"Tarixə çevrilmiş şəkillər"

İstiqlal Muzeyində 20 Yanvar faciəsinin ildönümü ilə bağlı sərgi keçirilib

Dünən Azərbaycan İstiqlal Muzeyinin ekspozisiyasında 20 Yanvar faciəsinin 21-ci ildönümü ilə əlaqədar "Tarixə çevrilmiş şəkillər" adlı tədbir-sərgi keçirilib.

APA-nın məlumatına görə, sərgidə ilk dəfə olaraq şəhidlər Azər Ələkbərov və Ağabəy Novruzbəylinin şəxsi əşyaları nümayiş olunub.

Tədbir iştirakçılarına Azərbaycan İstiqlal Muzeyinin fondunda saxlanılan, Tahir Cəfərov, Oqtay Məmmədov, Sənan Ələsgərov və digər fotoqraflara məxsus 50 fotoşəkil sərgilənib.

"Ayın 19-da eşitdim ki, mərkəzi aparatın qabağında nümayiş var. Hadisələri çəkməyə başladım. Səhərisi gün tanklar Bakıya gəldi. Biz oradan xəbər tutduq. Mən elə başa düşdüm ki, camaatı qıracaqlar. Demək olar ki, axşama qədər çoxlu kadrlar çəkdim. Həmin o hadisələrdə təxminən 200-ə yaxın şəkil çəkdim", -deyə fotoqraf Tahir Cəfərov xatirələrini bölüşüb.

Tədbirdə 20 Yanvar Cəmiyyətinin üzvləri, 20 Yanvar şəhidlərinin ailə üzvləri, 20 Yanvar hadisələrinin şahidləri, Prezident Qvardiyasının əsgərləri, Daxili Qoşunların və Sərhəd Qoşunlarının Sahil Mühafizəsinin müdavimləri və digər qonaqlar iştirak ediblər.

AYXAN

Ekspress.- 2011.- 19 yanvar.- S.14.