II Beynəlxalq Muğam Müsabiqəsi

7 gün ərzində Bakıda müxtəlif silsilə tədbirlər keçiriləcək

Martın 14-dən 21-ə qədər Bakıda keçiriləcək II beynəlxalq Muğam Festivalı "Muğam fəzası" adlanacaq. Bu barədə dünən Azərbaycan Bəstəkarlar İttifaqında keçirilən mətbuat konfransında məlumat verilib.

Tədbirdə çıxış edən ittifaq sədri Firəngiz Əlizadə bildirib ki, ikinci dəfə baş tutacaq festival Azərbaycanın müstəqilliyinin 20-ci ildönümünə həsr olunub.

Daha sonra festivalın proqramı barədə danışan sədr qeyd edib ki, təntənəli açılış mərasimi martın 14-də Beynəlxalq Muğam Mərkəzində olacaq. 7 gün ərzində Bakıda müxtəlif silsilə tədbirlər keçiriləcək. Belə ki, martın 16, 17 və 18-də UNESCO səviyyəsində keçiriləcək beynəlxalq elmi simpoziuma müxtəlif ölkələrin ən görkəmli musiqişünas alimləri qatılacaqlar. Simpoziumun materialları kitab şəklində azərbaycan, rus, ingilis və ərəb dillərində çap olunacaq. Martın 18, 19 və 20-də festival çərçivəsində gənc muğam ifaçılarının müsabiqəsi təşkil ediləcək. Festival çərçivəsində hər gün saat 17.00-da Beynəlxalq Muğam Mərkəzində muğam konserti keçiriləcək. Konsertin birinci bölməsində Azərbaycan xanəndələrinin ifasında yeddi muğam təqdim olunacaq. Konsertin ikinci hissəsində isə digər ölkələrin ifaçıları çıxış edəcək.

Bununla bərabər, hər gün saat 22.00-da Caz Mərkəzində tanınmış caz ifaçılarımızın da konsertləri keçiriləcək.

F.Əlizadənin sözlərinə görə, festival çərçivəsində simfonik konsertlər, görüşlər də təşkil ediləcək. Opera və Balet Teatrında isə muğam operaları nümayiş olunacaq.

Beynəlxalq Muğam Festivalı martın 21-də Heydər Əliyev Sarayında möhtəşəm qala-konsertlə öz işinə yekun vuracaq.

Festivalın qonaqları məsələsinə də toxunan sədr qeyd edib ki, misirli musiqiçi Yamini Redvan Azərbaycanda ustad dərsləri keçəcək: "Əvvəlki festivalda Yamininin ifasını dinləyəndə çox təəccübləndik. Çünki biz nağaranın zərblə ifasını eşitməyə alışmışıq. Ancaq o bu alətdə çox zərif bir ifa sərgilədi. Ona görə də məhz onun ustad dərslərini keçirmək qərarına gəldik".

F.Əlizadə ustad dərsləri zamanı xalq artisti, xanəndə Alim Qasımov və onun tələbələrinin çıxış etməsini istədiklərini söyləyib: "Çox istərdik ki, xarici mütəxəssislər onların ifasını dinləsinlər. Ancaq Alim Qasımov İranda olduğu üçün hələ özü ilə danışa bilməmişik. Ondan cavab gözləyirik".

Konfransda çıxış edən Mədəniyyət və Turizm Nazirliyinin incəsənət şöbəsinin müdiri Fərəh Əliyeva festivala hazırlıq işlərinin hələ keçən ildən başlandığını jurnalistlərin diqqətinə çatdırıb. Onun sözlərinə görə, beynəlxalq tədbirə bütün konsert və teatr salonları cəlb olunub: "İnanırıq ki, ikinci festival da dünyada bu istiqamətdə keçirilən ən gözəl tədbirlərdən biri kimi böyük əks-səda doğuracaq".

Tədbirdə çıxış edən Milli Konservatoriyanın rektoru Səyavuş Kərimi bildirib ki, II Beynəlxalq Muğam Festivalı çərçivəsində təşkil olunacaq Gənc Muğam İfaçılarının Müsabiqəsində ölkəmizi təmsil edəcək ifaçıları müəyyən etmək üçün fevralın sonunda Respublika Muğam Müsabiqəsi keçiriləcək. Bu müsabiqənin üç qalibi festivalda çıxış edəcək. Daha sonra beynəlxalq müsabiqə barədə məlumat verən rektor bildirib ki, müsabiqənin püşkatma mərasimi martın 17-də olacaq. Martın 18, 19 və 20-də keçiriləcək müsabiqəyə qatılmaq istəyən digər ölkələrin ifaçıları namizədliklərini verməkdə davam edirlər. Ona görə də, yarışmada iştirak edəcək ölkələrin tam siyahısı hələ məlum deyil.

Səyavuş Kərimi bildirib ki, qalibləri müəyyən edəcək münsiflər heyəti yeddi nəfərdən ibarət olacaq. Onun sözlərinə görə, birinci dəfə olduğu kimi, bu dəfə də münsif kürsüsündə Avropanın dörd, Azərbaycanın üç təmsilçisi əyləşəcək: "Azərbaycan tərəfdən münsiflərdə mən, Ramiz Zöhrabov və adını hələ dəqiqləşdirmədiyimiz bir nəfər də olacaq. Müsabiqənin mükafat fondunun həcmi də dəyişməyib. Bu dəfə də qaliblərə eyni məbləğdə mükafat təqdim ediləcək. Bu, dünyada keçirilən müsabiqələr içində qaliblərə verilən ən yüksək məbləğdir".

Xatırladaq ki, 2009-cu ildə keçirilən ilk müsabiqənin əsas mükafatı olan Qran-Prini Təyyar Bayramov qazanıb. 1-ci yerə Özbəkistandan Yulduz Turbiyev, 2-ci yerə İrandan Məhəmməd Motamidi, 3-cü yerə isə misirli Mustafa Səid layiq görülüb. Qran-Pri sahibinə 20 min, birinci yerə 15 min, ikinci yerə 10 min, üçüncü yerə isə 5 min avro mükafat verilib.

İLTİFAT

Ekspress.- 2011.-28 yanvar.- S. 23