"Bakı xanı Hüseynqulu xanın nəvələrindənik"
Cahangir
Novruzov: İnşallah, Yaşar sağalsın, onunla bir
tamaşada oynayacağıq...
Bir çox tanınmış incəsənət
xadimimiz Azərbaycanda kənarda fəaliyyət göstərir.
Müsahibimiz onlardan biri - sevimli aktyorumuz, uzun illər Şəki
Dövlət Dram Teatrının və Musiqi Komediya
Teatrının baş rejissoru olmuş Cahangir Novruzovdur.
Cahangir müəllim artıq 16
ildir ki, Türkiyədə türk qardaşlarımıza
teatr sənətinin sirlərini öyrədir. Hərdən
vaxt tapanda Vətənə də baş çəkir...
-Doğrusunu deyim ki, mən Musiqi
Komediya Teatrının qısa bir müddətdə düzələcəyinə
inanmırdım. Çünki bu teatrda köklü islahatlar
lazımdır. Musiqili Komediya Teatrının aktyor heyətində
sənətinə böyük hörmət etdiyim, o teatrda
aktyor kimi xidmətləri olan mərhum Hacıbaba
Bağırovun yanlışlıqla işə
aldığı, səsi, musiqi və teatr səriştəsi
lazımi səviyyədə olmayan bir sıra adamlar var. Onlar
arasında ola bilsin istedadlar var, amma onların heç olmasa
müəyyən təlim almalari lazımdır. Musiqili
Komediya Teatrı açıldığı ilk illərdə
də Nəsibə xanımla bərabər bir-iki nəfər
teatr təhsili görmüş aktyorlar vardı. Bəşir
Səfəroğlu, Lütfəli Abdullayev, İbrahim
Şünasi kimi aktyorların təhsili yox idi. Amma istedad
sahibi olan bu insanlar Şəmsi Bədəlbəyli kimi
pedaqoqun rəhbərliyi altında peşəkar səriştə
sahibi oldular. Onlara musiqili teatrda zəruri olan vokal və musiqi dərsləri
bilikli müəllimlər tərəfindən verildi. Bu
aktyorlar rəqs etməyi öyrəndilər. Ona görə də
bu sənətkarlar indiyədək xatirələrimizdə
yaşayırlar, adları hörmətlə anılır.
- Rəhmətlik Əlabbas Qədirov
deyirdi ki, Nəsibə Zeynalova mənim tələbəm olub.
O zamanlar artıq Nəsibə xanım Azərbaycanın xalq
artisti idi...
- Oxumaqdan, təhsil almaqdan heç
kəs utanmamalıdır. Düzdür, hesab edirəm ki,
Musiqili Komediya Teatrındakı insanların bir qismi oradan təmizlənməlidir,
lakin onlara başqa teatrlarda iş vermək lazımdır. Bu zəmanədə
onları çölə atmaq olmaz. Əgər Musiqili Komediya
Teatrının düzəlməyini istəyirsinizsə, mən
bunu başqa şəkildə görürəm. Azərbaycanda
Musiqili Komediya Teatrının uzun illərə söykənən
ənənələri var. Bu ənənələri zamana
uyğun bir şəkildə inkişaf etdirmək
lazımdır. Bəzən kiçik hisslərimizin köləsi
olaraq, özümüzü, millətimizi sahib olduğu
şeylərdən məhrum edirik. Əgər bir insan ona
tapşırılan işi vicdanla yerinə yetirmirsə, buna
görə rəhbərlik neyləsin?
- Yəqin ki, xəbəriniz var, Azərbaycan
teatrının 10 illik inkişaf proqramı qəbul edilib.
Artıq 2009-cu ildən başlayaraq islahatlara da
başlanılıb?
- O islahatlarla bağlı
keçirilən iclaslarda mən olmamışam. İslahatlarda
professional sənət zehniyyəti olmalıdır, bizdəsə,
sadəcə, məsələnin maliyyə və təşkilati
tərəfinə önəm verilir. Hörmətli Polad
Bülbüloğlunun nazir olduğu dövrdə mən
Musiqili Komediya Teatrırının baş rejissoru, həm də
bədii rəhbəri idim. O dövrdə teatrın
binasının əsaslı təmiri məsələsi həll
edilirdi. Hələ bilinmirdi ki, bina söküləcək, ya
yox. Bina söküldü, düşünürəm ki, bu,
doğru addım idi. Baxmayaraq ki, o teatrın hər
daşı mənə babam Cahangir Zeynalovu
xatırladırdı. Çünki binanın metal skeleti
çürümüş ve kağız kimi
yırtılırdı. O teatrın mərkəzi 3
lojasının sağ tərəfindəki lojasını
Cahangir Zeynalov illik kirələyirdi. Nənəm- rəhmətlik
Hüsniyyə xanım
"Qayınana" tamaşasının premyerasında sol lojada oturanda
dedi ki, baban Cahangirin dövründə o loja mənim idi, anan niyə
məni bu tərəfdəkinə gətirdi?.. Ona görə də, o bina mənim
üçün bəlkə
də Azərbaycanda hər şeydən daha dəyərli idi. Bina söküləndə
parketləri, daşları insanlar evlərinə daşıdılar. Mən isə bir mismarına
belə göz dikmədim.
