Sahibkarların keyfiyyətli əmək
ehtiyatlarına ehtiyacı var
Azad sahibkarlığın və liberal iqtisadiyyatın təşviqi
Ölkədə sahibkarlığın inkişafı üçün vacib olan şərtlərdən biri də tələb olunan keyfiyyətdə əmək ehtiyatlarının formalaşmasıdır. Pul, maddi inventarın olması hələ biznesə başlamaq və ya onu inkişaf etdirmək üçün yeterli deyil. Sahibkarlıq subyekti fəaliyyət göstərdiyi təsərrüfat sahəsinə uyğun ixtisaslı, təcrübəli əmək qüvvəsinə də sahib olmalıdır.
Müasir iqtisadi sistemdə əmək
ehtiyatları əmək bazarında təşəkkül
tapır. Digər bazarlarda olduğu kimi bu bazarda da
tələb və təklif olur. Sahibkar özünə ixtisaslı və təcrübəli
işçi axtarırsa, deməli, onun müəyyən işçi
qüvvəsinə tələbi var. O
bazarın tələbini formalaşdırır. Əmək
qabiliyyətinə malik hər bir insan isə iş axtardığından o
da öz-özlüyündə bazarın
təklifini yaradır. Sahibkarın özünə
işçi axtardığı digərlərinin
isə əmək qabiliyyətini satdığı bazar əslində müasir
iqtisadi sistemin vacib elementindən sayılır. Əmək
bazarı işçi qüvvəsinin (əmək
resurslarının) və əməyin deyil,
məhz iş qabiliyyəti və qüvvəsinin
alıb-satıldığı bazardır. Bu bazarın təkmil və keyfiyyətli
olması, əmək qabiliyyətinin tələblərə cavab verməsi, eyni zamanda işəgötürənin də işçinin tələblərini ödəyə
bilməsi ümumi iqtisadi
inkişafı təmin edən əsas amillərdəndir.
Azərbaycan üçün əmək bazarı anlayışı son 20 ildə formalaşıb. Sovet dövründə, yəni planlı iqtisadiyyatda əmək bazarı olmayıb. Dövlət müəssisə və təşkilatlar üçün kadr hazırlayıb və onu işlə təmin edib. Bazar iqtisadiyyatı sisteminə keçdikdən sonra əmək bazarı yarandı və bu bazar vasitəsilə əmək ehtiyatlarının bölüşdürülməsi həyata keçirildi. Əmək bazarında əmək resursları dövlətin qərarı ilə deyil, tələb və təklifin sayəsində, rəqabət şəraitində bölüşdürülür. Yaxşı işçi özünə iş tapır, sahibkar isə belə işçiyə sahib olmaqla inkişaf edir.
Əmək bazarı ümumi bazar sistemində aparıcı möqeyə malikdir. Bu bazar olmadan nə sahibkar işini qura bilir, nə də iqtisadi problemləri həll etmək mümkün olur. Nəinki birbaşa əmək bazarı ilə bağlı olan məsələlər, habelə inflyasiya, alıcılıq qabiliyyəti, gəlirlər, yığım və s. kimi iqtisadi problemlər əmək bazarının imkanları ilə araşdırılır və həll edilir. Qeyd edilən imkanlar nə dərəcədə yaxşı olarsa problemlərin öhdəsindən gəlmək bir o qədər asan və uğurlu olur. Burada artıq keyfiyyət məsələsi ön plana çıxır.
Azərbaycanda əmək bazarıda xarakterik olan məsələ də məhz keyfiyyət məsələsidir. Ölkəmizdə əmək ehtiyatları iqtisadi inkişafın tələblərinə cavab vermir və bu problem hələ də qalır. Bir ixtisas üzrə kifayət qədər kadrlar olur ki, onlara ehtiyac yoxdur, amma başqa bir sahədə kadrlar çatışmır. Buna görə də Azərbaycana bir çox sahələrə xaricdən əmək ehtiyatlarının axını davam edir. Kifayət qədər düşünülməmiş kadr siyasəti əmək məhsuldarlığının azalmasına və gəlir itkisinə səbəb ola bilər. Məhz buna görə də hazırda müəssisələrin kadr ehtiyatlarının ixtisas səviyyəsi və peşəkarlıq getdikcə daha böyük əhəmiyyət kəsb edir.
Azərbaycanda belə bir problemin yaranmasında subyektiv səbəblərlə bərabər obyektiv əsaslar da var. Mövcud əmək ehtiyatlarının önəmli hissəsi planlı iqtisadiyyat dövründə yaradılıb. Sovet sistemində iqtisadiyyatın qapalı olması, rəqabətin yoxluğu, müasir texnologiyaların tətbiqinin ləng aparılması ənənəsi kadrlara yeni biliklərin verilməsinə marağı azaldıb. Buna görə də Azərbaycan bazar iqtisadi sisteminə keçdikdə əmək ehtiyatlarının müasir sistemə uyğun inkişaf etdirilməsi kimi problemlər yarandı. Həmin problemlər müstəqilliyin əldə edilməsindən 20 ildən artıq müddətin ötməsinə baxmayaraq hələ də aktualdır.
