Cümhuriyyət tələbələri
III fəsil. Tale sorağında
Azərbaycan Xalq Cümhuriyyəti
varlığının 18 ayı ərzində min bir çətinlik
və təhdidlərlə üzləşsə də, Vətənin
və millətin gələcəyi naminə 100 gənci xaricə
oxumağa göndərmişdi.
Tanınmış
yazıçı-tədqiqatçı Teyyub Qurban
"Cümhuriyyət tələbələri" adlı
miqyaslı və sanballı araşdırmasında arxiv sənədləri
əsasında onlar barəsində bilmədiyimiz məlumatları
gün işığına çıxarmış, bununla
yetərlənməyərək və Azərbaycanı
qarış-qarış gəzərək xaricdə təhsil
aldıqdan sonra artıq müstəqil olmayan vətənə
qayıdan tələblərin izinə düşmüş,
onları arayıb axtarmış və talelərinə
güzgü tutmuşdur.
"Cümhuriyyət tələbələri"nin ilk iki fəsli bir müddət əvvəl "Ekspress" və digər qəzetlərdə çap olunub.
Basqala gedən yolda
Çağdaş əsrimizin ilk ilində əmək fəaliyyətimin yeni meydanı açıldı. 1932-ci il aprelin 27-də Azərbaycan Xalq Komissarları Sovetinin qərarı ilə yaradılmış indiki Təhsil Muzeyinə şöbə müdiri vəzifəsinə işə qəbul olundum.
Muzeyin direktoru Əlimirzə Əhmədov mənə hər cür şərait yaratdı ki, Azərbaycan Cümhuriyyəti dövründə təhsil sahəsində islahatları, xüsusilə ali təhsil məsələlərini dərindən araşdıra bilim. Bu sahədə baş məsləhətçilərim də elə muzeyin təcrübəli əməkdaşları oldular.
İllərdən bəri muzey fondunu qoruyub saxlayan Aliyə xanım Abasova İsmayıllı rayonuna səfərim ərəfəsində mənə cild səhifəsində "Azərbaycan Respublikası Təhsil muzeyinə ən ülvi arzularla, müəllifdən" yazılmış 231 səhifəlik bir kitab təqdim etdi və dedi: "Bu kitabı oxu, sonra Basqala ayaq bas".
Elə də etdim.
2002-ci ildə Bakıda "Adiloğlu" nəşriyyatı tərəfindən nəşr olunmuş "Basqal əcdadlarımızın əks-sədasıdır" kitabının müəllifi Miryavər Hüseynovdur. O, 1932-ci il fevralın 5-də İsmayıllı rayonunun Basqal kəndində anadan olmuşdur. 1961-ci ildə M.F.Axundov adlına Dillər İnstitutunu fərqlənmə diplomu ilə bitirmiş, uzun zaman Basqal kənd orta məktəbində rus dili və ədəbiyyatından dərs demişdir.
Doğulduğu elin yorulmaz tədqiqatçısı olan Miryavər Hüseynov və onun kitabı barədə "Ön söz"də oxuyuruq: "Lap qədim zamanlardan əli qələm tutanlar onları əhatə edən təbiətin və cəmiyyətin təsvirini, təhlilini verməyə çalışıblar. İndi bunların çoxu nadir tarixi mənbələr kimi qiymətləndirilir. Mübaliğəsiz desək, Basqal özü bütövlükdə xalqımızın bənzərsiz mədəniyyət abidəsidir. Yerləşdiyi coğrafi mövqe, keçdiyi keşməkeşli tarix Basqalı əsrlərin şahidi edib. Miryavər müəllimin kitabının uğurlu çıxmasının ilk səbəbini də müraciət olunan mövzunun tarixi baxımdan zənginliyində axtarmaq lazımdır. Tarixilik baxımından həqiqətən əcdadlarımızın əks-sədası Basqalda yaşayır. Əslində müəllifin toxunduğu məsələlər sirdən soraqlanan, sehrdən yozulan, sənəddən yazılan bir tarixin maraqlı səhifələri olduğundan bu qədər şirin və cazibədardır.
Cəmil Həsənli
tarix elmləri
doktoru, professor, millət vəkili".
Kitabı vərəqləyirəm.
