2011-ci il "Turizm ili"dir

 

    Prezident: Bu il Bakıda 5 beşulduzlu hotel açılacaq

 

    Prezident İlham Əliyevin sədrliyi ilə yanvarın 14-də Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclası keçirilib.

   AzərTAc xəbər verir ki, dövlət başçısı iclası giriş nitqi ilə açıb. İqtisadi inkişaf naziri Şahin Mustafayev, Mərkəzi Bankın sədri Elman Rüstəmov, mədəniyyət və turizm naziri Əbülfəs Qarayev, gənclər və idman naziri Azad Rəhimov rəhbərlik etdikləri qurumların il ərzində gördüyü işlər barədə məlumat veriblər. Daha sonra prezident İlham Əliyev iclasda yekun nitqi söyləyib.

   "Bütövlükdə deyə bilərəm ki, 2010-cu il ölkəmizin inkişafı üçün çox əhəmiyyətli il olmuşdur. 2010-cu ildə ölkə iqtisadiyyatı inkişaf etmişdir.Mən çox şadam ki, Azərbaycanda aparılan islahatlar və düzgün iqtisadi siyasət nəticəsində həm 2009-cu ildə, həm 2010-cu ildə ölkə iqtisadiyyatı inkişaf etmişdir. 2009-cu ildə ümumi daxili məhsul 9,3 faiz, keçən il isə iqtisadiyyatımız 5 faiz artmışdır. Əksər ölkələrdə həm 2009-cu, həm də 2010-cu ildə tənəzzül müşahidə olunduğunu nəzərə alsaq, əlbəttə ki, bizim uğurlarımızın əhəmiyyəti daha da artır",-deyə dövlət başçısı iclasın açılışındakı çıxışında bildirib.

            Ötən il makroiqtisadi vəziyyət sabit qalıb, inflyasiya cəmi 5,7 faiz təşkil edib, əhalinin pul gəlirləri isə 12,3 faiz artıb, gəlirlər inflyasiyanı üstələyib, sosial müdafiəyə dəyərli töhfələr verilib. Ölkədə yoxsulluğun səviyyəsi 9,1 faiz təşkil edib, 7 il ərzində Azərbaycanda yoxsulluq 4-5 dəfə aşağı düşüb.

   2010-cu ildə iqtisadiyyata 15,5 milyard dollar vəsait qoyulub, daxili investisiyalar xarici sərmayələri üstələyib.

   Qeyri-neft sektoruna qoyulan investisiyalar neft sektorundakından çoxdur. 15,5 milyard dollardan 9,3 milyard dolları qeyri-neft sektoruna qoyulan sərmayədir.

   Ötən il bütün sosial proqramlar uğurla icra edilib, minimum əmək haqqı və pensiyanın baza hissəsi artırılıb, 550 min nəfər ünvanlı sosial yardım alıb, 40-dan çox tibb müəssisəsi, 70-dən çox məktəb, 5 olimpiya mərkəzi, mədəniyyət ocaqları və digər sosial infrastruktur obyektləri tikilib və təmir edilib.

   İnvestisiya proqramında sosial yönümlü layihələrin icrasının 2011-ci ildə də davam etdiriləcəyini deyən prezident ötən il 70 mindən çox yeni iş yerinin açıldığını, onlardan 53 mininin daimi olduğunu bildirib. Regionların Sosial İqtisadi İnkişafı Dövlət Proqramının icrasına başlanandan - 2004-cü ilin fevralından bu günə qədər ölkədə 900 mindən çox yeni iş yeri açılıb.

   2010-ci ildə ölkədə 51 milyon ton neft, 27 milyard kubmetr qaz hasil edilib. Bu il qaz hasilatı və ixracı daha da artacaq.

   "Bizim uğurlu inkişafımız gələcək illərdə də davam edəcək" deyən İlham Əliyev ötən il ölkədə baş verən təbii fəlakətin fəsadlarının uğurla aradan qaldırıldığını, evlərini itirən vətəndaşların yeni mənzillərlə təmin edildiyini deyib. Bildirib ki, 3000-dən çox ev təmir edilib, 1500 ev yenidən tikilib, hazırda 700-800 evin tikintisi davam etdirilir. "Bunu etmək üçün isə güclü iqtisadi potensial lazımdır" deyən prezident Azərbaycanın valyuta ehtiyatlarının artıq 29,4 milyard dollara çatdığını diqqətə çatdırıb.

