"Bakutel" regionun ən böyük İKT sərgisidir

İnformasiya və kommunikasiya texnologiyalarının inkişaf etdirilməsi

Dekabrın 2-dən 5-dək Bakı şəhərində telekommunikasiya və informasiya texnologiyaları sahəsində Xəzər və Qafqaz regionlarının ən böyük tədbiri - "Bakutel 2013" 19-cu Azərbaycan Beynəlxalq "Telekommunikasiya və İnformasiya texnologiyaları" sərgisi keçiriləcək. "Bakutel 2013" sərgisində son illər Azərbaycanda və dünyada İKT sahəsində əldə olunan nailiyyətlər nümayiş etdiriləcək.

Sərginin təşkilatçıları qismində "Iteca Caspian" MMC və onun tərəfdaşı "ITE Group plc" şirkəti çıxış edir. Təşkilatçıların məlumatına əsasən, dünyanın 25-dən çox ölkəsindən, o cümlədən Belorus, Çin, Malayziya, Rusiya, Sloveniya, ABŞ, Ukrayna, Yaponiya və digər ölkələrdən 269 şirkət sərgidə iştirakını təsdiqləyib. Ənənəvi olaraq, aparıcı İKT şirkətləri, Azərbaycanın mobil rabitə operatorları, internet provayderləri, sistem inteqratorları və məşhur markaların distribyutorları sərgidə çıxış edəcəklər. Builki sərginin fərqləndirici cəhəti çoxsaylı milli stendlərin iştirakı olacaq və bu stendlər sərgidə Azərbaycan Respublikası Rabitə və İnformasiya Texnologiyaları Nazirliyinin fəal dəstəyi ilə iştirak edirlər. Belorus, Macarıstan, İsrail, İspaniya, Kanada, Latviya, Litva, Fransa, Xorvatiya, Estoniya və bir sıra digər ölkələrin milli stendləri də sərgidə geniş şəkildə təqdim olunacaq. Əfqanıstan, İtaliya, İraq və ABŞ-dan olan milli qruplar isə sərgidə ilk dəfə iştirak edəcəklər. Bu il "Bakutel" sərgisinin baş sponsoru sərginin daimi iştirakçısı, habelə informasiya texnologiyaları sahəsində ən böyük amerikan şirkətlərindən biri olan "HP" şirkətidir.

Sərgidə Trans-Avrasiya Super İnformasiya Magistralı ("TASIM") layihəsi, Azərbaycanın kosmik sənayesi və Azərbaycanda İT texnoparkının yaradılması layihəsi öz əksini tapacaq. Bu il Azərbaycanda vüsət alan "startup" hərəkatına böyük diqqət yetirmək nəzərdə tutulur və Bakı Ekspo Mərkəzində onların təqdimatı üçün xüsusi olaraq ayrılmış zonalardan əlavə, "Azərbaycanda milli startup-ların dəstəklənməsi" mövzusunda konfrans keçiriləcək.

Bu il sərgi təkcə iştirakçıların sayına görə deyil, həm də sərgi çərçivəsində keçirilməsi nəzərdə tutulan tədbirlərin sayına görə ən zəngin sərgi olacaq. Belə ki, tədbirlər sırasında internetin inkişafı, kibertəhlükəsizlik, internetin Azərbaycanda təkamülü və regional inkişafı mövzularında müxtəlif seminar və konfranslar, "TASIM" konsorsiumunun əsas telekommunikasiya operatorlarının illik forumu, "Azərbaycan-ABŞ" İKT forumu, BMT-nin Asiya və Sakit okean ölkələri üçün iqtisadi və sosial komissiyasının "SPECA" layihəsinin işçi qrupunun "Biliyə əsaslanan iqtisadiyyatın inkişafı" mövzusunda iclasları, Azərbaycanda dövlət və özəl İKT sektorları arasında tərəfdaşlıq üzrə mütəxəssis mərkəzinin yaradılması ilə əlaqədar olan tədbir yer alır. "Bakutel" sərgisinin mühüm tədbirlərindən biri Dünya Azərbaycanlılarının I Virtual Konfransı olacaq. Lakin tədbirlərin siyahısı bununla bitmir, belə ki, müxtəlif seminar və konfransların keçirilməsi barədə təkliflər hələ də daxil olmaqdadır. Sözügedən tədbirlər çərçivəsində bu sahənin beynəlxalq strukturları ilə bir sıra memorandumların imzalanması baş tutacaq.

