"Bakutel-2013": İKT sərgisinin nüfuzu və önəmi artır

İnformasiya və kommunikasiya texnologiyalarının inkişaf etdirilməsi

Bakı Ekspo Mərkəzində təşkil edilən "Bakutel 2013" 19-cu Azərbaycan Beynəlxalq "Telekommunikasiya və İnformasiya texnologiyaları" sərgi işini yekunlaşdırıb. Azərbaycan Respublikası Rabitə və İnformasiya Texnologiyaları Nazirliyinin (RİTN) fəal dəstəyi ilə "Iteca Caspian" və "ITE Group Plc" şirkətləri tərəfindən təşkil edilən sərgi və həmçinin konfrans 4 gün davam etdi. Sərginin sponsoru isə informasiya texnologiyaları sahəsində ən iri ABŞ şirkətlərindən biri olan "HP" şirkəti idi.

Rəsmi məlumata görə, informasiya-kommunikasiya texnologiyaları (İKT) sahəsində Xəzər və Qafqaz regionlarının ən böyük tədbiri məhz "Bakutel" sərgisidir. Bu mənada ötən illərdə təşkil edilən sərgilər kimi dekabrın 2-5 tarixlərində baş tutan sərgi-konfrans da sadəcə Azərbaycan üçün deyil, həm də yaxın region üçün böyük əhəmiyyət kəsb edirdi. Bu il Azərbaycanda "İKT ili" elan edilməsi də sərginin əhəmiyyətini artıran əsas hadisələrdən olub. Yeri gəlmişkən, beynəlxalq sərgi elə "İKT ili" şüarı altında keçirilib. Ölkəmizdə 2013-cü ilin "İKT ili" elan olunması "Bakutel 2013" sərgisinin bütün ekspozisiyasında öz əksini tapdı. "İKT İli" çərçivəsində bu sərgi və konfransın keçirilməsi, kibertəhlükəsizlik üzrə konfransın və digər mühüm tədbirlərin sərgi proqramına daxil edilməsi, eləcə də sərgidə aparıcı şirkətlərin geniş surətdə təmsil olunması bu tədbirin önəmini daha da artırdı.

İKT sahəsində Azərbaycanın bilavasitə iştirak etdiyi bir çox beynəlxalq və yerli layihələr hazırkı sərgidə nümayiş etdirilib. Burada İKT inkişafının bütün sektorları, o cümlədən telekommunikasiya və şəbəkələr, geniş zolaqlı, peyk və simsiz rabitə və texnologiyaları, teleradio yayım avadanlığı və texnologiyaları, proqram təminatı və avtomatlaşdırma sistemləri, habelə informasiya texnologiyaları və ofis texnologiyaları mütəxəssislərin diqqətinə təqdim olundu.

RİTN-nin sərgi-konfransın yekunlarına dair məlumatında qeyd edilir ki, İKT üzrə sərgi və konfranslar sektor üzrə əldə olunan nailiyyətlərin nümayiş etdirilməsi, texniki və texnoloci yeniliklərlə tanış olmaq, qabaqcıl təcrübə mübadiləsi və faydalı əməkdaşlıq üçün əlverişli platforma rolunu oynayır. Bu kontekstdə dünyanın bir çox aparıcı İKT şirkətlərinin iştirakı ilə dekabr ayının 2-dən start götürən Xəzər və Qafqaz regionlarının telekommunikasiya və informasiya texnologiyaları sahəsində ən böyük tədbir olan "Bakutel 2013" sərgi-konfransı xüsusi əhəmiyyət kəsb edir. Dekabrın 5-də öz işini yekunlaşdıran sərgi-konfrans Azərbaycan Respublikasının prezidenti İlham Əliyevin sərəncamı ilə elan edilən "İKT ili" çərçivəsində xüsusilə əlamətdar oldu. Bu əlamətdar ildə "Bakutel" sərgisi ilk dəfə olaraq ümumilikdə 12000 kvadratmetrlik üç zalı əhatə edir. Bu il sərginin sahəsi də 35 faiz genişlənərək, dünyanın 28 ölkəsindən 300 şirkəti bir araya gətirməyə nail oldu.

