Hər bir uşağın
ailəyə ehtiyacı var...
Qaçqın
və məcburi köçkünlərin, əhalinin sosial cəhətdən
qayğıya ehtiyacı olan təbəqələrinin problemlərinin
işıqlandırılması
"Ana, bu bacı kimdi? Təzə
bacıdı, o da bizimlə yaşayacaq?... Məni görərkən
İlqarənin verdiyi ilk sualı bu oldu. Bacı və
qardaşları ilə təəccüblü, eyni zamanda
sevinc dolu baxışlarla evdəki tanımadıqları
qonağı süzən İlqarə kiçik bir "kənd"də
yaşayır. Bu "kənd"də İlqarə kimi
çox uşaqlar var. Doğma ailə mühitində
yaşayan bu uşaqlar əslində, bir-birlərinə yad
insanlardır. Lakin bu "kənd"də
doğmalaşıb, bir ailə olmağı bacarıblar. Bu
"kənd" "SOS Uşaq Kəndi"dir...
Əvvəlcə bildirək ki, "SOS Uşaq Kəndi", "SOS Kinderdorf İnternational" təşkilatının ölkəmizdəki nümayəndəliyidir. "SOS Kinderdorf İnternational" bütün dünyada valideyn himayəsindən, valideyn qayğısından məhrum olan uşaqları irqindən, milliyyətindən və dinindən asılı olmayaraq daimi yaşayış yeri ilə təmin edən və onları müstəqil həyata hazırlayan bir təşkilatdır. Hazırda "SOS Kinderdorf İnternatioanl" təşkilatının nümayəndəlikləri dünyanın 132 ölkəsində 1680-dən çox SOS Layihəsi (Uşaq Kəndləri və digər əlaqəli layihələr: Baxçalar, Gənclik Evləri, Məktəblər, Tibb Mərkəzləri, Sosial Mərkəzlər və s.) üzrə fəaliyyət göstərir.
Əsas məqsəd uşaqları ailə mühitində saxlamaqdır...
Azərbaycanda
bu təşkilatın nümayəndəliyi 1999-cu ildə
yaradılıb, 2000-ci ildən fəaliyyət göstərir.
Hazırda təşkilatın ölkəmiz üzrə
Bakı və Gəncə filialları var. Bakı filialı Xətai
rayonunda yerləşdiyindən rəsmi adı "SOS Uşaq
Kəndləri" - Azərbaycan Assosiasiyasının Xətai
filialı kimi tanınır. Filialın direktoru Rəqib
Dadaşovun sözlərinə görə, "SOS Uşaq Kəndləri"nin
əsas məqsədi uşaqları ailə mühitində
saxlayıb, tərbiyə etməkdir. "Kənd"də 14
ailə evinin hər birində 1 tərbiyəçi ana və
4-7 uşaq var. Burada eyni zamanda "xalalar" da var ki,
onların vəzifəsi isə "analara" kömək
etmək, "ana" olmadığı vaxtlarda uşaqlara
baxmaqdır. Çünki anaların həftədə 1 dəfə
istirahət hüququ var və ana olmayan vaxtlarda xalalar
anaları əvəzləyir: "Biz tərbiyəçi
anaları seçəndə onların ailəli
olmamalarına üstünlük veririk. Çünki belə
olduqda, ana özünə övlad, uşaq isə özünə
ana tapır. Anaları seçmək üçün ilk
olaraq elan veririk. Seçim zamanı isə ananın
savadından və digər keyfiyyətlərindən da
çox onun analıq hissinə, psixoloji durumuna
üstünlük veririk. Müraciət edən
qadınları birbaşa "ana" heç vaxt təyin
etmirik. Onları öncə treninqlərə göndəririk,
praktiki olaraq "kənd"də yaşayırlar, bir
neçə ay uşaqlara köməkçi kimi xidmət
edirlər. Ondan sonra isə özünü doğruldan
"anaları" işə götürürük.
Anaların yaşı isə 25 yaşdan 45 yaşa qədər
müəyyənləşib".
