"Mənim üçün əsas ölkəmdə yaşamaq deyil, ölkəm üçün yaşamaqdır"

 

Əlixan Səmədov: "Azərbaycanda tələbələr yetişdirmək ən böyük arzularımdan biridir"

 

Məşhur balaban ustası Əlixan Səmədovun "Milli.az"a müsahibəsi

 

- Əlixan müəllim, ilk olaraq belə bir sualla sizə müraciət etmək istərdim: ölkədən getməyinizə səbəb oldu?

- Hər halda, taleyim belə gətirdi. Mənim üçün əsas olan ölkəmdə yaşamaq deyil, ölkəm üçün yaşamaqdır.

- Musiqiçi ailəsində doğulmusuz. Yəqin, musiqiçi olmağınıza ailənizin böyük təsiri olub...

- Doğrudur, hər zaman bu barədə danışmışam. Musiqiçi olmaqdan başqa, musiqini mənə sevdirən rəhmətlik atam İmamxan Səmədov olub.

- Çox maraqlıdır, balaban deyərkən Əlixan Səmədov, Əlixan Səmədov deyərkən balaban yada düşür. Sizdən başqa balaban ifaçıları da var. Sizcə, bu fərqlənmənin səbəbi nədir?

- Azərbaycanda hər klarnet ifaçısının çantasında mütləq balaban da var. Sadəcə, yeri gəldiyi zaman 5-10 dəqiqə istifadə edirlər. Mən isə həyatımı balaban musiqi alətimizə bağladım. Azərbaycan tarixində ilk dəfə sadəcə balabanda ifa olunan musiqinin CD-sini hazırlayıb bütün dünyaya səs salacaq şəkildə tanıtmağa başladım. Artıq 15 ilə yaxındır ki, bu çalışmalarım davam edir. Çox yaxın zamanda "Balaban-8" adlı albomum işıq üzü görəcək.

- Sənətdə bu qədər uğura sahib olmağın sirri sırf özünüzü həyatınızı sənətə sərf etməyin nəticəsidir, yoxsa Allah vergisi?

- Hər şey sevgi ilə başlar. Bu, hər sənət üçün keçərlidir. Sevdiyiniz işlə məşğul olduğunuz zaman nəticəsi gözəl olur. Amma ən əsası, Allah vergisidir. Sadəcə, qiymətini bilmək lazımdır.

- Sizin ifanızda olan bir çox musiqilərinizi əsasən erməni ifaçılar öz albomlarına daxil edirlər. Bununla bağlı fikrinizi bilmək istərdik. Ümumiyyətlə, bu məsələyə qarşı hansısa addımlarınız olubmu?

- İnanın ki, mən, sadəcə, öz işimə baxıram. Hər zaman yenilik arayışı içərisində oluram. Gözəl musiqiləri hər musiqiçi öz albomunda istifadə etmək istəyər. Əsas odur ki, istifadə edəcəyi musiqini birinci musiqiçidən daha yaxşı ifa edəcəksə, o zaman başarılı olar. Yoxsa təqlid hər zaman əslini yaşadır!

- Brilliant Dadaşova ilə bir çox sıx işbirliyiniz oldu. "Çıx yaşıl düzə" mahnısı olduqca uğurlu alınıb. Təklif kim tərəfindən oldu bu işbirliyinin növbəti uğurlu nəticəsinin hansı mahnı olacağı gözlənilir?

- Brilliant xanım Azərbaycan mədəniyyəti üçün bu günə qədər çox işlər görüb. Onun mahnılarını Azərbaycanda bilməyən yoxdur. Mənim çox sevdiyim sənətçilərdən biridir. Milli ruhuna heyranam. İlk dəfə Türkiyədə görüşdüyümüz zaman, 5-6 il olar, gələcəkdə bərabər bir layihəyə imza atmaq üçün danışmışdıq. İnşallah, çox yaxında bu layihəni bütün dünya eşidəcək.

- Sizin həm Türkiyənin ən məşhur müğənniləri ilə çox uğurlu işbirlikləriniz olub. Bunlardan Kerem Cem, Mirkelam, Sibel Can, Alişanın adını çəkə bilərik. Hazırda yaradıcılığınızda hansı yeniliklər var?

- Hal-hazırda 8-ci albomumu bitirdim. İnşallah, nəsib olursa, bütün dünyada müxtəlif dillərdə çıxacaq. Bu albomda, digərlərindən fərqli olaraq, iki disk olacaq. Bir çox yeni bəstələdiyim musiqilərim bu albomda yer alacaq. inanıram ki, dünyanın bir çox yerində bu musiqilərə qulaq asacaqsınız.

- Çox qəribə bir xasiyyətiniz var. Pulun bu qədər rol oynadığı bir dövrdə Əlixan müəllim paraya önəm vermir. Maraqlıdır, gəliriniz, sirr deyilsə, təkcə konsertlərdəndirmi?

- Bilirsiniz, belə bir mahnı var -"Kimlər gəldi, kimlər getdi bu dünyadan". Bunların içərisində pullusu da vardı, pulsuzu da. Amma bu gün qəlbimizdə yaşayanlar, sadəcə, Vətəni, milləti, xalqı üçün bir görənlərdir. Namərdlərə möhtac olmayacaq qədər pulum olsun, yetər... Allaha şükürlər olsun, albom satışlarından, konsertlərimdən, dərs verdiyim yerlərdən gələn qonorar məni bu günlərə qədər gətirdi. Unutmayın, sadəcə bir sirri sizinlə paylaşım. Bir alboma xərclənən pulla 1 ev almaq mümkündür. Evi düşünsəydim, indiyə qədər 8 evim olardı.

- Balaban haqda yeddi dildə kitab nəşr etdirmisiz. üçün o kitab haqqında bizim o qədər məlumatımız yoxdur?

- "Balaban metodu" adlı kitabım 3 dildə yazılıb. 2008-ci ildə nəşr edildi. Bu kitabla balaban öyrənmək istəyənlərə az da olsa, köməyim dəyibsə, buna görə özümü hər zaman xoşbəxt hiss edirəm. Ayrıca, bu il çıxacaq olan "Balaban-8" adlı albomumla bərabər, kitabdakı bilgiləri daha da genişlədərək bu səfər hər halda, 7 dildə olmaq qeydilə DVD şəklində görə biləcəksiz. Bu DVD- balaban haqqında hər məlumata rast gəlmək mümkün olacaq.

- Bakıda zaman görəcəyik sizi?

- Sağlıq olsun, ən qısa zamanda Bakıda da məni görmək imkanınız olacaq. Sadəcə, bir az səbr etmək lazımdır.

- Sizi qardaş Türkiyəyə bağlayan nədir yenə xaricdə yaşayan tanınmış sənətçilərə ənənəvi sualım: Bakıya vaxtsa dönməyi düşünürsünüzmü?

- Türkiyəyə gəlmədən öncə dünyanın bir çox ölkəsində olmuşdum. zaman ki Türkiyəyə gəldim, o zaman başa düşdüm ki, "bir millət, iki dövlət" boşuna deyilməmiş. Sadəcə, yaşayıb görmək lazımdır...

Bakıya dönmək məsələsinə gəlincə isə bu mənim ən böyük arzularımdan biridir: Azərbaycanda tələbələr yetişdirmək. İnanıram ki, bir gün bunu da həyata keçirəcəm...

 

 

Ekspress.- 2012.- 23 avqust.- S. 23.