Əbülfəs Qarayev "Euronews"un rəhbərləri ilə görüşdü

Dünən mədəniyyət və turizm naziri Əbülfəs Qarayev "Euronews" telekanalının Bakıda səfərdə olan rəhbərləri ilə görüşüb. Nazirliyin mətbuat katibi Zöhrə Əliyevadan aldığımız məlumatda deyilir ki, nazir telekanalın Müşahidə Şurasının sədri Pyer Luici Malezani və telekanalın baş icraçı direktoru Filip Kayla ilə danışıqlar aparıb.

Görüş zamanı telekanalın 2011-ci ilin aprelində Bakıda keçirilməsi nəzərdə tutulan Dünya Mədəniyyətlərarası Dialoq Forumunun tərəfdaşı qismində çıxış etməsi, tədbirin telekanal vasitəsilə yayımlanması və təbliğinə dair müzakirələr aparılıb.

Telekanalın baş icraçı direktoru Filip Kay bu məsələlərə dair müsbət rəy bildirib.

Qeyd olunub ki, "Euronews" telekanalına Dünya Mədəniyyətlərarası Dialoq Forumu ilə bağlı "Tərəfdaşlıq təklifləri" göndərilib və hazırda həmin təkliflərin həyata keçirilməsi imkanları araşdırılır.

"Euronews" telekanalının nümayəndələri dünən, həmçinin, Heydər Əliyev Fondunda da olublar. Qonaqlara fondun məqsədi və fəaliyyəti barədə ətraflı məlumat verilib.

Sonda qonaqlar üçün Heydər Əliyevin həyat və fəaliyyətindən bəhs edən "Böyük ömrün anları" filmi nümayiş etdirilib.

AYXAN

Ekspress.- 2011.-15-17 yanvar.- S.20.