Bəxti gətirən aktrisa...

Hər dəfə bu xanımla üz-üzə gələndə onun məşhur "Retro" verilişindəki aparıcılıq etdiyi vaxtları xatırlayıram. O zamanlar xalq artisti Həmidə Ömərovanın yaradıcılığının ən parlaq dövrü idi. Rejissorlar onu öz filmlərinə çəkmək üçün bir il əvvəldən sifariş göndərirdilər.

O vaxtdan bəri çox şey dəyişib. Həmidə xanım hər bir aktrisanın arzu etdiyi bütün uğurlara imza atıb, ailə səadətinə də qovuşub, fəxri adlara da layiq görülüb. Dəyişməyən yeganə şey onun təbəssümlü baxışlarıdır...

Tellini "öldürdülər"

- "Qorxma mən səninləyəm" filminin ikinci hissəsində çəkildiniz? Bu mövzu sizə tanışdır, maraqlıdır, film çəkilişdən əvvəl sizə maraqlıdır, yoxsa sonra?

- Mən belə bir ssenarinin olduğunu bilirdim. Amma düşünürdüm ki, əvvəlki seriyada olduğu kimi Telli rolu normal bir roldur, filmin süjet xəttinə təsir edən obrazdır. Amma ssenarini oxuyandan sonra xeyli pəjmürdə oldum. Çünki əvvəl oynadığım Telli obrazından orda əsər-əlamət görmədim. Filmin ssenarisini Yuli Qusmanın özü yazıb və daha çox kişi obrazlarına yer ayırıb, mən cəmi iki yerdə epizodda göründüm. Ona görə də əvvəlcə çəkilməkdən imtina etdim. Nəsə, məni dostlarım birtəhər yola gətirdilər... Qusman mənə dedi ki, tamaşaçılar bu obrazı çox görmək istəyirdilər, ona görə Tellini "öldürmək" istəmədim. Mən də qayıtdım ki, elə kiçik epizodda görünmək Tellini öldürmək kimi bir şeydir... Digər suala gəlincə, aktrisa kimi çəkilmək mənə daha maraqlıdır. Mən həm də kinoşünas olsam da, filmləri daha diqqətlə, analitik baxışlarla izləsəm də, aktrisalığım "tutanda" dəyişirəm və tamam başqa əhvalla, daha da maraqla çəkilirəm, baxışım dəyişir.

Yenidən doğulsaydım, yenə aktrisa olardım...

- Eşitmişəm Ayaz Salayev sizi filmə dəvət edib, amma imtina etmisiniz. Deyəsən açıq-saçıq səhnələr varmış...

- Ayaz Salayev mənə bir dəfə xəyanətkar qadın obrazını oynamağı təklif edərək bir filmə dəvət etdi, amma razılıq vermədim. Çünki rol əhatəli deyildi və o filmdə qəhrəmanımın niyə xəyanət etməsinin səbəbləri tamaşaçıya qaranlıq qalacaqdı. Bu da bir qadın kimi məni narahat elədi və mən roldan imtina etdim. Həm də siz dediyiniz kimi, açıq-saçıq səhnələr çox idi, mən heç vaxt belə kadrlara çəkilməmişəm. Aktrisa olsam da, belə şeylərə adi baxsam da, azərbaycanlı olduğumu unutmuram.

- Nə vaxtsa aktrisa sənətini seçməyinizin peşmançılığını çəkmisinizmi?

- Bəzən həm mənəvi, həm fiziki, həm də psixoloji anlamda yorulduğum vaxtlar olur. Düşünürəm ki, bəlkə də içimdəki bu enerji ilə başqa sənət seçsəydim, nələrsə başqa cür olardı. Amma tam əminliklə deyirəm, yenidən doğulsaydım, yenə aktrisa olardım. Bu sənət məni xalqa tanıdıb, sevdirib və bundan sonra da sevdirəcək.