   2010-cu ildə Dağlıq Qarabağ münaqişəsinin həllində irəliləyişə nail olunmadığını deyən dövlət başçısı vurğulayıb ki, buna səbəb Ermənistanın əvvəlcə razılaşdırılmış məsələlərə yenidən qayıtması, vaxtı uzatmaq və işğal etdiyi torpaqları azad etmək niyyətində olmamasıdır.

   "Azərbaycan vətəndaşları Dağlıq Qarabağa qayıtmalıdırlar" deyən İlham Əliyev 2010-cu ildə beynəlxalq təşkilatlarda münaqişə ilə bağlı Azərbaycanın mövqeyinin daha da möhkəmləndiyini vurğulayıb. O bildirib ki, Azərbaycan danışıqlar prosesində konstruktivlik nümayiş etdirir və ölkənin ərazi bütövlüyünün bərpası qeyd-şərtsiz yerinə yetirilməlidir.

   Dövlət başçısı ölkədə ordu quruculuğu istiqamətində işlərin davam etdirildiyini, bu sahəyə ayrılan vəsaitin artırıldığını, yeni texnika və silahların alındığını, 2011-ci ildə orduya ayrılan xərclərin 3 milyard dollardan çox olacağını deyib.

   Prezident 2011-ci ildə qarşıda duran vəzifələrdən danışarkən vurğulayıb ki, makroiqtisadi sabitlik qorunmalıdır":Əminəm ki, inflyasiya birrəqəmli olacaqdır. Biz xüsusilə istehlak bazarına nəzarətimizi gücləndirməliyik. Bu sahədə böyük işlər görülüb və davam etdirilməlidir. Qiymətlərin süni şəkildə şişirdilməsinə yol verməməliyik, azad rəqabəti təmin etməliyik, inhisarçılıq meyllərinin qarşısını almalıyıq. Lazımsız yoxlamalar aparılmamalıdır, xüsusilə hüquq mühafizə orqanları tərəfindən lazımsız yoxlamalara son qoyulmalıdır ki, ölkədə sahibkarlığı daha da sürətlə inkişaf etdirək, buna daha böyük təkan verək".

   Sahibkarlara kreditlərin verilməsi davam etdirilməli və bu sahədə əlavə tədbirlər görülməlidir. Dövlət başçısı bəyan edib ki, bu il kənd təsərrüfatının stimullaşdırılması, ərzaq təhlükəsizliyinin təmin olunması, taxıl istehsalının artırılması, böyük fermer təsərrüfatlarının yaradılması ilə bağlı əlavə tədbirlər davam etdirilməlidir.

   İlham Əliyev 2011-ci ildə informasiya-kommunikasiya texnologiyalarının tətbiqi ilə bağlı işlərin davam etdirilməsi, ölkədə kosmik sənayenin yaradılması istiqamətində tədbirlərin görülməsi, orduya ayrılan xərclərin artırılması, müdafiə sənayesi sahəsində yeni müəssisələrin yaradılması ilə bağlı da tapşırıqlarını verib. Ölkədə quruculuq işləri davam etdirilməli, Bayraq Meydanının ətrafında abadlıq işləri bu il başa çatdırılmalı, dəniz kənarında yerləşən sənaye zonası ordan çıxarılmalıdır.

   Dövlət başçısı qeyd edib ki, elə etmək lazımdır ki, ticarət, məişət, iaşə obyektlərində nağd şəkildə ödəmələr minimuma endirilsin, kredit kartlarına üstünlük verilsin.

   Biznes mühitinin yaxşılaşdırılması üçün əlavə tədbirlər görülməli, bürokratik əngəllər aradan qaldırılmalı, rüşvətxorluğa və korrupsiyaya qarşı mübarizə daha da ciddi aparılmalı, ictimai nəzarət gücləndirilməlidir. Neft Fondundan transfertlərin yalnız investisiya yönümlü layihələrə sərf olunmasına çalışılmalıdır.

   Dövlət başçısı 2011-ci ili "Turizm ili" elan edilməsi təşəbbüsünü irəli sürüb. Bu il Bakıda 5 beşulduzlu hotelin açılacağını deyən prezident "bu, dünyada analoqu olmayan bir hadisədir ki, bir ildə bir şəhərdə 5 beşulduzlu mehmanxana açılacaq",-deyə prezident bildirib.

  

 

   A.Xəlil

 

   Ekspress.- 2011.- 15-17 yanvar.- S. 2.