Müsahibim deyir ki, "kənd"də ümumi yeməkxana, camaşırxana olmadığından, uşaqların yeməklərinin bişirilməsi, paltarlarının yuyulması, evin təmizlənməsi "anaların" vəzifələri sayılır. Bundan əlavə, hər uşaq üçün aylıq büdcə ayrılır ki, bu vəsaitdən istifadə edərək ana uşaqlara günlük cib xərcliyi verməli, məktəb xərclərini ödəməli, paltar almalı və digər xərcləri ödəməlidir. Uşaqların aylıq büdcəsi isə yaşa görə dəyişir. Belə ki, məbləğ bir uşaq üçün 180 manatdan 210 manata qədər yüksəlir. Həmin məbləğ ananın adına açılmış hesaba köçürülür və hər ayın sonunda "ana" mühasibatlığa həmin vəsaitin hara xərclənməsi barədə hesabat verir. Hesabat verərkən isə kassa çeki və digər sənədlər tələb olunur ki, bu da vəsaitin şəffaf xərclənməsi üçün nəzərdə tutulub.
R.Dadaşovun sözlərinə görə, burada uşaqların tərbiyəsi 3 mərhələdə həyata keçirilir. İlk mərhələ üzrə 15-16 yaşınadək uşaqlar "kənd"dəki ailədə qalırlar. Sonra isə 4 il müddətində "Gənclər evi"ndə yaşayırlar. Bura yataqxana tipli evlərdir və burada gənclərə məsləhətçilər nəzarət edirlər. "Gənclər evi" Nizami (qızlar üçün) və Sabunçu (oğlanlar üçün) rayonunda yerləşir.
Bundan
əlavə, "Gənclər evi"ndən
çıxdıqdan sonra yaşayış yeri olmayan, işləməyən,
maddi vəziyyəti zəif olan evsiz gənclərin kirayə
pulu, yemək və ya təhsil xərcləri ödənilir
ki, bu da onların yarımmüstəqil həyatları
adlanır. Həmin məbləğ onların adına
açılan hesaba köçürülür.
Uşaqların
seçiminə gəlincə, R.Dadaşov deyir ki, "kənd"ə
valideynlərini itirmiş, valideyn qayğısından məhrum
olan, valideynləri bilinməyən, hər iki valideyni valideynlik
hüququndan məhrum olan uşaqlar, valideynləri xəstə
olan uşaqlar, valideynləri həbs olunmuş uşaqlar Rayon
İcra Hakimiyyətinin rəsmi məktubu əsasında
qəbul edilir: "Biz burada uşaqların psixi vəziyyətinə
və yoluxucu xəstəliklərin olub-olmamasına fikir
veririk. Həmin uşaqları özümüzün
poliklinikamızda müayinədən keçiririk. Həkim-psixoloqumuz
onlarla söhbət edir. Daim həkim nəzarəti tələb
olunan uşaqları isə "kənd"ə qəbul
etmirik. Belə uşaqlar üçün xüsusi uşaq evləri
var. Onlar orada həm müalicə olunur, həm də tərbiyə
olunurlar".
"Kənd"ə 3 yaşdan 10 yaşınadək, bəzi hallarda isə 2 yaşından da uşaqlar qəbul edilir. Lakin 10 yaşdan yuxarı uşaqlar isə çətin uyğunlaşdığından "kənd"ə qəbul edilmirlər.
Müsahibimizin dediyinə görə, hazırda "Gənclər evi" də daxil olmaqla 103 uşaq və gənc var.
R.Dadaşov
sponsorlarının köməyini minnətdarlıqla qeyd edir.
Bildirir ki,
sponsorlar daha çox ərzaqla kömək edirlər. "Kənd"in öz
büdcəsi bu tələbatı ödəyə bildiyi
üçün arzu olunur ki, təşkilatlar öz köməklərini
uşaqların təhsilinə və işinə yönəltsinlər:
"Əsas problemimiz uşaqların tam müstəqil həyata
qədəm qoyması ilə bağlıdır. Çox istərdik
ki, onlar "kənd"i və "Gənclər evi"ni tərk edəndən sonra iş və
yaşayış yeri ilə təmin olunsunlar. Bizə
kömək edən bir təşkilat 5 yetirməmizi işə
götürüb. Biz onlara görə
artıq narahat deyilik. Amma buranı tərk edəndən
sonra narahat ola biləcəyimiz yetirmələrimiz
də çoxdur".
"Uşaqlara o qədər
öyrəşmişik
ki..."