- Elə bir rolunuz varmı ki, sonradan ona görə xəcalət çəkmisiniz?

- Yox, məni utandıran rolum olmayıb, amma daha az və daha çox sevdiyim rollar olub. Adlarını soruşmayın, sadalamayacağam...

Xoşbəxt qadın deyiləm, amma bədbəxt də deyiləm...

- Xoşbəxt qadın və xoşbəxt aktrisasınız?

- Qadın ya xoşbəxt, ya da bədbəxt olur, amma mən deməzdim ki, bədbəxt qadınam. Amma xoşbəxt qadın da deyiləm. Digər suala gəlincəsə, xoşbəxt yox, bəxti gətirən aktrisayam.

- Həyatda kimi itirməkdən qorxursunuz?

- Ən yaxın adamlarımı. Mən bu qorxu ilə anamı itirəndə rastlaşdım. Hələ də bu qorxunun təsirindən qurtula bilmirəm. Gecə-gündüz bu qorxu məni tərk etmir. Mən kinoya çox bağlı olduğum üçün öz şəxsi həyatıma vaxt ayıra bilmədim. Şəxsi xoşbəxtliyim yadımdan çıxdı, onu gec əldə etdim. Bu gün anamdan sonra məni yaşadan ailəm, konkret oğlumdur.

- Bir ara yoldaşınızdan ayrılmağınız barədə xəbərlər yayıldı, nə dərəcədə düzgün idi?

- Mən nikahla ərimdən boşanmamışam, bunlar şayiədir.

- Ailəniz barədə heç vaxt danışmırsınız...

- Bir oğlum var, Aviasiya Akademiyasının tələbəsidir. Həyat yoldaşım mühəndisdir, amma öz ixtisası üzrə çalışmır, kiçik bizneslə məşğul olur. Bir də mən şəxsi həyatım barədə danışmağı xoşlamıram. Çünki hər kəsin şəxsi həyatı var və heç kim istəməz ki, başqası onun şəxsi həyatına müdaxilə etsin. Buna görə də düşünürəm ki, şəxsi həyatımız özümüzdə qalsa yaxşıdır. Bir-birimizin şəxsi həyatına girməyək.

Xoşbəxtlikdən oğlum aktyor olmadı...

- Oğlunuzun aktyor olmasını istəmisinizmi, onun aktyorluq qabiliyyəti varmı?

- Yoxdu bu sahədə qabiliyyəti, amma olsaydı da, mən onun aktyor olmasını istəməzdim. İstəsəydi... bilmirəm qarşısına sədd çəkərdim, ya yox. Çünki mənim qarşıma valideynlərim sədd çəkməyib. Xoşbəxtlikdən oğlum aktyor olmaq istəmədi...

- Kədərinizi kiminlə bölüşürsünüz?

- Anamın şəkilləri ilə. Bir də anasını itirmiş rəfiqələrimlə söhbətləşib təsəlli alıram. Anamın ölümündən bir il keçməyib, avqustun 5-də dünyasını dəyişib, amma hələ də bu ölümlə barışa bilmirəm. Məncə ömrüm boyu da barışa bilməyəcəyəm. Bu dəhşətli itkidir...

3 ildir çörək yemirəm...

- Belə gənc qalmağı necə bacarırsınız? Plastik əməliyyat etdirmisiniz, yoxsa pəhriz saxlayırsınız?

- İndiyə qədər olmayıb, amma indən belə fikirləşirəm. Üzümdə əməliyyat etdirmək istəyirəm, çünki yaş bunu tələb edir. Bir də pəhriz saxlayıram. Ağır yeməklərdən qaçıram. Səhərlər bir stəkan yaşıl çay içirəm, 3 ildir ki, çörəkdən də imtina etmişəm. Hər səhər də yarım saat idmanla məşğul oluram.

- Qadınların həyatından bəhs edən ssenarinizin taleyi necə oldu?

