"Bu mükafat ilk növbədə Azərbaycanın uğurudur"

"World Music Awards"a layiq görülən Emin təəssüratlarını media ilə bölüşdü

Bəstəkar-müğənni Emin Ağalarov "World Music Awards" mükafatı alması münasibətilə dünən mətbuat konfransı keçirib.

APA-nın məlumatına görə, müğənni media nümayəndələrinin suallarına cavab verərkən bildirib ki, mükafat Azərbaycan musiqisinin uğurudur: "Bu, əslində, hamımızın mükafatıdır. Mükafatı qazanmaq mənim üçün gözlənilməz oldu. Çünki məni həmin konsertə qonaq kimi çağırmışdılar. Sadəcə, mahnı oxumalı idim. Bu mükafat ilk növbədə Azərbaycanın, daha sonra Rusiyanın uğurudur. Konsertdə mahnıları canlı ifa etdiyim üçün çox həyəcanlı idim. Mükafatı xalq artisti Müslüm Maqomayevə həsr edirəm".

Xatırladaq ki, E.Ağalarov "World Music Awards" mükafatına mayın 27-də layiq görülüb. Monakoda baş tutan gecədə dünyanın məşhur ulduzları Beyons, Meray Keri, Mayli Sayrus, Pamela Anderson və başqaları iştirak edib.

Bunu Emin təəssüratlarını dilə gətirərkən də xatırladıb: ""World Music Awards"da dünyaca məşhur müğənnilər iştirak etdilər. Onlarla birlikdə səhnə almaq özü böyük işdir. Qalib olduğuma görə ilk növbədə Azərbaycana və mənə səs verən insanlara təşəkkürümü bildirirəm. Eləcə də Rusiyada məşhur olduğum üçün onların da mənə dəstəyi böyük oldu".

Jurnalistlərin təbriklərini qəbul edən müğənni onu təbrik edən ilk insanın rusiyalı müğənni Qriqori Lepsin olduğunu deyib.

Həmçinin, Rusiya və Azərbaycandan olan pərəstişkarları arasında olan mübahisədən danışaraq pərəstişkarlarının onu bölüşmək istəmədiyini deyib.

Emin Röyanın da nominatlar arasında olduğunu və Rusiyada yetərincə pərəstikarının olduğunu vurğulayıb ("ANS-Press").

O, övladları barədə də maraqlı açıqlama verib, əkiz oğlanları ilə həftəsonu istirahətindən danışıb.

Bakıda klip çəkdirmək fikrinin olub-olmadığını cavablandıran Emin burada ancaq əkizləri ilə vaxt keçirməyə imkanının olduğunu qeyd edib: "Oğlanlarımla vaxt keçirməyi çox sevirəm. Bir-iki gün vaxtım olur, onda da ancaq Əli və Mikayılla dincəlirəm. Övladlarımı klipimə çəksəm, özüm artıq ikinci plana keçəcəm. Bilirəm ki, onlar sizi daha çox maraqlandırır. Ona görə də ikinci plana düşmək istəmirəm".

Emin Əli və Mikayılın oxumağa həvəslərinin çox olduğunu da vurğulayıb.

Ekspress.-2014.- 3 iyun.- S.23.