125 ildən bəri Azərbaycan teatrına varı və
canı ilə xidmət edən bir nəslin üçüncü
nümayəndəsi olaraq teatrdan
bir çöp
götürsəm, o teatrı şəxsi
mənfəətlərimə görə işlətsəm, o biri dünyada babama və Nəsibə
xanıma nə cavab verərəm? Azərbaycan
reallığında teatr sahəsində
qarşılaşdığım bəzi
məqamlar mənə bir az
qəribə gəlir. Bəlkə də bu gün Türkiyədə
olmağımın səbəbi budur. Bəlkə də məndən
vaz keçilməsinin
xeyrimə oldu. Çünki mən bura qayıtsaydım, hər gün
müharibə edəcəkdim. Çünki mən talan etmək üçün
yox, qurmaq, yaratmaq üçün gələcəkdim.
- Bəzən belə iddia edilir ki,
Azərbaycan teatrında düşünən beyinlər
qalmayıb?
- Xeyr, niyə ki? Bu gün teatr sənətində
Azərpaşa Nemətov kimi bir rejissor var. Azərpaşa
çox peşəkar birisidir. Azərpaşa Nemətov tək
Teatr Xadimləri İttiifaqının deyil, Akademik Milli Dram
Teatrının başında durmalı, bu teatrın bu
günkü sənət siyasətini istiqamətləndirməlidir.
Həmçinin Vaqif İbrahimoğlunun adını çəkmək
istəyirəm. Teatrı bilən insandır, heyif ki, bugün
bir az xəstədir. Türkiyədə müalicə olunanda
onu da, Yaşarı da (Yaşar Nuri- red.) ziyarət etdim. Yaşar
da artıq ayağa durur. Ağciyər infeksionundan müalicə
olunur. İnşallah sağalınca onunla bir tamaşada
oynayacağıq.
- Planda varmı?
- Planda yoxdur, amma təki
sağ-salamat sağalıb qayıtsın, Yaşarla bir
tamaşanı plana salmaq bizim üçün nədir ki?
- Əvvəllər, Sizi yeni
televiziya tamaşalarında, filmlərdə
görürdük. Hazırda yeni çəkildiyiniz filmlər
varmı?
- Elə keçən il
"Ölüm növbəsi" filmində oynamışam.
Bu il üçün Bakıdan elə bir təklif
almamışam. Amma Türkiyədən bəzi təkliflər
almışam. Ssenarilər var, onları gözdən
keçirib bir tamaşa hazırlamalıyam.
- Cahangir müəllim, neçə
ildir Türkiyədə yaşayırsınız, özü
də Adana kimi böyük şəhərdə
konservatoriyanın dosentisiniz, tələbələriniz də
məşhur filmlərdə, seriallarda çəkilirlər.
Bəs Sizi nə üçün türk filmlərində
görmürük?
- Mən orada sırf pedaqoji fəaliyyətlə
məşğulam. Vaxtımı əsasən bu işə sərf
edirəm. Məni elə bu fəaliyyətimlə də
Türkiyədə kifayət qədər tanıyırlar.
Türkiyədə dövlət teatrlarında bir neçə
ildən bir sınaq imtahanları keçirilir. Orada dövlət
müəssisələrinə yalnız imtahanla işə
götürürlər. Bildiyimə görə, Türkiyədə
dövlət teatrlarının 1000-dən çox aktyora
ehtiyacı var. Lakin ötən il dövlətin gücü 42
yeni aktyor ştatı açmağa çatdı. 1996-cı
ildə fəaliyyətə başlayan Adana Çukurova
Universitetinin Konservatoriyasının 7 yetirməsi bu imtahandan
keçdi. Təsəvvür edirsiniz, bu nə deməkdir?
Bütün ölkə üçün nəzərdə
tutulan 42 yerin 7-ni mənim tələbələrim qazandı. Bu
da mənim pedaqoji fəaliyyətimin statistik göstəricisidir.
- Cahangir müəllim, dərslərinizdə
Azərbaycan dramaturgiyasından istifadə edirsinizmi?
- İstifadə etməmişəm...
- İcazə verməyiblər?
- İcazə məsələsi
deyil. Əvvəla bizim ədəbiyyatın türkcəyə
tərcüməsi lazımdır. Təəssüf ki,
Türkiyə türkcəsində kitablarımız, əsərlərimiz
çox azdır. Eyni kökdən olsaq da, Azərbaycan və
Türkiyə türkcələri çox fərqli dillərdir.
- Amma burada insanlar Anadolu türkcəsində
kitab alıb oxuyur, əsərlər də səhnəyə
qoyulur.