"Kənd"in
pedaqoqu, təhsil layihəsi üzrə koordinatoru Almaz Məmmədova
isə bizi ailələri gəzdirərək bələdçilik
edir. Onun sözlərinə görə, hər
həftə bir neçə ailəyə baş çəkib
uşaqların təhsilləri ilə maraqlanır, qiymətlərinə
fikir verir. Bələdçimizlə
öncə Müşqinaz Tapdıqovanın ailə evinə
üz tutduq. Müşginaz ana 15 ilə
yaxın ailəli olduğunu, lakin övladı
olmadığından həyat yoldaşından
ayrıldığını deyir. "Eşidəndə
ki, "kənd"ə tərbiyəçi ana tələb
olunur, fikirləşdim ki, uşaqlarla işləmək mənim
analıq arzumun qismən reallaşmasına kömək ola bilər. Bura
götürülmədən öncə kurs keçdim, sonra
tərbiyəçi ana kimi işə
götürüldüm. Uşağım
olmamasına rəğmən uşaqlarla işləmək mənim
üçün çətin olmadı. Burada
2000-ci ildən işləyirəm. O zaman mənim 40
yaşım var idi. İndi isə 53 yaşım var..."
Müsahibimiz deyir ki,
ona həvalə edilən ilk uşaq qrupu 8 nəfərdən
ibarət idi. Hazırkı qrupda isə 4 uşaq var.
Müşginaz ana ana olmaq hissindən məhrum olsa da, bu "kənd"də
o bu hissi yaşadığını dedi: "İlk dəfə
mənə uşaq verəndə uşaqlardan biri - 4
yaşlı Elçin ayaqlarımdan yapışdı və mənə
"ana" dedi... Gözlərim doldu və mən ilk dəfə
idi ki, analıq hissini həmin anda yaşadım..."
Müşginaz
ananın uşaqlarının ən balacası 7, ən
böyüyü isə 11 yaşındadır. Biz orada olanda Müşginaz ananın 4 uşağından
yalnız biri - Aqşin orada idi. Digər
uşaqlar isə məktəbdə olduğundan onları
görə bilmədik. Aqşin isə məktəbdə
ikinci növbədə oxuyur. Biz gələndən
heç səsi eşidilməyən, başı dərslərinə
qarışan Aqşinlə bir balaca söhbətləşdik.
9 yaşlı Aqşin 4-cü sinifdə oxuyur.
2011-ci ildən "kənd"də olan Aqşini bura
anası gətirib: "Atam rəhmətə gedib. Anam işləyirdi, evdə tək qalırdım.
Sonra bura gətirdi. Buradakı
ailəmi çox istəyirəm".
Bələdçimizlə
növbəti ailəyə - 46 yaşlı Diləfruz
Yüzbaşıyevanın ailəsinə gedirik. Diləfruz
ananın himayəsində 6 uşaq var. Onlardan ən
kiçiyinin 3 yaş yarım, ən böyüyünün
isə 10 yaşı var. Diləfruz ana bir ildir ki, "kənd"də
işləyir. Onun sözlərinə görə, nə
qalmağa yerə, nə də pula ehtiyacı var. Sadəcə,
uşaqları çox sevdiyindən və onun himayəsində
olan 6 uşağa bağlandığından "kənd"dən
ayrı yer barədə düşünmür. "Onlara
o qədər öyrəşmişəm ki, bir gün olmasam,
onlar üçün darıxıram. Yayda
uşaqların hamısını özümlə birgə
Balakən rayonuna aparmışdım. Uşaqlar
o qədər sevinmişdilər. Atam da uşaqlara
çox bağlanıb. "Kənd"ə
gələndən sonra hər dəfə zəng edib
uşaqlarla maraqlanır. Ailəcə
hamımız bu uşaqları öz doğmalarımız
hesab edirik".
Diləfruz ananın oğlu Arifin 9
yaşı var. İmkansızlıq səbəbindən bu
"kənd"də olduğunu deyir: "Anam işə
gedirdi, bizə baxa bilmirdi. Sentyabrın 3-dən
buradayam. Anam üçün hərdən
darıxıram. Əgər yaxşı
işi olsa, onunla getmək istəyərəm".