Bu il sərgi təkcə iştirakçıların sayına görə deyil, həm də sərgi çərçivəsində keçirilməsi nəzərdə tutulan tədbirlərin sayına görə ən zəngin sərgi oldu. Belə ki, bu tədbirlər sırasında internetin inkişafı, kibertəhlükəsizlik, internetin Azərbaycanda təkamülü və regional inkişafı mövzularında müxtəlif seminar və konfranslar, o cümlədən "Qlobal kibertəhlükəsizlik üzrə əməkdaşlıq: problemlər və perspektivlər" mövzusunda beynəlxalq konfrans, "TASİM" konsorsiumunun əsas telekommunikasiya operatorlarının illik forumu, Azərbaycan - ABŞ, "Azərbaycan - İsrail İKT forumları, Müəyyən radiotezlik zolaqlarının perspektiv və səmərəli istifadəsi ilə bağlı yüksəksəviyyəli görüş, BMT-nin Asiya və Sakit okean ölkələri üçün iqtisadi və sosial komissiyasının "SPECA" layihəsinin işçi qrupunun "Biliyə əsaslanan iqtisadiyyatın inkişafı" mövzusunda iclasları, Azərbaycanda dövlət və özəl İKT sektorları arasında tərəfdaşlıq üzrə mütəxəssis mərkəzinin yaradılması ilə əlaqədar olan tədbir yer aldı.

Məlumatda daha sonra qeyd edilir ki, tədbirin birinci günü Azərbaycan prezidenti İlham Əliyev sərgini ziyarət etdi. Prezident bütün zallara daxil olaraq həm yerli, həm də aparıcı xarici şirkətlərin stendləri ilə tanış oldu. Həmçinin, ölkə başçısı RİTN-nin stendində keçirilən Dünya Azərbaycanlılarının II Virtual Konfransında da iştirak etdi. Sərgi ilə tanışlıq zamanı dövlət başçısı "Euronews" telekanalına müsahibə verdi.

Artıq uzun illərdir ölkə başçısı sərgini ziyarət edir, nümayiş olunan yeniliklərlə tanış olur. Bu fakt sərgiyə, ümumiyyətlə, informasiya-kommunikasiya sektoruna ən ali səviyyədə göstərilən diqqəti nümayiş etdirir. Azərbaycan prezidentinin "Bakutel 2013" sərgi-konfransının iştirakçılarına ünvanladığı təbrik məktubundan da bunu hiss etmək mümkündür. Məktubda qeyd edilir ki, hər il Azərbaycanda həyata keçirilən beynəlxalq "Bakutel" sərgi və konfransı müxtəlif ölkələrdən təşkilatları, alimləri və mütəxəssisləri bir araya gətirərək ideya mübadiləsi, işgüzar münasibətlərin genişləndirilməsi, habelə qabaqcıl texnoloci nailiyyətlər və yeni məhsullarla tanışlıq üçün əlverişli şərait yaradır.

Məlumatda bildirilir ki, sərgidə Azərbaycanın aparıcı İKT şirkətləri, mobil rabitə operatorları, internet provayderləri, sistem inteqrasiyası üzrə şirkətlər və distribüterlərin geniş şəkildə təqdim olunması artıq ənənə halını alıb. Sərgi eksponentlərinin 40 faizini daimi iştirakçılar təşkil edir. Sərginin fəaliyyət göstərdiyi illər ərzində əsas nailiyyətlərdən biri də yerli şirkətlərin ildən-ilə artması və bu il iştirakçıların ümumi sayının 30 faizini təşkil etməsidir.

Budəfəki sərgini fərqləndirən xüsusiyyətlərdən biri də RİTN-nin fəal dəstəyi ilə təşkil edilən milli stendlərin sayca daha çox olması idi. Burada "Trans-Avrasiya Super İnformasiya Magistralı" (TASİM) layihəsi, Azərbaycanın kosmik sənayesi və Azərbaycanda İT texnoparkının yaradılması layihələri də öz əksini tapdı. Bu il Azərbaycanda vüsət alan "startup" hərəkatına böyük diqqət yetirildi və Bakı Ekspo Mərkəzində onların təqdimatı üçün xüsusi olaraq ayrılmış zonalardan əlavə, "Azərbaycanda milli startupların dəstəklənməsi" mövzusunda konfrans keçirildi.

Sərginin daha çox ölkələrin diqqətini cəlb etməsi və nüfuzunun artması danılmaz faktdır. Hər il dünyanın müxtəlif ölkələri böyük həvəslə sərgidə iştirak can atır. Bu il də istisna olmadı. ABŞ, Əfqanıstan, Macarıstan, İtaliya, İsrail və digər ölkələrin nümayəndə heyəti "Bakutel" sərgisində iştirak etmək üçün Bakıya gəldilər, öz xidmət və məhsullarını nümayiş etdirdilər, işgüzar görüşlər keçirdilər və sərgi çərçivəsində keçirilən beynəlxalq konfranslar da iştirak etdilər.