Azərbaycanda "İKT ili" ilə əlaqədar olaraq, sərgidə ziyarətçi və iştirakçılar üçün xüsusi proqram nəzərdə tutulub. Bakı Ekspo Mərkəzinin ziyarətçiləri və sərgi iştirakçıları üçün çoxlu sürpriz, müsabiqə və viktorinalar hazırlanıb. Burada hər kəs lazer şousunun iştirakçısı ola biləcək. Zalların birində ən yeni texnoloci vasitələrdən istifadə etməklə xüsusi oyun zonası quraşdırılacaq. Ziyarətçiləri isə xüsusi olaraq sərgi qonaqlarını salamlamaq üçün "Bakutel" sərgisinə gəlmiş dünyaca məşhur "Titan" robotu qarşılayacaq. "Titan" robotu Tokiodan tutmuş Vankuverə qədər bütün dünya ölkələrində olub. Bu robot Əbu-Dabidə Qran-pri Formula 1 yarışında ("ABU DHABI F1 GRAND PRIX") qonaq olub və iri şirkətlərin, eləcə də məşhur brend və markaların təqdimatlarında iştirak edib. "Titan" robotu dünya miqyaslı superulduz Rihannanın konsert turnesini də uğurla müşayiət edib. "Titan" robotunun Uill Smit (Will Smith), Ceki Çan (Cackie Chan), Robert Douni-oğul (Robert Downey Cr), Adam Sandler (Adam Sandler), Keyti Perri (Katy Perry), Stiv Karel (Steve Carell), Snup Doq (Snoop Dogg), Castin Biber (Custin Bieber), Kris Rok (Chris Rock) və Teylor Svift (Taylor Swift) kimi məşhurlar üçün kəşfində Rihannanın simvolik rolu var.

Sərginin inkişafında və təşəkkül tapmasında Azərbaycan Rabitə və İnformasiya Texnologiyaları Nazirliyi mühüm rol oynayıb və "Bakutel" sərgisinə ciddi dəstək göstərir. "Bakutel" Xəzər və Qafqaz regionlarının ən böyük sərgisi sayılır. Sərgi 1995-ci ildən keçirilir və son 19 ildə hər il təşkil olunub. Bakı sərgisinin beynəlxalq nüfuzu bu sahə üzrə beynəlxalq təsisatların, o cümlədən Birləşmiş Millətlər Təşkilatı (BMT), Beynəlxalq Elektrik Rabitə İttifaqı (ITU) və Regional Rabitə Birliyinin (RRB) dəstəyi, habelə Ümumdünya Sərgi Sənayesi Assosiasiyasının (UFI) keyfiyyət nişanı ilə təsdiq olunur.

Xatırladaq ki, sərgi son illərdə bir qayda olaraq noyabr ayında keçirilib. Lakin bu il bir qədər gec keçirilməsi planlaşdırılıb. Sərginin keçirilmə vaxtının dekabr aygna çəkilməsini noyabrın 19-22 noyabr tarixlərində Taylandın Banqkok şəhərində İKT üzrə BMT-nin ixtisaslaşmış agentliyi olan Beynəlxalq Telekommunikasiya İttifaqının (BTİ) nüfuzlu "ITU Telecom World 2013" sərgi-konfransının təşkil edilməsi ilə bağlıdır. Qlobal telekommunukasiya və informasiya texnologiyalarfna həsr olunan bu konfransda ölkəmiz rabitə və informasiya texnologiyaları naziri Əli Abbasovun rəhbərlik etdiyi nümayəndə heyəti ilə təmsil olunur.

"ITU Telecom World 2013" sərgisində Azərbaycandan 22 informasiya yexnologiyaları şirkəti, o cümlədən özəl, dövlət, qeyri-hökumət təşkilatları və onların rəhbərləri iştirak edirlər.

Sərgidə "Azerspace", Trans-Avrasiya Super İnformasiya Magistralı (TASİM), "Elektron hökumət" həlləri, "Dilmanc" layihəsi, nanotexnologiyalar, rəqəmli televiziya, son mobil texnologiyalar olan "3G" və "4G" xidmətləri, eyni zamanda ölkədə elm və texnologiyalar sahəsində ən son elmi nailiyyətlər nümayiş etdirilir.

