İKT ili uğurla davam edir

RİTN: Ölkədə iqtisadi sahədə ən yüksək artım İKT sektorunda qeydə alınıb

"Hazırkı il - "İnformasiya-kommunikasiya texnologiyaları ili" Azərbaycanda uğurla başlayır". Bunu Azərbaycan prezidenti İlham Əliyev Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı yekun nitqində bildirib.

İlham Əliyev deyib ki, Azərbaycan kosmik dövlətdir. "Bu, böyük, tarixi nailiyyətdir. "Azərspace-1" peyki orbitdədir. Artıq idarəçilik də Azərbaycana verilib. Biz bu peyki Bakıdan idarə edirik" deyən dövlət başçısı Azərbaycanın artıq tərəfdaşlarla ikinci, üçüncü peykin orbitə buraxılması ilə bağlı danışıqlara başladığını bildirib. "Bu da bir yenilik, müasirlik, inkişafdır", - deyə İlham Əliyev vurğulayıb.

Ölkə prezidenti onu da bildirib ki, İKT sahəsindəki layihələr korrupsiyaya və rüşvətxorluğa qarşı mübarizəyə xidmət edir. Belə ki, İ.Əliyevin sözlərinə görə, "Elektron xidmət", "Elektron hökumət" layihələri bu istiqamətdə atılan çox önəmli addımlardır. "Məmur-vətəndaş ünsiyyəti bu istiqamətdə minimuma endirilməlidir. Yenə də inkişaf etmiş ölkələrin təcrübəsini biz maksimum dərəcədə tətbiq etməliyik. Buna görə də Azərbaycanda İKT sektorunun inkişafına daha da böyük diqqət göstərilməlidir və göstəriləcək".

Yeri gəlmişkən, dünən Rabitə və İnformasiya Texnologiyaları Nazirliyinin (RİTN) 2013-cü ilin birinci rübünün yekunlarına dair kollegiya iclası keçirilib. RİTN-nin mətbuat xidmətindən verilən məlumata görə, iclası giriş sözü ilə açan rabitə və informasiya texnologiyaları naziri Əli Abbasov Azərbaycan Respublikasının prezidenti İlham Əliyevin sədrliyi ilə Nazirlər Kabinetinin 2013-cü ilin ilk rübünün sosial-iqtisadi inkişafının yekunlarına həsr olunmuş iclasda nitqindən irəli gələn vəzifələr barədə danışaraq, ötən müddətdə respublikada aparılan uğurlu iqtisadi islahatlar nəticəsində qeyri-neft sektorunun dinamik inkişafına və artım tempinə nail olunduğunu qeyd edib.

Sürətli inkişafda qeyri-neft sektorunun aparıcı sahəsi kimi informasiya-kommunikasiya texnologiyalarının (İKT) müstəsna yeri olduğunu da vurğulayan nazir "İKT ili" çərçivəsində bu sahənin üzərinə daha böyük vəzifə və öhdəliklərin düşdüyünü xatırladaraq, sektorun inkişafı ilə bağlı gələcək plan və perspektivlərdən söz açıb.

Daha sonra kollegiya iclasında cari ilin birinci rübü ərzində rabitə və informasiya texnologiyaları sektorunda görülmüş işlər və əldə olunan nəticələr barədə məruzə dinlənilib. Bildirilib ki, ölkədə iqtisadi sahədə ən yüksək artım 14,3 faiz olmaqla, İKT sektorunda qeydə alınıb. Sonra RİTN-in bir sıra birlik və müəssisələrinin rəhbərləri çıxış ediblər.

Kollegiyaya yekun vuran nazir gələcək hədəflərə toxunaraq, ölkə başçısının sahə ilə bağlı müvafiq fərman və sərəncamları, o cümlədən dövlət proqramlarında nazirliyin üzərinə düşən vəzifələrin birmənalı şəkildə icrasının vacibliyini qeyd edib. Nazir "İKT ili" çərçivəsində qabaqcıl texnologiyaların istehsalı və ixracı ilə məşğul olacaq özəl və innovativ sahibkarlığın inkişafı üçün xüsusi mühitin yaradılması, korrupsiyaya qarşı mübarizə tədbirləri kimi, "E-hökumət", "Elektron imza", ümumilikdə elektron xidmətlərin həcminin artırılması və sürətləndirilməsi, eyni zamanda genişzolaqlı internet xidmətlərinin ölkənin bütün ərazisində tətbiqi ilə bağlı layihəyə başlanılması, rəqəmli TV yayımı, poçt sahəsində qeyri-ənənəvi xidmətlərin genişləndirilməsi, informasiya təhlükəsizliyi, o cümlədən RİTN sahəsində çalışan məmurların vətəndaşlarla ünsiyyətinin yaxşılaşdırılması, göstərilən xidmətlərin keyfiyyətinin yüksəldilməsi, "Bakutel" sərgi-konfransına hazırlıq işlərinin aparılması, ümummilli lider Heydər Əliyevin 90 illik yubileyi ilə əlaqədar möhtəşəm aksiya və tədbirlərin, həmçinin bu il ölkədə keçiriləcək prezident seçkiləri prosesində Mərkəzi Seçki Komissiyası ilə birgə İKT-nin tətbiqinin yüksək səviyyədə təşkili ilə bağlı müvafiq tövsiyə və tapşırıqlarını verib.

Ekspress.-2013.-18 aprel.-S.9.