Görəsən, "Basqal"
sözünün mənası nədir? Sualıma
katiabda bu cavabı tapıram: "Xalq arasında, eləcə
də qədim dövr tarixçilərimiz, toponimika ilə məşğul
olan alimlərimizlə apardığımız fərdi
söhbətlər, fikir mübadiləsi göstərir ki,
"Basqal" toponiminin yaranması ilə əlaqədar
müxtəlif fikirlər mövcuddur. 1962-ci ildə
böyük alimimiz Ziya Bünyadov və sənətşünaslıq
doktoru Qəzənfər Əlizadə bir neçə həftə
Basqalda həm dincəlir, həm də Xankənd qalası ətrafında
tədqiqat işi aparırdılar. Xankənd
Basqalın iki kilometrliyindədir. Rəhmətlik
Ziya müəllim Basqalı bərk xoşlamışdı.
O hesab edirdi ki, "Basqal" təmiz türk
sözüdür. Bir neçə məna yozumu
var - qala bas, qala qur, yarat, ucalt (bas qala, bas qal). Birinci və axırıncı mənaları
sözün kökü üçün daha
inandırıcıdır. Xüsusilə
buradakı "Bas" və "Qal" feilləri dilimizin
lüğət tərkibinin bünövrə
daşlarındandır".
"Basqal əcdadlarımızın
əks-sədasıdır" - etnoqrafik əsər canlı
muzey eksponatları kimi nəzərimdə canlanır. Sorağına düşdüyüm Cümhuriyyət
tələbəsinin dünyaya göz açdığı əfsanəvi
Azərbaycan kəndi orta əsrlərdə Şirvanın
böyük toxuculuq və sənətkarlıq mərkəzlərindən
biri imiş. Hələ 1862-ci ildə Azərbaycan
ilk dəfə Londonda keçirilən Ümumdünya sərgisində
iştirak etmişdi. Həmin sərgidə
basqallı toxucu Nəsir Abduləziz oğlu nümayiş
etdirdiyi nəfis kəlağayı və zərif danovuz
parçaya görə gümüş medal və xüsusi
diplomla mükafatlandırılmışdı.
Basqalda hələ
XI-XII əsrlərdə ruhani məktəbləri mövcud
idi. XIX əsrdə Basqal mədrəsəsini bitirən
onlarca gənc Nəcəfi-Əşrəfdə uğurla ali dini təhsil almışdı. Basqal uzun müddət Şamaxı qəzasına
daxil olmuşdur. Şamaxı IX-X əsrlərdən
başlayaraq Şərqin ən böyük ticarət və sənətkarlıq
mərkəzlərindən biri olmaqla, maarif, mədəniyyət,
elm korifeyləri, böyük alimlər, şairlər, siyasi
xadimlər məskəni kimi tanınmışdır. Şamaxıda Azərbaycanın müxtəlif yerlərindən
olan tacirlərlə yanaşı, İran, Hindistan, Rusiya,
Gürcüstan, Qərbi Avropa ölkələrindən gələn
tacirlərlə də rastlaşmaq olurdu. Şirvanda
hazırlanan alətlər, mis qablar, ipək və xalılar
çox məşhur idi. Bu cür əlaqələr
Şamaxının cəmi 32 kilometrliyindəki Basqalda sənətkarlığın
inkişafına və əhalinin ticarət işlərinə
fəal qoşulmasına səbəb olurdu. XX əsrin əvvəllərində Basqal taciri Məşədi
Məmmədtağı Londona səfərlərinin birində
kəlağayı və danovuz toxunan dəzgahların
quruluşunu öyrənmiş və Basqaldakı dəzgahları
da bunlara uyğunlaşdırmışdı.
Həmin vaxta qədər
toxucu yalnız əli ilə işləyirdisə, yeni dəzgahlarda
ayaqlar da iştirak edirdi, nəticədə istehsal üç
dəfə artırdı.
Basqalın qədim
tikililəri, daş döşənmiş küçələri,
bulaqları, yaşıl meşələri, bol meyvəli
bağları kino sənətkarlarının diqqətini
özünə cəlb edib. Xüsusilə
rəhmətlik Tofiq Tağızadə bu ulu yaşayış
məskəninin vurğunu idi. 1958-ci ilin may ayında
"Uzaq sahillərdə" filminin çəkiliş qrupu
tanınmış aktyorlarla Basqala gəlmişdi. Tofiq Tağızadə çayın cənub sahilində
çəkiliş aparmağı qərara almışdı.