- Alıb oxuyurlar ona görə ki, kitablar bura
gətirilir. Digər tərəfdən türk dilinə burada maraq var. Azərbaycan dili Türkiyədə elə
də təbliğ olunmur axı. Burada insanlar peyk antenaları
vasitəsilə yüzlərlə
türk kanalına baxırlar. Amma Türkiyədə cəmisi
3-4 Azərbaycan kanalı
yayımlanır ki, Azərbaycan Dövlət Televiziyasından başqa,
onların da səviyyəsi, keyfiyyəti
və proqramlarının
daha yaxşı olmasını arzulayırıq...
200-ə yaxın türk
kanalının yanında
bizim 3-4 telekanalımız
çox azdır. Hələ aparıcıların danışıq
və tələffüzünü
demirəm. Əvvəllər
aparıcıların danışığına
çox diqqət verilirdi...
- Babanız
Cahangir Zeynalovun çoxlu mülkləri, torpaqları olub. Onların yerini bilirsinizmi, sənədləri sizdə
varmı?
- Hüsü
Hacıyev küçəsindəki
şahmat məktəbinin
yerində babamın bir mülkü olub ki, içində
300 nəfər tamaşaçı
yerləşən teatr
zalı, 40 otağı
varmış. O binanı
SSRİ dövründə sökdülər.
Abşeronda bizim nəslə
aid çoxlu torpaq sahələri var. O yerlərin
halallığını halal
insanlara verirəm, halal olmayanlarasa vermirəm. Mən hələ Cahangir
Zeynalovu bir kənara qoyuram, atam tərəfdən Bakının harasının
bizə aid olduğunu
desəm təəccüblənərsiniz.
Qızım Nəsibənin təsadüfən
arxivdən əldə
etdiyi bir sənədə görə,
sonuncu Bakı xanı Hüseynqulu xanın nəvələrindənik.
- Onda siz həm Tofiq
Bakıxanova, həm də Eldar Mansurova
qohumsnuz ki?!.
- Bəli
Mansurovlarla da, Bakıxanovlarla da qohumuq.
- Atanız
Mütəllim Novruzovdan
kamança çalmağı
öyrənmisinizmi?
- Mənə məxsusi olaraq öyrətməsə də,
ondan muğam barədə bir şeylər götürmüşəm.
Bir az
pianoda çalmağı
bilirəm.
- Bəs atanızın kamançasını
indi kim
dilləndirir?
- Atam rəhmətə gedəndən
sonra kamançanı
dilləndirən yox idi. Mən Türkiyədə
olanda böyük sənətkarımız Habil
Əliyev mənə zəng edib, dedi ki, "Cahangir, kamançam qırılıb, atanın
kamançısını mənə
verərsənmi?" Habil müəllim
yaxşı bilirdi ki, atamın kamançası çox dəyərli alətdir.
Dedi ki, nə qədər istəyirsən, pul da verirəm. Rəhmətlik atam da, anam da Habil
müəllimin xətrini
istəyirdilər və
sənətinə yüksək
qiymət verirdilər.
Mən özüm də onun sənətinin böyük vurğunuyam.
Dedim ki, o kamançanın qiyməti
mənim üçün
əvəzedilməzdir. Atam sizə
böyük dəyər
verirdi. O kamança
evdə səssiz qalmaqdansa, sizin əlinizdə səslənərsə,
atamın ruhu daha şad olar.
Habil müəllimə
həmçinin dedim ki, Allah ömrünüzü
uzun eləsin, sizdən sonra o kamança yenidən bizim evə qayıtmalıdır. Habil müəllim
özü də mənimlə razılaşdı.
Bununla bağlı mən ondan imzalı kağız da istəmədim, bizə görə bu, ayıb iş
olar. Yəni, kişilərin arasında
dürüst söz olub. Bilənlər bilir ki, kamança alətini xaricdə səsləndirən
ilk musiqiçilərdən biri də mənim
atamdır. O, 1953-cü ildən Həbib Bayramovla bir çox xarici ölkədə qastrolda olub. Radionun bütün canlı
konsertlərini atam ifa edirdi, qəribədir
ki, konsertlər lentə yazılanda artıq atam orada işləmirdi.
Hörmətli Zeynəb Xanlarovanı,
Elmira Rəhimovanı, Flora Kərimovanı səhnədə
ilk dəfə atam müşayiət edib.
Onu tanıyan musiqiçilər
yaxşı bilirdilər
ki, atam Mütəllimin "Cahargah"ı
bir başqa olub. Yaşlı vaxtında soruşdum
ki, səhnəyə niyə çıxmırsan?
Dedi ki, saçım ağarıb,
səhnəlik deyiləm,
bundan sonra saçımı yenidən
rəngləyə bilmərəm.
O adamın dünyagörüşü
beləydi... Mən də elə
ata-ananın oğlu, babalarımın nəvəsiyəm
və dürüst yaşamağı onlardan öyrənmişəm. Nəvələrimə də dürüst yaşamağı öyrədirəm.
İltifat
HACIXANOĞLU
Ekspress.- 2011.- 26 yanvar.-S.10.