Yuxarıda
adıçəkilən İlqarənin isə 10 yaşı
var. Bura gələndə 6 yaşında idi. Anası və atası həbsxanada olduğundan nənəsi
onu və daha sonra həbsxanada doğulan digər bacısı
balaca Leylanı da bura gətirir. İndi
Leylanın 3 yaşı var. Söhbət əsnasında onu da
öyrəndik ki, uşaqların anası həbsxanadan
çıxıb, lakin ona uşaqların geri verilməsi
indiki halda mümkün deyil.
9 yaşlı Pənah
da qardaşı ilə birgə Diləfruz ananın ailəsində
qalır. Digər uşaqlardan cəldliyi və
hazırcavablığı ilə seçilirdi. Qardaşı Kənanın isə 7 yaşı var.
Ataları rəhmətə gedən qardaşların
anaları yoluxucu xəstəlikdən əziyyət çəkdiyinə
görə uşaqlar burada böyüyürlər. Analarının yoluxucu xəstə olmasına
görə uşaqlara anaları ilə yaxın təmasına
icazə verilmir. Pənah bura təzə gələndə
7 yaşında idi. Həmin vaxtlar anası
üçün darıxdığını deyən Pənah
indi onun üçün darıxmadığını və
hazırkı ailəsindən məmnun
qaldığını bildirir.
Ümumiyyətlə,
onu qeyd edim ki, getdiyimiz ailələrdə həqiqi ailə
mühiti hiss olunurdu. Uşaqlar tərbiyəçi
analara "ana" deyərək müraciət edirlər.
Hər ev isə öz səliqəsi, təmizliyi
ilə seçilirdi. Hər ev qonaq
otağından, 3-4 uşaq otağından və ananın ayrıca
otağından, vanna otağı və mətbəxtdən
ibarət idi. Bu evlərdə uşaqların
dincəlməsi, dərsləri ilə məşğul
olması üçün hər cür şərait
vardı.
Bioloji analar bizə problemlər yaradırlar...
Orada olduğumuz vaxt ərzində
"kənd"in psixoloqu Əsli Zeynalabdinovanın da
vaxtından bir neçə dəqiqə ala bildik. Psixoloq burada uşaqlar və analarla fərdi
konsultasiyaların, inkişafetdirici tədbirlərin, oyun
terapiyalarının və digər yarışların
keçirdiyini deyir. Uşaqlarla tez-tez söhbətlər
etdiyini deyən psixoloq bildirir ki, uşaqların daha çox
problemi məktəbdə baş verən incikliklərlə
bağlı olur: "Misal üçün, hansısa uşaq
dərsə getmək istəmir. Onunla söhbət
edərkən biz əsas problemi aşkar edib məktəbə
getmək istəməməsinin səbəbini öyrənirik.
Məlum olur ki, ya müəllim
uşağın üstünə acıqlanıb, ya da
yoldaşları ilə bağlı incikliklər
yaşanıb. Biz o problemin aradan
qaldırılmasında uşaqlarla söhbət edərək
yoluna qoyuruq".
"Kənd"dəki
ailələrlə bağlı problemlərə gəlincə,
psixoloq əvvəllər belə problemlərin olduğunu
deyir. "Ananın aldığı paltar
uşağın xoşuna gəlmirdi və belə problemlər
yaşanırdı. İndi isə belə
problemlər olmur. Daha çox bioloji
valideynlər problemlər yaradırlar. Belə
ki, uşağı bura gətirəndən sonra tez-tez gəlib
uşağı görmək istəyirlər. İcazə isə ayda bir dəfədir. Bu da nəticədə uşağın ailəyə
uyğunlaşmasında problemlər yaradır".
"Kənd"lə
bağlı işimi yekunlaşdırıb getməyə
hazırlaşırdım. "Kənd"in
həyətində məktəbə gedən Diləfruz
ananın uşaqları ilə rastlaşdım. Məni görən kimi uşaqlar bir-bir boynuma
sarılaraq, görüşüb sağollaşdılar.
Çox qəribə hiss idi. 1 saat öncə
yad olan bu uşaqlar necə də
doğmalaşmışdılar. Anladım ki, bu kəndin
əsas özəlliyi burada yad insan anlayışının
olmamasında idi...
AYTƏN
Ekspress.-2014.- 18-21 yanvar.- S.11.