Rəssamlıqla çörək pulu qazanmaq çətindir

"Bəzən elə hallar olur ki, sifarişçi rəsmi sifariş etsə də, rəsm hazır olandan sonra almaq istəmir"

Təsviri sənətin növü olan rəssamlıq insanın mənəvi aləmindəki duyğularını cəmiyyətlə bölüşməyin ən gözəl yoludur. Rəsm əsərləri həmişə insanları maraqlandırıb və onları valeh edib. Buna baxmayaraq, bizdə rəsm əsərləri alanların sayı elə də çox deyil. Mütəxəssislərin fikrincə, rəsm əsərləri həm bahalığına, həm də rəssamlar üçün lazımi şəraitin olmamasına görə az satılır. Rəssamlar çox vaxt rəsm əsərləri satılmadığı üçün maddi cəhətdən sıxıntılar yaşayır.

Rəssam Şənər Cəbrayılovun sözlərinə görə, rəsm çəkməyə uşaqlıqdan başlayıb: "Uşaqlıqda böyük qardaşımın daim rəsm çəkdiyini görürdüm. Mən də ona baxıb həvəslənirdim. Çəkməyə başlayanda isə yaxşı alındığını gördüm. Elə o vaxtlardan rəsm çəkirəm".

İşini çox sevən Ş.Cəbrayılov rəsm alanların sayının getdikcə azaldığından təəssüflənir: "Çətinliklə dolanıram. Alıcılarım yoxdur. Bizdə rəssamlığa, rəsm almağa maraq yoxdur" deyən həmsöhbətimizə görə, bunun da səbəbi insanların rəsm əsəri almağa pullarının çatışmamasıdır. Dediyinə görə, rəsmləri maddi cəhətdən yaxşı təmin olunmuş adamlar alırlar. "Amma elə adamlar da var ki, bu sənətin vurğunudurlar. Evdə yeməyə çörəkləri belə olmayanda onlar bəyəndiyi rəsmi alırlar".

Çəkdiyi rəsm əsərlərinin qiymətinə gəlincə, rəssam qeyd edib ki, o rəsmləri müxtəlif qiymətə satır: "Elə rəsm əsəri var ki, onu 50 manata, eləsi də var 1000 və daha baha satıram".

Çox vaxt rəsmləri hədiyyə vermək üçün aldıqlarını deyən müsahibimin sözlərinə görə, əsasən gənc oğlanlar sevdikləri qızların fotolarını gətirib portret sifariş verirlər. "Portretlərin qiymətləri fərqlidir. 50 manata ağ-qara, 200 manatdan yuxarı isə rəngli portretlər çəkirəm. Portretlərin qiyməti ölçüsünə görə də fərqlənir. Evdə gedib çəkdiyim rəsmləri 2000-3000 manata satıram. Bəzən isə elə hallar olur ki, sifarişçi rəsmi sifariş etsə də rəsm hazır olandan sonra almaq istəmir. Belə rəsmlər özümdə qalır. Onların pulunu da heç vermirlər. Bəzən olur ki, kimsə öz görünüşünü bəyənmədiyi, reallıqda daha yaraşıqlı olduğunu zənn etdiyindən rəsmi özümə qaytarırlar".

Müsahibimiz deyir ki, sevdiyi rəsmlərdən ayrılmaq onun üçün çətindir. O, indiyədək üç rəsmi satdığı üçün peşmandır: "Onları tələbəlik illərimdə çəkmişəm. Üçü də naturmort idi. Onları satdığım üçün bu günə qədər məyus oluram".

Cəbrayılov adətən payız mənzərələrini çox çəkir. "Bəziləri düşünür ki, payız insanı kədərləndirən fəsildir. Amma rəssam üçün payızı təsvir etmək müxtəlif rənglərlə işləməkdir. İnsanları da cəlb edən məncə, payızın rəngləridir. Ümumiyyətlə, payızla bağlı rəsmləri daha çox alırlar".

İçərişəhərdə yerləşən qalereyalardan birinin müdiri rəssam Eldəniz Quliyevin sözlərinə görə, rəsmləri əsasən turistlər alır. Yerli adamlar isə nadir hallarda rəsm əsərlərini alırlar. "Elə olur ki, ay ərzində 2-3 əsər satılır, bəzən isə heç biri də satılmır. Rəsmlər müxtəlif qiymətlərə satılır. Qalereyada ən ucuz rəsm əsəri 100-150 manatadır. Qalereyaya gələnlər daha çox köhnə Bakının çəkildiyi rəsmləri və naturmortları alırlar" deyən Quliyev ümumiyyətlə, son illər gənclərdə rəssamlığa marağın artdığını bildirir.

Rəssam Əhməd Vəliyev isə bu sənətlə çörək pulu qazanmağın çətin olmasından şikayətlənir. "Çəkdiyimiz zəhmətin əvəzini ala bilmirik. Əvvəllər rəssamlar "Fəvvarələr bağı"nda öz rəsmlərini satırdılar. İndi isə çəkdiklərimizi satmaq üçün belə bir yer yoxdur. Rəssamlar ya məcbur olur kirayə obyekt tutub öz rəsmlərini orada satır, ya da qalereyalara verirlər. Qalereyalar isə rəsmləri ucuz alıb, baha satır".

Dolanmaq üçün kirayə obyekt götürən müsahibim hər ay bəzən borc götürüb 400-500 manat balaca otaq üçün ödəyir. "Rəsm çəkərkən çox zəhmət tələb olunsa da, rəsmlərə görə verilən pul azdır. Bəzən bir neçə ayını sərf edib bir rəsm çəkirsən, onu da cəmi 300 manata sata bilirsən. Heç olmasa ailəmi dolandırmaq və sənətimi davam etdirmək üçün rəssamlıq kursu da açmışam. Bir dərsi 10 manata öyrədirəm. Amma kursa gələnlər də azdır. Bəzi aylar isə nə rəsmlər satılır, nə də kursa gələnlər olur".

Aynurə MƏMMƏDOVA

Ekspress.-2013.-25 aprel.-S.14.