- İnanın ki, vaxt azlığından həmin ssenarini yazıb qurtara bilmədim. Elə bil vaxt uçur, işlərimin çoxluğundan çatdıra bilmirəm. Universitetdə dərs deyirəm, televiziya, film çəkilişləri, ora-bura... çatdırmaq olmur.

Boğulmağım rejissora ləzzət elədi...

- Film çəkilişi zamanı başınıza hansısa ekstremal hadisə gəlibmi?

- Çox olub belə hadisələr, hansını danışım? Eldar Quliyevin "Şəhərkənarı gəzinti" filminin çəkilişi zamanı mən suda batan bir qızı xilas etməliydim. Özüm də üzməyi bacarmıram. Elə qəhrəmanım da üzə bilmir. Çəkiliş Pirallahı adalarında aparılırdı. Orda da bir metr gedirsən, su boğazına çıxır. Mən özümü qəhrəmancasına dənizə atanda başladım boğulmağa. Əslində həqiqətən də boğulurdum, amma Eldar müəllim elə bilirdi rola görə boğuluram. Çünki Eldar müəllim elə düşünürmüş ki, mən Moskva Kinemotoqrafiya institutunun məzunuyam, deməli, hər işi gözəl bacaran peşəkaram.

Məni sudan zorla çıxarıb sahildə özümə gətirdilər. Məni anlayan olmadı ki, doğrudan boğuldum. Amma film inandırıcı alındı deyə, boğulmağım rejissora ləzzət elədi. İkinci dublda məni zorla dənizə göndərdilər, məni rolda xilas edəcək aktyor Vidadi Həsənova yalvardım ki, mən dənizə atılan kimi gəlib məni xilas eləsin. Yazıq Vidadiyə kim idi qulaq asan. Eldar müəllim filmin taleyinin hayında idi. Əslində elə mənim taleyim də onun əlində idi, göstəriş verməyincə Vidadi məni boğulmaqdan xilas edə bilməzdi.

Sirli gözlər...

- Sevgi həyatınızda neçənci yerdə dayanır? Sevgidə daha çox yanmısınız, yoxsa yandırmısınız?

- İndiki yaşımda sevgi həyatımda ən axırıncı yerdə dayanır. Sevgidə də həm yanmışam, həm də yandırmışam.

- Gözəl qadınsınız, indiyə qədər haqqınızda heç bir şayiə yayılmayıb, buna necə nail olmusunuz?

- Buna nail olmaq lazım deyil, bunu elə həyat özü göstərir. Amma niyə, bir dəfə Ömür Nağdəliyevlə ailə qurmağım barədə şayiə yayılmışdı. Ömür mənim tələbə yoldaşımdır, Moskvada bir institutda oxumuşuq. Həm də o "Gümüşü furqon" filmində mənim ərimi oynayıb. Bu filmdən sonra şayiə yayıldı ki, Həmidə Ömürə ərə gedib...

- Gözlərinizin rəsmini çəkən olubmu? Gözəl olduğu qədər də gözlərinizdə kədər var, niyə?

- Gözlərimin rəsmini çoxları çəkib. Hələ "Retro" verilişində aparıcı olduğum vaxtlarda gözlərimin şəklini çəkib redaksiyaya göndərirdilər. Fotoqraflar da gözlərimin şəklini çəkiblər. İnstitutuda oxuyan vaxtlarımda belə şeylər çox olub. Bəzən karandaşla da gözlərimin rəsmini çəkiblər, çoxunu saxlamışam. Hətta Tahir Salahov kimi dünyaşöhrətli rəssam mənim şəklimi çəkib. Həmin şəkil indi Tretyakov qalereyasını bəzəyir. Mən bunu bilmirdim, 28 ildən sonra Tahir Salahov özü mənə zəng edib dedi. O şəklin surətini də mənə göndərdi. İkinci suala gəlincə, gözəlliklə kədər qohumdur...

AYXAN

Ekspress.- 2012.- 7-9 aprel.- S. 19.