Sərgidə mötəbər qonaqlar da iştirak edib. Onların arasında Beynəlxalq Telekommunikasiya İttifaqının (BTİ) Baş katibi Hamadun Ture, Macarıstanın milli inkişaf naziri xanım Jujanna Nemet, Avropa Parlamentinin üzvü xanım Kristina Oyuland, Regional Rabitə Birliyinin Baş direktoru Nuriddin Muxitdinov, Rusiya, İraq, Banqladeş kimi ölkələrin müvafiq nazirləri var idi. Qonaqlar sərginin telekommunikasiya sahəsində çalışan mütəxəssis və alimlərin məhsuldar fəaliyyəti üçün görüş yeri və biznes meydançası kimi yüksək rolunu vurğulayıblar.

Rusiyanı sərgidə rabitə və kütləvi kommunikasiyalar naziri Nikolay Nikiforov təmsil edib. Rusiyalı nazirin başçılığı ilə Rusiya nümayəndə heyəti 19-cu Azərbaycan Beynəlxalq İKT sərgi və konfransına baş çəkib. Nikolay Nikiforovun fikrincə, sərgi sənayenin vacib hadisəsidir və çoxsaylı şirkətlərin hər il texnoloci tərəqqinin ən son yeniliklərini və nailiyyətlərini təkcə bu sahənin mütəxəssisləri və peşəkarlarına deyil, həm də sıravi ziyarətçilərə nümayiş etdirməsi sevindirici haldır.

Sərginin yekununda xarici iştirakçılar tərəfindən "Bakutel"i bu sahənin ən əsas və oricinal sərgisi statusunu təsdiq etdiyi bir daha vurğulandı. Bu beynəlxalq tədbirdə ziyarətçilər həm iştirakçıların, həm də təşkilatçıların hazırladıqları saysız-hesabsız sürprizlərlə qarşılandı. Bu il sərgi rəsmi və işgüzar qrafiki ilə yanaşı, əyləncəli və maraqlı anlarla da yadda qaldı.

Sərginin elə ilk günü yüksək moda nümayişi ilə bağlı möhtəşəm şou baş tutdu. Üçüncü pavilyonda xüsusi oyun zonası yerləşdirilmişdi və burada hər kəs "lazer simlərində ifa" oyununda iştirak edərək hətta musiqi bəstələmək kimi zövqlü imkan əldə etdi. Bu zonada həmçinin "X-box" oyun qurğuları və interaktiv oyunlarla yaxından tanış olmaq mümkün idi. Sərgidə MDB ölkələri arasında ilk dəfə olaraq məhz Azərbaycanda "Titan" adlı robot nümayiş etdirildi.

"Bakutel" sərgisi 1995-ci ildən keçirilir və son 19 ildə hər il təşkil olunub. Burada Azərbaycandan 22 İKT şirkəti, o cümlədən özəl, dövlət, qeyri-hökumət təşkilatları və onların rəhbərləri iştirak ediblər. Sərgidə Azərbaycanın milli pavilyonu üçün ayrılan 156 kvadratmetrlik sahədə ölkəmizdə həyata keçirilən genişmiqyaslı layihələr, o cümlədən "Azerspace", "Elektron hökumət" həlləri, "Dilmanc" layihəsi, nanotexnologiyalar, rəqəmli televiziya, son mobil texnologiyalar olan "3G" və "4G" xidmətləri, eyni zamanda ölkədə elm və texnologiyalar sahəsində ən son elmi nailiyyətlər nümayiş olunub. Burada həmçinin xarici iştirakçılar tərəfindən telekommunikasiya və şəbəkələr, informasiya texnologiyaları və ofis texnologiyaları, kabel və simsiz rabitə, peyk rabitəsi və texnologiyaları, televiziya və radioyayım avadanlıqları və texnologiyaları, bank texnologiyaları və xidmətləri, təhlükəsizlik sistemləri, genişzolaqlı rabitə və texnologiyalar, proqram təchizatı və avtomatlaşdırma sistemləri, e-hökumət və e-təhsil haqqında məhsullar təqdim edildi.

Vasif CƏFƏROV

Ekspress.- 2013.- 10 dekabr.- S. 9.