Basqalın ümumi fonunda çəkiləcək
epizod İtaliya partizanlarının fəaliyyət göstərdiyi
qəsəbəni xatırlatmalı idi.
Xalq artisti Ələsgər Ələkbərov,
Anjelika rolunu oynayan leninqradlı gənc aktrisa, ata və
oğul Boqolyubovlar, Nodar Şaşıqoğlu, Karranti rolunun
ifaçısı və bir çox başqa artistlərdən
ibarçət olan qrup yerli əhalinin böyük maracına
səbəb olmuşdu.Çəkiliş üçün
bütün texniki vasitələr hazır idi.
Nəhayət, kitabda Basqalı
şöhrətləndirən adamlar haqqında qısa məlumat
və foto verilmişdir: Azərbaycanın Əməkdar Elm
Xadimi, Azərbaycan Elmlər Akademiyasının müxbir
üzvü, fizika-riyaziyyat elmləri doktoru Maqsud Cavadov, Azərbaycanın
xalq yazıçısı Əbülhəsən Ələkbərzadə
, Azərbaycan Respublikasının Əməkdar müəllimi
Rəfi Əliyev, Türkmənistan Respublikasının Əməkdar
müəllimi Hilal Ələsgərov, polis polkovniki
İbrahim Bağırov, tanınmış neftçi- mühəndis
Səmayə Hüseynova, mahir təyyarəçi Salah Ələkbərzadə
və başqaları.
Təəssüf ki,
mənim sorağına düşdüyüm Basqallı
Əlibəy onların arasında yoxdur.
2005-ci il avqustun 1-də səhər
ezamiyyət vərəqəsini və müvafiq arxiv sənədlərini,
bir də çalışdığım Təhsil Muzeyinin
direktoru Lalə xanım Bayramovanın İsmayıllı Rayon
Təhsil Şöbəsinin müdiri Rasim Orucova
ünvanla-dığı rəsmi məktubu qovluğa qoydum,
çantamı götürüb Bakıxanov qəsəbəsindən
birbaşa avtovağzala aparan 9 nömrəli avtobusu gözlədim.
Yarım saatdan sonra bu avtobusdan düşüb,
İsmayıllı avtobusuna bilet aldım. Bakıdan
ayrıldım, yol boyu olub-keçmişlər qəlbimdən
boylandı.
Cümhuriyyət tələbəsinin
haqqında düşünərkən öz tələbəlik
çağlarım da yada düşdü?
İsmayıllı rayon təhsil
şöbəsinin müdiri Rasim Orucov Azərbaycan
Cümhuriyyəti tərəfindən Avropa ölkələrinə
ali təhsil almağa göndərilmiş
100 nəfərdən birisinin İsmayıllının Basqal kəndindən
olduğuna dair arxiv sənədləri ilə tanış
olandan sonra şöbənin bütün əməkdaşlarını
kabinetində topladı. Qonağı təqdim edəndən
sonra onlara bildirdi ki, Təhsil muzeyinin kollektivi çox xeyirxah
bir iş görür: "Burada 1919-cu ildə Azərbaycan
Demokratik Respublikası tərəfindən xarici ölkələrə
ali təhsil almağa göndərilmiş
gənclərimizin barəsində məlumatlar
toplanılır. Muzeyin ali təhsil
şöbəsinin müdiri qonağımız Teyyub Qurbandan
bu haqda danışmağı və suallarnıza cavab verməyi
xahiş edirəm".
Çıxışımın
sonunda 1919-cu ildə dövlət vəsaiti ilə İstambul
Hərbi-Tibbi Akademiyasına daxil olmuş Əlibəy Xələfbəy
oğlu Məmmədovun arxiv sənədləri ilə təhsil
işçilərini tanış etdim. Qəribə suallar da verildi.
Məsələn,
soruşuldu ki, 1919-cu ildə Demokratik Respublikanın
ayaqları möhkəm yer tutmadığı bir zamanda Avropa
ölkələrinə oxumağa göndərilən tələbələrin
təhsilinə 4 milyon manat pul ayırmağa əsas
vardımı?
