliyevanın məzarları ziyarət olunub. Daha sonra dahi bəstəkar Üzeyir Hacıbəylinin qəbirüstü abidəsinə gül dəstələri qoyublar.

Mədəniyyət və turizm naziri Əbülfəs Qarayev artıq bir neçə ildir bu günün təntənə ilə qeyd olunduğunu bildirib. Azərbaycan musiqisinin inkişafında Ü.Hacıbəylinin böyük xidmətləri olduğunu deyən nazir bu böyük insanın xatirəsinin heç vaxt unudulmayacağını vurğulayıb.

Bəstəkara ehtiram əlaməti olaraq Üzeyir Hacıbəylinin "Leyli və Məcnun" operasından kompozisiya səslənib.

Tədbir iştirakçıları Müslüm Maqomayev, Rəşid Behbudov, Qara Qarayev, maestro Niyazi və digər mədəniyyət xadimlərinin də məzarını ziyarət ediblər.

Mərasim Üzeyir Hacıbəyli adına Bakı Musiqi Akademiyasının (BMA) qarşısında davam etdirilib.

Nazir Ə.Qarayev bu günü sadəcə musiqisevərlərin yox, həm də bütün Azərbaycan xalqının bayramı olduğunu deyib: "18 sentyabrın bayram kimi qeyd edilməsi ənənəsi Heydər Əliyevin 1995-ci ildə bəstəkarın anadan olmasının 110 illik yubileyi ərəfəsində imzaladığı sərəncamla qoyulub. Odur ki, hər il sentyabrın 18-i ölkəmizdə Üzeyir Musiqi Günü kimi qeyd olunur. Musiqi bayramında 3 ildir ki, Üzeyir Hacıbəylinin xatirəsinə həsr olunan beynəlxalq festival keçirilir".

Nazir qeyd edib ki, bu il də sentyabrın 18-dən etibarən Heydər Əliyev Fondunun dəstəyi ilə Azərbaycanda 3-cü Beynəlxalq Musiqi Festivalı başlayır. 12 gün davam edəcək bu tədbirdə dünyanın bir çox tanınmış musiqiçiləri iştirak edəcək.

Azərbaycan Bəstəkarlar İttifaqının sədri, xalq artisti Firəngiz Əlizadə məlumat verib ki, Heydər Əliyev Fondunun təşəbbüsü ilə "Üzeyir dünyası" layihəsi çərçivəsində "Ömür salnaməsi", "Üzeyir Hacıbəyli ensiklopediyası" kitabları, "Bədii və publisistik əsərləri", "Leyli və Məcnun", "Koroğlu" operaları, "O olmasın, bu olsun" musiqili komediyasının klavir, libretto və CD-ləri işıq üzü görüb.

BMA rektoru, xalq artisti Fərhad Bədəlbəyli də bu günün təkcə musiqiçilərin deyil, Azərbaycan xalqının bayramı olduğunu deyib: "Bu gün müqəddəs gündür. Üzeyir bəyin anadan olması xalqımız üçün böyük xoşbəxtlikdir. O, tanrının bizə bəxşidir. Üzeyir Hacıbəyli olmasaydı, sözsüz ki, Azərbaycan musiqisi belə inkişaf edə bilməzdi".

Tədbirdə xalq artisti Rauf Abdullayev, dirijor Yalçın Adıgözəlov və digərləri Üzeyir Hacıbəylinin çoxşaxəli yaradıcılığından danışıb, onun musiqimizin inkişafındakı xidmətlərinin əvəzsiz olduğunu deyiblər.

Mərasimdə Üzeyir Hacıbəyli adına Dövlət Simfonik Orkestri, Dövlət Xor Kapellası, Müdafiə Nazirliyinin Nümunəvi Hərbi Orkestrinin ifasında dahi bəstəkarın əsərlərindən parçalar səslənib.

 

Üzeyir Musiqi Günü bəstəkarın ev-muzeyindəki tədbirlə davam edib.

 

Muzeyin direktoru Sərdar Fərəcov çıxış edərək dahi bəstəkarın bütün zamanlarda öz təravətini qoruyub saxlayacaq ölməz əsərlərindən söhbət açıb.

Mədəniyyət və turizm nazirinin müavini Sevda Məmmədəliyeva Üzeyir bəyin yaradıcılığına nəzər salıb. Onun sözlərinə görə, Şərqin ilk operasının -"Leyli və Məcnun" əsərinin 100 illik yubileyi münasibətilə UNESCO-nun baş qərargahında təşkil edilmiş tamaşa Azərbaycan musiqisinin böyüklüyünü bütün dünyaya nümayiş etdirib.

 

Muzeydə "Üzeyir ömrü kitablarda" sərgisi də açılıb.

 

III Beynəlxalq Musiqi Festivalının açılış mərasimi isə Filarmoniyada olub. Azərbaycanın dövlət müstəqilliyinin bərpasının 20-ci ildönümünə həsr olunan festivalın açılışında çıxış edən mədəniyyət və turizm naziri Əbülfəs Qarayev Üzeyir Hacıbəylini Allahın Azərbaycan xalqına misilsiz bir töhfəsi olduğunu deyib. Nazir vurğulayıb ki, onun yaradıcı irsi təkcə öz xalqı üçün deyil, bütün bəşəriyyət üçün çox dəyərli mənəvi sərvətdir: "Zaman keçdikcə Üzeyir sənəti dünya xalqları tərəfindən daha çox sevilir, onun əsərləri heç bir sərhəd tanımır. Builki festivalın proqramı olduqca zəngindir. Festivalda Azərbaycanla yanaşı, Rusiya, Böyük Britaniya, ABŞ, Avstriya, Koreya Respublikası, Macarıstan, Almaniya və digər ölkələrdən görkəmli ifaçılar, musiqi kollektivləri iştirak edirlər".

Festivalın açılış mərasimində Elnarə Kərimovanın rəhbərlik etdiyi "Buta" kamera xorunun ifasında Ü.Hacıbəylinin, eləcə də yerli və xarici bəstəkarların əsərlərindən parçalar səslənib. "Buta"nın ilk ifasında Böyük Britaniya musiqişünası Conatan Ratbonenin aranjmanında Ü.Hacıbəylinin "Leyli və Məcnun" operasından xalq artist Alim Qasımov və əməkdar artist Fərqanə Qasımovanın solistliyi ilə bir parça ifa edilib.

"Buta" kamera xoru Mədəniyyət və Turizm Nazirliyinin təşəbbüsü ilə 2010-cu ilin noyabrında yaradılıb. Xorun əsas məqsədi Azərbaycan xor musiqisini və müxtəlif dövrlərə aid olan dünya musiqi nümunələrini milli və beynəlxalq festivallarda, müxtəlif tədbirlərdə ifa edib respublikamızı layiqincə təmsil etməkdir.

Qeyd edək ki, Üzeyir Hacıbəyli adına III Beynəlxalq Musiqi Festivalı Heydər Əliyev Fondunun dəstəyi və Mədəniyyət və Turizm Nazirliyinin təşkilatçılığı ilə keçirilir.

Festival sentyabrın 30-dək davam edəcək.

 

 

Ekspress.- 2011.- 20 sentyabr.- S. 23.