Beynəlxalq velotur

Azərbaycanın idman imicini daha da yüksəldəcək

Əhalinin fiziki-mənəvi sağlamlığının etibarlı şəkildə təmini məqsədilə idmanın və bədən tərbiyəsinin kütləviləşməsi istiqamətində davamlı tədbirlər həyata keçirən Azərbaycan bir sıra beynəlxalq yarışlara da ev sahibliyi edir. Ulu öndər Heydər Əliyevin anadan olmasının 89-cu ildönümü münasibətilə mayın 9-dan 13-dək respublikada velosiped idmanı üzrə keçiriləçək beynəlxalq turnir də belə mötəbər tədbirlərdən biri kimi diqqətlə izlənir.

Azərbaycan Velosiped İdmanı Federasiyası, Milli Olimpiya Komitəsi, Gənclər və İdman Nazirliyi, Beynəlxalq Velosipedçilər İttifaqının birgə təşkilatçılığı ilə 5 mərhələdə keçiriləcək velotur respublikanın idman imicinin daha da yüksəldilməsi baxımından əhəmiyyətlidir. Azərbaycanı ilk peşəkar velosiped yarışında "ATA sport" və "Sumqayıt" komandalarının idmançıları təmsil edəcəklər. Turnirə hazırlıq mərhələsində komandalarımızın üzvləri Rusiya, Ukrayna və Almaniyada təlim-məşq toplantısında iştirak ediblər. Velosiped idmanı üzrə idmançıların hazırlanmasında, ümumilikdə bu idman növünün kütləviləşməsində xidmətləri olmuş məşqçi və mütəxəssislər isə respublikada beynəlxalq veloturun keçirilməsini tarixi hadisə kimi dəyərləndirirlər.

"Velotrek" Uşaq-Gənclər Olimpiya Ehtiyatları Mərkəzinin məşqçisi Elçin Qəhrəmanov bildirir ki, son illər respublikada idmanın ən müxtəlif növlərinin inkişafına göstərilən yüksək diqqət və qayğı, bu sahənin infrastrukturunun müasirləşdirilməsi istiqamətində həyata keçirilən tədbirlər velosiped idmanına marağı artırıb. Bu idman növünün Azərbaycanda müəyyən inkişaf yolu keçdiyini deyən E.Qəhrəmanov respublika idmançılarının tarixi uğurlarından söz açıb: "Azərbaycanın vaxtı ilə SSRİ yığma komandasında təmsil olunan adlı-sanlı velosipedçiləri olub. SSRİ-nin dağılmasından sonra isə idmanın bəzi növləri kimi, bu sahədə də durğunluq müşahidə olunurdu. Və mən də belə ağır şəraitdə məşqçilik fəaliyyətinə başlamışam. Təlim-məşq şəraitinin ağırlığına, lazımi avadanlıqların çatışmazlığına baxmayaraq, biz gənclərdə bu idman növünə marağı artıra, respublika səviyyəsində tanınan və beynəlxalq mükafatlara layiq görülən çoxlu sayda idmançı hazırlaya bildik. Belə idmançılardan Dmitri Kalinin, Tural Vəliyev, Faiq Həmidov, Rüfət Atakişiyev, Vüqar Salaxov, Dmitri Suçilin, Elçin Əsədov və başqalarının adlarını çəkə bilərəm".

Milli Olimpiya Komitəsi və Azərbaycan Velosiped İdmanı Federasiyasının son illərdə bu idman növünün inkişafı və təbliği yönümündə həyata keçirdiyi tədbirləri yüksək dəyərləndirən Qəhrəmanov bunun nəticəsi olaraq yeniyetmə və gənclər arasında veosiped idmanına marağın artdığını vurğulayır: "Müsbət haldır ki, hələ ötən əsrin 70-80-ci illərində Azərbaycanda əhali arasında xeyli populyar olan velosiped idmanının inkişafı istiqamətində son illərdə həyata keçirilən tədbirlər müsbət nəticələrini verir. Veosiped İdmanı Federasiyasının bu idman növünün ictimai əhəmiyyəti və inkişaf perspektivləri ilə bağlı apardığı təbliğati iş nəticəsində velosiped idmanına marağın artması müşahidə olunur. Bu idman növü ilə peşəkar səviyyədə məşğul olan və ilk uğurlarını qazanan idmançılarımızın da sayı getdikcə artır. Akif Abdullayev, Qurban Tağıyev və Tural İsgəndərov kimi gənclərin böyük uğurlar qazanacağına əminəm".

Elçin Qəhrəmanov hesab edir ki, Azərbaycanda ilk dəfə olaraq beynəlxalq velosiped turnirinin təşkil olunması respublikanın idman tarixinə əlamətdar hadisə kimi düşəcək. Onun fikrincə, ulu öndər Heydər Əliyevin xatirəsinə həsr olunmuş beynəlxalq velotur həm də Azərbaycanın beynəlxalq yarışları təşkil etmək üçün zəruri maddi-texniki bazaya, idman infrastrukturuna malik qüdrətli dövlət olmasından xəbər verir. Beynəlxalq idman tədbirinin yüksək səviyyədə təşkil olunduğunu bildirən E.Qəhrəmanov azərbaycanlı velosipedçilərin bu gərgin yarışda uğurlu nəticələr qazanacağına inanır. O hesab edir ki, velotur ümumilikdə respublikada velosiped idmanının populyarlaşmasına ciddi təkan verəcək: "Hesab edirəm ki, bu tədbir Azərbaycanın velosiped idmanının inkişafında tamamilə yeni mərhələnin əsasını qoyacaq. Velotur insanlar arasında velosiped idmanına marağı gücləndirəcək. Arzu edirəm ki, belə turnirlərin keçirilməsi ənənə halını alsın və Azərbaycanda "Tur de Frans", "Deciro de İtaliya" səviyyəli velosiped yarışları keçirilsin. Biz də öz növbəmizdə idmançılarımızın bu və digər beynəlxalq yarışlarda, olimpiya meydanlarında uğurlu nəticə qazanmaları üçün əlimizdən gələni edəcəyik".

Samir MUSTAFAYEV

Ekspress.- 2012.- 8 may.- S.9.