Mən dərhal cavab verdim: "Siz
təhsil işçilərisiniz, bilməlisiniz ki, təhsil qədər
millətimizin üzünü ağ edən bir amil,
düşmənlərimizə qalib gələn bir mənəvi
silah yoxdur".
Ertəsi günü
səhərdən axşamadək günümü Basqalda
keçirdim. Yolumu vaxtilə Əlibəy
Xələfovun oxuduğu Basqal orta məktəbindən
başladım.
Məktəbin
direktoru Ağacəfər Qafarov məni səmimiyyətlə
qarşıladı. Muzey guşəsindəki materiallarla
tanış oldum. Aydın
oldu ki, Cümhuriyyət tələbəsinin mədrəsədən
sonra təhsilini davam etdirdiyi bu məktəb imiş.
Məktəbin təməl
daşı 1887-ci il avqustun 25-də ( 2017-ci
ildə 130 yaşı tamam olacaqdır - T.Q.) qoyulmuşdur. Məktəbin
təntənəli açılışında
çıxış edən, gələcəyin böyük
maarif xadimi olacaq 24 yaşlı Rəşid bəy Əfəndiyev
demişdi: "Əziz atalar və babalar! Sizin
pulunuzla açılan bu məktəb
uşaqlarınızın burada aldığı elm, bilik, əməksevərlik
və düzgünlüyü heç vaxt, heç kəs
onlardan ala bilməz".
Məktəbin muzey
guşəsində məktəbin məzunları olmuş
adlı-sanlı insanların fotoları və barəsində
qısaca məlumat vardı. Məktəb
Qarabağ uğrunda döyüşlərdə şəhid
olmuş Rəmzi Novruzovun adını daşıyır.
Postament üzərində milli qəhrəmanın
büstü ucalır.
Mənə elə gəlir ki,
Basqalın şəhid oğlu bir vaxtlar Cümhuriyyət tələbəsi
olmuş həmkədlisinin içdliyi anda sadiq
qalmışdır: "AZƏRBAYCAN
CÜMHURİYYƏTİNİN SƏADƏTİ
NAMİNƏ CAN-BAŞLA QULLUQ EDƏCƏK, ONUN
ÜÇÜN LAZIM GƏLƏRSƏ HƏYATIMI BELƏ
ƏSİRGƏMƏYƏCƏYƏM".
Günorta məktəbin
direktoru Ağacəfər müıəllimlə söhbətimizi
kabinetində çay süfrəsi arxasında davam etdirdik.
Azərbaycan Respublikası Dövlət Tarixi
Arxivində saxlanılan bir sənədin surətini ona
göstərdim. Burada deyilir ki, Məmmədov
Əlibəy Xələfbəy oğlu 1894-cü ildə
Şamaxı qəzasının Basqal kəndində
doğulmuşdur. Atası Xələfbəy
Mahmudbəy oğlu, anası Nisbət xanım Ağabəy
qızıdır.
Görəsən
Basqalda onları tanıyan bir ixtiyar, bir ağbirçək
varmı?
100 Cümhuriyyət tələbəsi
(göndərildikləri
ölkələr)
Bakı
1. Axundov Əjdərbəy İsgəndərbəy
oğlu - Fransa
2. Aslanov Teymurbəy Zəkəriyyəbəy
oğlu - Fransa
3. Cabbarov Ələkbər Kərbəlayi
Məmmədəli oğlu - Fransa
4. Cəfərov Əliyusif Məşədi
Abutalıb oğlu - Türkiyə
5. Dadaşov Ağaəbdülhüseyn
Ələsgər oğlu - İngiltərə
6. Əmircanov Əliyarbəy -
Rusiya
7. Əşrəfov İsrafil
İsmayıl oğlu - Fransa
8. Həsənov
Əlimuxtar Yaqub oğlu - Türkiyə
9. Kazımov Cəfər Kərbəlayi
Ələsgər oğlu - Almaniya
10. Mirqasımov Zeynalabdin Mirələsgər
oğlu - Fransa
11. Mustafayev Ağacəfər Kərbəlayi
Əbdülyəhya oğlu - Almaniya
12. Rəhimov Cəbrayıl Məmmədrza
