Azərbaycanlı tələbələr Macarıstanda mədəniyyətimizi təbliğ edirlər

Azərbaycan mədəniyyəti Macarıstanda təmsil edilib. Macarıstanın paytaxtı Budapeşt şəhərində yerləşən Mərkəzi Avropa Universitetində təhsil alan azərbaycanlı tələbələr universitetdə keçirilən Beynəxalq Mədəniyyət Festivalına qatılıblar. 30-a yaxın ölkənin qatıldığı bu festvalda həftə boyunca universitetin əsas foyesində nümayiş etdirilən fotolardan ibarət stenddə Azərbaycan yeməklərinin, rəqslərinin və paytaxtımızın fotoları yerləşdirilib. Həftə sonu universitetin yataqxanasındakı yeməkxanada bozbaş, toyuq-ləvəngi və şirinplov verilib. Günün nəticələrinə əsasən ən çox sifariş olunan yeməklərin arasında birinci yerdə bozbaş, üçüncü yerdə isə toyuq-ləvəngi olub.

Bundan əlavə, yeməkxanada səsləndirilən musiqilər arasında Azərbaycan xalq mahnıları, muğamlar və müasir estradamızdan musiqilər də yer alıb. Tədbirin əsas hissəsi olan mədəniyyətlərin təqdimat mərasimində Azərbaycan üçün xüsusi olaraq ayrılmış stenddə mədəniyyətimizi əks etdirən fotolar, masada isə Azərbaycana aid açıqcalar, dolma, şəkərbura, paxlava, Azərbaycan çayı, mürəbbələr, nar, limon, çərəz, kələğayı, digər milli atributlarımız və suvenirlər təqdim olunub.

Bundan əlavə, səhnədə Azərbaycana aid təqdimatın nümayiş etdirilməsi, zəngin tariximizi və mədəniyyətimizi əks etdirən faktların tamaşaçıların nəzərinə çatdırılması, "Yüz bir" rəqsi və "Reyhan" musiqisi isti alqışlarla qarşılanıb.

Qeyd edək ki, Azərbaycanlı tələbələrin bu festivalda uğurla mədəniyyətimizi təbliğ etməsində Azərbaycan Respublikasının Macarıstandakı səfirliyi, Azərbaycan Respublikasının Diasporla İş Üzrə Dövlət Komitəsinin və Macar-Azərbaycan Dostluq Cəmiyyətinin böyük rolu olub.

AYXAN

Ekspress.- 2011.- 25 yanvar.- S. 14.