Bu sərgi qədər olmasa da hər halda "Bakutel" sərgisinin də beynəlxalq nüfuzunun ildən-ilə artması, daha çox şirkətin sərgiyə maraq göstərməsi onun əhəmiyyətini artırır. "Bakutel" sərgisi keçirildiyi illər ərzində ölkənin telekommunikasiya bazarının ayrılmaz hissəsi olan aparıcı hadisəyə çevrilib. Sərgi telekommunikasiya və informasiya texnologiyaları sektorunun bütün nailiyyətlərini nümayiş etdirmək, qeyri-adi ideya və layihələri təqdim etmək, habelə müzakirələr, danışıqlar və yeni-yeni uğurların təməlini təşkil edən biznes münasibətlərini qurmaq üçün bir platforma kimi bir çox ölkənin mütəxəssis, ekspert və sahə peşəkarlarının diqqətini cəlb edir. Bu mənada "Bakutel" ölkəmizdə İKT-nin ən müxtəlif sahələrində əldə olunan mühüm nailiyyətlərin beynəlxalq işgüzar dairələrə çatdırılması, təşəbbüskarı və bilavasitə iştirakçısı olduğumuz regional və beynəlxalq İKT layihələrinin həyata keçirilməsi, eləcə də qarşılıqlı faydalı əməkdaşlığın və təcrübə mübadiləsinin genişləndirilməsi baxımından olduqca əhəmiyyətlidir.

Rabitə və informasiya texnologiyaları nazirinin müavini Elmir Vəlizadə bir müddət öncə "Bakutel-2013" telekommunikasiya sərgisi ilə bağlı keçirilən iclasda qeyd etdiyi kimi sözügedən tədbir əhəmiyyət baxımından digərlərindən fərqlənir. 2013-cü ilin "İKT ili" olduğunu xatırladan nazir müavini Azərbaycanın İKT sahəsində əldə etdiyi nailiyyətlərin həm ölkə ictimaiyyətinə, həm də dünyaya hərtərəfli çatdırılmasının vacibliyini bildirib. O deyib ki, bu il keçirilən "Bakutel-2013" sərgisi mahiyyət və tərkib baxımından da fərqlənir. "Bakutel" çərçivəsində 12-yə yaxın paralel tədbirin keçirilməsi planlaşdırılıb. Bununla belə, çox əhəmiyyətli bir mövzuda - kibertəhlükəsizlik məsələlərinə həsr edilən konfrans keçiriləcək. Bu, bütün dünyanın diqqətində olan məsələdir. İnternet forumu ilə bağlı tədbirlərin reallaşdırılması nəzərdə tutulub. Bununla yanaşı, ikitərəfli biznes-forumların düzənlənməsi planlaşdırılan məsələlərin tərkib hissəsidir.

Daha sonra o bildirilib ki, "Bakutel-2013" telekommunikasiya və informasiya texnologiyaları sərgi-konfransı çərçivəsində Regional Rabitə Birliyinin üzvlərinin görüşü nəzərdə tutulub. Bu zaman bir sıra məsələlər müzakirə olunacaq və çıxışlar dinləniləcək.

Qeyd edək ki, "Bakutel-2013" çərçivəsində dünya Azərbaycanlılarının I virtual konfransına da start veriləcək. Bu konfransı RİTN ilə Diasporla iş üzrə Dövlət Komitəsi birgə keçirəcək. Dünyanın 8 dayaq nöqtəsindən konfransa birbaşa bağlantı olacaq. Bu zaman 20-yə yaxın ölkədə yaşayan soydaşlarımızın onlayn konfransa qoşulması nəzərdə tutulub.

Belə mühüm sərgidə iştirak iştirakçılara bir sıra üstünlüklər də verir.

Öncə də qeyd etdiyimiz kimi bu sərgi Xəzəryanı və Qafqaz regionlarında keçirilən ən iri telekommunikasiya sərgisidir. Sərgi məhsul və xidmətləri sahənin mütəxəssislərinə, həmçinin geniş ziyarətçi kütləsinə vasitəsiz çatdırmaq imkanı verir. Bundan başqa sərgi potensial sifarişçi və tərəfdaşlar ilə görüşüb işgüzar görüşlər keçirtmək, İKT sahəsinin professionallarının bazarda yeni məhsul və xidmətlər haqqında dolğun məlumat almaq, işgüzar forum, ixtisaslaşmış tədbirlər və seminarlar vasitəsi ilə beynəlxalq və yerli mütəxəssislər arasında fikir, təcrübə və texnologiyalar mübadiləsinə zəmin yaratmaq, sərginin zəngin iş və sosial proqramında iştirak edərək bundan faydalanmağa şərait yaradır.

Dekabrda keçiriləcək sərgidə telekommunikasiya və şəbəkələr, informasiya texnologiyaları və ofis texnologiyaları, kabel və simsiz rabitə, peyk rabitəsi və texnologiyaları, televiziya və radioyayım avadanlıqları və texnologiyaları, bank texnologiyaları və xidmətləri, təhlükəsizlik sistemləri, genişzolaqlı rabitə və texnologiyalar, proqram təchizatı və avtomatlaşdırma sistemləri, e-hökumət və e-təhsil haqqında məhsullar təqdim ediləcək.

Vasif CƏFƏROV

Ekspress.-2013.- 21 noyabr.- S.9.