oğlu - Fransa
13. Rzayev İskəndər Cabbarxan
oğlu - Fransa
14. Səlimov Hüseynqulu Yusif Kərbalay
oğlu - Rusiya
15. Yüzbaşinski İsmayıl
Qafur oğlu - Rusiya
16. Mustafayev Ağahəsən Manaf
oğlu - Almaniya
17.Dagirov Zaurbəy
Yusifbəy oğlu - Fransa
18. Əliyev Zeynalabdinbəy
Hacı Ağabəy oğlu - İtaliya
19. Məmmədov Həmid Məmməd
oğlu - Almaniya
20. Vəliyev İsgəndər
Mahmud oğlu - İtaliya
Bakı kəndləri
21. Məmməd Hənəfi
Zeynallı (Mərdəkan) - Türkiyə
22. Pirverdiyev Hənifə Hacı
Mahmud oğlu (Sabunçu) - Almaniya
23. Sadıqov Mirsadıq Kərbəlayi
Seyid Kamil oğlu (Maştağa) - Almaniya
24. Quliyev Mirzə Hüseyn Kərbəlayi
Hənifə oğlu (Bülbülə) - Almaniya
25. Kərimov Əli Məşədi
Xasbulad oğlu (Balaxanı) - Türkiyə
26. Ağayev BalağaMəmmədhənifə
oğlu (Fatmayı) - Fransa
Gəncə
27. Abdullayev Ağali Məşədi
Rəsul oğlu - İtaliya
28. Ağasıbəyov Yusif
Süleymanbəy oğlu - Almaniya
29. Bağırlı Abdulla
Sadıq oğlu - Kiyev
30. Bosnalızadə Məmmədrəşid
Mustafa oğlu - Fransa
31. Hacızadə Mirzə Məşədi
Yusif oğlu - Almaniya
32. Rəhimzadə Abdulla Məmməd
oğlu - Almaniya
33. Əbürrəhmanov Ağacəfər
Məşədi Səftər oğlu - Almaniya
34. Məmmədov Zal Məşədi
Cavad oğlu - Almaniya
35. Nağıyev Hüseyn Hacı
Musa oğlu - İtaliya
Şuşa
36. Cavanşir Əbdülhəmid
Həmid oğlu - Fransa
37. Əliyev Ələkbər Qəhrəman
oğlu - Almaniya
38. Əliyev Əşrəf
Ağali oğlu - Almaniya
39. Əmirov Umbay - Odessa
40. Hacıyev Bayram İbrahim
oğlu - Fransa
41. Hacıyev Məmmədbəy Kərimbəy
oğlu - Almaniya
42. Xaspoladov Xaspoladbəy
İsmayıl oğlu - Almaniya
43. Hacıyev Xasbulat İsmayıl
oğlu - Rusiya
44. Muradov Abbas Həmid oğlu -
Fransa
45. Musayev Cəmil İbrahim
oğlu - Almaniya
46. Muradov Məmmədbəy Fərhad
oğlu - Fransa
47. Münsüzadə Hilal Mirzəhüseyn
oğlu - Almaniya
48. Nərimanbəyov Yaqubbəy
Əmirbəy oğlu - Fransa
49. Salahov Yusif Məşədi
Hüseyn oğlu - Almaniya
50. Səfərov
Məhiş Məşədi Hacı oğlu - Almaniya
51. Vəzirov Aslanbəy Zeynalabdin
oğlu - Fransa
52. Yusifzadə Ağalı Cəlal
oğlu - Fransa
53. Zeynalov Behbudəli Məşədi
Həmid oğlu - Almaniya
54. Qədimov Lətif Şirin
oğlu - Almaniya
Şamaxı
55. Axundov İsmayıl
Əbdülxalıq oğlu - Almaniya
56. Əliyev Abbasmirzə Əhməd
oğlu - Almaniya
57. İskəndərov Ağalar Məşədi
Abbasqulu oğlu - Almaniya
58. Seyidəliyev Mirməmmədrza
Mir Abutalıb oğlu - Almaniya
59. Məmmədov Ağababa Kərbəlayi
Ələsgər oğlu - Xarkov
60. Xudaverdiyev Əlibala Hacı
Murtuza oğlu - Almaniya
Salyan
61. Hüseynov Əlihüseyn
Ağahüseyn oğlu - Almaniya
62. Hüseynbəyov Zenyalabdinbəy
Adilbəy oğlu - Fransa