Lakin subyektiv amillər
daha güclüdür.
Son 20 ildə hazırlanan kadrların da bazar iqtisadiyyatının
tələblərinə cavab
verdiyini söyləmək
çətindir. Əgər belə
olmasaydı sahibkarlıq
subyektləri üçün
ixtisaslı kadr məsələsi problemə
çevrilməzdi.
Rəsmi açıqlamalara görə, ölkəmiz
işçi qüvvəsindən
səmərəli istifadə
sahəsində son illərdə
ciddi dəyişiklər
əldə edib.
2011-ci ildə ölkədə
iqtisadi fəal əhalinin sayı 2000-ci illə müqayisədə
255,9 min nəfər artaraq
4,626 milyon nəfər
olub, onların da 4,375 milyon nəfərini iqtisadiyyatda
məşğul olanlar,
250,9 min nəfərini isə
işsiz əhali təşkil edib.
Son illər ölkə iqtisadiyyatında
aparılan islahatlar nəticəsində əmək
bazarında əhəmiyyətli
dərəcədə müsbət
dəyişikliklərə nail olunduğu bildirilir. Belə ki, 2000-ci ildə dövlət sektorunda çalışanların
xüsusi çəkisi
iqtisadiyyatda məşğul
olanların ümumi sayının 33,2%-ni təşkil edirdisə,
2011-ci ildə bu göstərici 26,15-ə enib,
qeyri-dövlət sektorunda
işləyənlərin sayı
isə bu dövrdə 20 faiz artıb.
Əhalinin məşğulluğunu təmin
etmək məqsədilə
yeni iş yerləri, müəssisələr,
infrastruktura obyektləri və s. yaradılması danılmaz
faktdır. Ölkədə əhalinin məşğulluq
və işsizlik problemlərini həll etmək üçün vacib məsələlərdən
biri də ölkə iqtisadiyyatına
xarici investisiyaların
cəlb edilməsidir.
Dövlət Statistika
Komitəsinin məlumatına
görə, 2011-ci ildə
ölkədə fəaliyyət
göstərən xarici
investisiyalı və birgə müəssisələrdə
məşğul olanların
sayı 2000-ci ilə nisbətən təqribən
2 dəfə artaraq 35,1 min nəfərdən 69
min nəfərə çatıb.
Xarici işçi qüvvəsinin
artması da sübut edir ki, Azərbaycanda əmək ehtiyatları sahibkarlıq subyektlərinin
tələblərini tam ödəyə
bilmir.
2011-ci ildə istehsal sahələrində (kənd
təsərrüfatı, balıqçılıq,
sənaye və tikinti) 2,273 milyon min nəfər və ya iqtisadiyyatda məşğul olanların
ümumi sayının
52%-i qədər işçi çalışıb,
xidmət sahəsində
isə məşğul
olanların sayı
2,102 milyon nəfər
olub.
2011-ci ildə iqtisadiyyatda məşğul
olan əhalinin ümumi sayından 1,387 milyon nəfəri və yaxud 31,7%-i muzdla
işləyənlərin payına
düşüb. Muzdla işləyənlərin
əksəriyyəti iri
və orta müəssisələrdə əmək
fəaliyyəti ilə
məşğul olanlardır.
Son on iki il ərzində
(2000-2011-cu illər) muzdla
işləyənlərin orta
aylıq nominal əmək
haqqı 8,2 dəfə artaraq 364,2 manat təşkil edib və 2010-cu illə müqayisədə
9,9% artıb.
Əmək bazarı üçün
ən vacib məsələlərdən biri
bazarın elestikliyidir.
Dünya
Bankının bir araşdırmasına görə,
əmək bazarının
elastikliyi investisiya cəlb edən ölkənin nəzərə
almalı olduğu ciddi nüanslardandır.
İnvestisiya cəlb edən
ölkədə əmək
bazarı investorun öz ölkəsi ilə müqayisədə
nə qədər elastik olarsa investisiyanın həmin ölkəyə yatırılması
ehtimalı da bir o qədər böyük olar. Elastik əmək bazarının
mövcudluğu xüsusilə
də özəlləşdirmə
siyasətini yürüdən
ölkələr üçün
əhəmiyyətlidir. Dövlət
müəssisələrini satınalan şirkətlər
çox vaxt müəssisəni daha səmərəli və gəlirli etmək üçün işçilərin
sayını azaldır.