63. Hüseynzadə Bəhrambəy
İsmayılbəy oğlu - Almaniya
Lənkəran
64. Rzayev Nüsrət Rza oğlu -
Almaniya
65. Səidzadə Mirismayıl
Hacı Seyid Əhməd oğlu - Almaniya
Quba
66. Hacızadə Səməndər
Axund Zəki oğlu - Almaniya
67. Məmmədov Hüseynbala Cəfərqulu
oğlu - İtaliya
Xaçmaz
68. Həsənov Rzaqulu
İsmayıl oğlu - Almaniya
İsmayıllı
69. Məmmədov Əlibəy Xəlilbəy
oğlu - Türkiyə
Şəki
70. Nəbiyev Mahmud - Rusiya
Ağdam
71. Əliyev Firudin Əzim oğlu
- Almaniya
Tərtər
72. Zeynalov Behbudəli Məşədi
Həmid oğlu - Almaniya
Füzuli
73. Əlimuradbəyov
Cümşüdbəy Əlimurad oğlu - Fransa
Şəmkir
74. Qaracəmilli Məcidbəy
Qasımbəy oğlu - Rusiya
Oğuz
75. Tahirzadə Abdulla Mahmud oğlu
- Türkiyə
Ucar
76. Sədi Hacı Həsən
oğlu - Türkiyə
Qazax
77. Hüseyn Qasım Mustafa oğlu
Şıxıyev - Almaniya
78. Mustafayev Mustafa Molla Hacı Rəhim
oğlu - Fransa
Zəngəzur
79. Sultanov Baxışəlibəy
Rüstəmbəy oğlu - Almaniya
80. Şahsuvarov Mürsəl
Ədilxan oğlu - Almaniya
81. Şahsuvarov Surxay Əzim
oğlu - Almaniya
İrəvan
82. Ağabababəyov-Muğanlinski
Əsildarbəy Abbasəlibəy oğlu - Almaniya
83. Ağabababəyov-Muğanlinski
Adilbəy Abbasəlibəy oğlu - Almaniya
84. Əfəndiyev Məmmədəmin
- Almaniya
85. Rəcəbov Əhməd Məşədi
Cabbar oğlu - Almaniya
86. Rizayev Tağı Kərbəlayi
Əsgər oğlu - Fransa
Tiflis
87. Atamalıbəyov Abbasbəy
Seyfullabəy oğlu - Fransa
88. Dursunzadə Məmməd Zəki
- Türkiyə
89. Məmmədov Qəhrəman
İsrafil oğlu - Almaniya
90. Muxarski Süleyman Bəkir
oğlu - Fransa
91. Ağarəhimov Məhəmməd
Paşasadıq oğlu - Almaniya
92. Topçubaşov Rəşidbəy
Əlimərdanbəy oğlu - Almaniya
93. Vəkilov Mustafa Məmmədağa
oğlu - Fransa
94. Hüseynzadə Salman Hüseyn
oğlu - Almaniya
Dağıstan
95. Abdinov Bəhram Əlövsət
oğlu - Almaniya
96. Əfəndiyev Abdulla Molla
İbrahim oğlu - Almaniya
97. Xrimanov Zəkəriyyə
Əbdülrəşid oğlu - Almaniya
98. Teymurxanov Muradbəy Zabir
oğlu - Almaniya
99. Şahnəzərov Əhməd
Hacı oğlu - Fransa
Daşkənd
100. Umudov Mirzə Mənsur Hakim
oğlu - Fransa
Cümhuriyyət tələbələrinin
andı
"Qadir Allah və öz
vicdanım qarşısında söz verir və and içirəm
ki, Azərbaycana sədaqətimi müqəddəs və
sarsılmaz tutacaq, bundan sonra ondan başqa vətən
tanımayacaq, Azərbaycan vətəndaşlığının
bütün vəzifələrini dönmədən yerinə
yetirəcək və Azərbaycan Cümhuriyyətinin səadəti
naminə can-başla qulluq edəcək, onun üçün
nə gücümü, nə əmlakımı, nə də,
lazım gələrsə, həyatımı belə əsirgəməyəcəm.
Qoy bu andı yerinə yetirməkdə Allah mənə
yar olsun".
Teyyub QURBAN
Ekspress.-2014.- 19-21 aprel.-S.14-15.