İş yerlərini
itirmişləri yeni işlə təmin etmək üçün elastik əmək bazarına ehtiyac var. Şirkətlər natamam iş günü işləyən işçiləri,
müvəqqəti işçiləri,
birdən çox iş yerində işləyən işçiləri
və müqavilə əsasında işləyən
işçiləri işə
götürmək imkanına
malik olmalıdır. Əgər bu mümkün deyilsə işsizlik daha da artar
və işçilər
qeyri-rəsmi iqtisadiyyata
üz tutarlar.
Əmək bazarının elastikliyi
ilə əlaqədar
ağır məhdudiyyətlərin
qoyulması biznes sahələrinə mənfi
təsir göstərir.
Öz işçi qüvvəsinin
həcmini öz biznes tələbatları
ilə uyğunlaşdıra
bilməyən firma öz
rəqabətədavamlılığını
itirə bilər.
Əmək xərcləri gəlirlərlə
müqayisədə elə
bir həddə çata bilər ki, şirkət bu xərcləri azalda bilmədiyi təqdirdə müflisləşə
bilər.
Bundan əlavə işçilərin
iş saatından əlavə saatlar işləmək imkanlarının
olması tövsiyə
edilir. Bəzi ölkələrdə işçinin
həftə ərzində
dəqiq iş vaxtı müəyyənləşdirilir.
Lakin sahibkarlar bazarın
tələblərinə uyğun
olaraq bəzi vaxtlarda işçinin əlavə vaxtlarda da işləməsinə
şərait yaradılmasında
maraqlıdır. Bundan əlavə
bir çox işçilər əlavə
saatlar işləyərək
əlavə pul qazanmaq istəyir. Həm işçiləri, həm
də işəgötürənləri
razı salmaq üçün qanunvericilik
işəgötürənlərin öz işçilərini
əlavə vaxtlatda işlətməyə icazə
verməsi iqtisadi baxımdan məqbul sayılır. Yalnız bir
şərtlə ki, əlavə işləməklə
sahibkar gəlir əldə etdiyi kimi işçi də mənfəət əldə etməlidir.
Bu cür elastiklik
xüsusilə də rəqabət şəraitində
davam gətirə bilmək daha çox işləməyə
məcbur olan kiçik sahibkarlıq subyektləri üçün
əhəmiyyətlidir.
Sahibkarlar üçün vacib məsələlərdən
biri də işçilərin öz
işlərini tələb
olunan səviyyədə
görməsidir. Bunun üçün
sahibkarlar işçilərin
peşə bacarıqlarının
artırılmasında maraqlı
olur, təlimləri təşkil edir.
Xarici ölkələrin təcrübəsi göstərir
ki, ölkədə məhsuldarlığın, iqtisadi
inkişafın davamlılığının
təmin edilməsinin
başlıca yolu əmək ehtiyatlarının
keyfiyyət göstəricilərinin
artırılmasıdır. Təcrübə sübut edib
ki, işçilər
keyfiyyətcə və
kəmiyyətcə artan
rifahla təmin olunarlarsa, son məhsul həddi də artar. Yaxud, işçilər daha savadlı və ya təcrübəlidirlərsə,
onların istehsal etdikləri son məhsul da artacaq. İnkişaf etmiş ölkələrdə
əmək haqqı ona görə yüksəkdir ki, bu ölkələr uzun illər boyu kifayət qədər kapital ehtiyatı toplaya və güclü əmək resursları yara bilib.
Son 10 illiklərdə
inkişaf etmiş ölkələrdə insanın
inkişafına xərclənən
vəsait dəfələrlə
artıb, əmək resurslarının ixtisaslaşması
yaxşılaşdırılıb.
Bunun nəticəsində əmək
haqqının ödənilməsində
ölkələr arasında
fərqlər də böyüyüb. İnkişaf etmiş ölkələrdə
inkişaf etməkdə
olan ölkələrə
nisbətən əmək
haqqı əhəmiyyətli
dərəcədə artıqdır.
Bu fərq əməyə
olan tələb və təklifdən irəli gəlir və iqtisadiyyat sahələrindən asılıdır.
Müasir dövrdə kənd
təsərrüfatında və ticarətdə əmək haqqı emal sənayesində və kommunikasiya sahəsində olduğundan
xeyli aşağıdır.
Çünki emal sənayesi
və kommunikasiya sahəsi yüksək elm tutumlu sahələrdir və burada işçilərdən daha
yüksək bilik tələb edilir. Deməli, əsas məsələ iş yerlərinin və işçilərin sayının
çox olması yox, keyfiyyətli əmək ehtiyatının
mövcudluğudur. Keyfiyyətli əmək ehtiyatına
sahib olan ölkələrdə
yaxşı inkişaf
etmiş sahibkarlar sinifi də olur. Hər ikisi - bilikli
işçi və işçinin qədrini bilən sahibkar olduqda inkişaf öz-özlüyündə baş
verir.
Vasif CƏFƏROV
Ekspress.-2012.-4 dekabr.-S.-9