Bakıda kitab bayramı

V Bakı Beynəlxalq Kitab Sərgi-Yarmarkası açıldı

Dünən Mədəniyyət və Turizm Nazirliyinin təşkilatçılığı ilə reallaşan V Bakı Beynəlxalq Kitab Sərgi-Yarmarkasının açılışı olub.

Bakı İdman Sarayında keçirilən sərgi-yarmarkada, 150-dən çox yerli, 40 xarici olmaqla, ümumilikdə 40 ölkəni təmsil edən kitabxana, çap və poliqrafiya müəssisələri, o cümlədən, çap işi ilə məşğul olan qurumların təmsilçiləri iştirak edir.

Açılışda çıxış edən mədəniyyət və turizm naziri Əbülfəs Qarayev Bakıda keçirilən builki kitab sərgi-yarmarkasına böyük marağın olduğunu bildirib. Son vaxtlar Azərbaycanda mütəmadi olaraq beynəlxalq tədbirlərin keçirilməsini yüksək qiymətləndirən nazir belə tədbirlərin bütün dünyada rəğbətlə qarşılandığını qeyd edib.

Poliqrafiya müəssisələrinin öz rəngarəng, fərqli məzmunlu məhsulları ilə təmsil olunmasını diqqətə çatdıran nazir üç gün davam edəcək sərgi çərçivəsində bir sıra kitab təqdimatlarının, "dəyirmi masalar"ın, müzakirələrin aparılacağını bildirib.

Nazir son illər yeni, latın qrafikalı nəşrlər hesabına kitabxanaların zənginləşdirilməsi istiqamətində xeyli iş görüldüyünü diqqətə çatdırıb. Vurğulayıb ki, bu işlər Prezident İlham Əliyevin "Azərbaycan dilində latın qrafikası ilə kütləvi nəşrlərin həyata keçirilməsi haqqında" 2004-cü il 12 yanvar tarixli Sərəncamına və dünya ədəbiyyatının Azərbaycan dilində çap edilməsi haqqında verdiyi müvafiq Sərəncama uyğun olaraq reallaşdırılır.

Azərbaycanda poliqrafiya sənətinin inkişafından söz açan Ə. Qarayev bildirib ki, ölkəmiz hər il beynəlxalq kitab sərgi-yarmarkalarında təmsil olunur və kitablarımız beynəlxalq sərgilərdə ən yüksək mükafatlara layiq görülür. Beynəlxalq kitab sərgilərinə təqdim olunan məhsullar arasında həm dövlət, həm özəl nəşriyyatların, həm də Heydər Əliyev Fondunun nəşrləri yer alır. Heydər Əliyev Fondu tərəfindən bir sıra kitabların çap edilməsi xüsusi əhəmiyyət daşıyır.

Azərbaycanda son vaxtlar vahid elektron kitabxana sistemi adlandıran ALISA-nın tətbiqinə başlanılacağını qeyd edən nazir, sərgi çərçivəsində bu sistemin təqdimatının olacağını da diqqətə çatdırıb.

Əbülfəs Qarayev nəşriyyat sahəsinin hər zaman dövlətin diqqət mərkəzində olduğunu vurğulayıb. Bildirib ki, əsas məqsəd kitab nəşri sahəsində ən müasir texnologiyaların ölkəmizə gətirilməsinə nail olmaq, kitabın təbliği və yayılması, dərsliklərin, lüğətlərin, tərcümə və elmi ədəbiyyatların işıq üzü görməsinə yönəlmiş qərar və göstərişlərin vaxtında icrasının təmini, gənc nəslin kitaba maraq və sevgisini daha da artırmaq, Azərbaycan oxucusunu dünyanın aparıcı nəşriyyatlarının məhsulları ilə tanış etməkdir.

Sərgi ilə bağlı təəssüratlarını bölüşən Baş nazirin müavini, Xalq yazıçısı Elçin Əfəndiyev bütün oxucuları kitab bayramı münasibətilə təbrik edib. Bildirib ki, Azərbaycanda belə sərgi-yarmarkaların keçirilməsi artıq bir ənənə halını alıb. Kitabın bəşəri dəyər olduğunu qeyd edən Elçin Əfəndiyev belə sərginin ölkəmizdə keçirilməsini yüksək qiymətləndirib. Vurğulayıb ki, Prezident İlham Əliyevin diqqət və qayğısı sayəsində beynəlxalq kitab sərgiləri, eyni zamanda, digər beynəlxalq tədbirlər ölkəmizdə yüksək səviyyədə keçirilir.

Gələcəkdə bu yöndə daha da böyük işlər görüləcəyinə əminliyini ifadə edən E.Əfəndiyev bildirib ki, iştirakçılar builki yarmarkada da sərgilənən kitablar vasitəsilə Azərbaycan xalqının tarixi, mədəniyyəti, ədəbiyyatı və bugünkü inkişaf səviyyəsi haqqında dolğun məlumat əldə edə biləcəklər.

Sonra qonaqlar sərgi ilə yaxından tanış olublar.

V Bakı Beynəlxalq Kitab Sərgi-Yarmarkasında ilk dəfə Respublika Kitabxana Kollektoru də iştirak edib.

Maraqlı təqdimatla çıxış edən kollektor kitabsevərlərə Mədəniyyət və Turizm Nazirliyinin "Avtomat kitab köşkü" aparatını təqdim edib.

Respublika Kitabxana Kollektorunun direktoru Ələddin Əsədov "Avtomat kitab kökü" haqqında ziyarətçilərə məlumat verib: "Bu tipli aparatlar ilk dəfə olaraq müxtəlif içkilərin satışı üçün nəzərdə tutulub. Müasir dövrdə kitabların bu üsulla satışı bir sıra ölkələrdə həyata keçirilir. Aparatın özəlliyi müştəri ilə birbaşa əlaqədə olub müvafiq məbləği ödədikdən sonra nəzərdə tutulan kitabı almağa imkan verir".

Sərgi-Yarmarkada "AybKitab" və "İlesamKitab" layihələrinin nəşrləri ilə təmsil olunan Azərbaycan Yazıçılar Birliyinin (AYB) kitab stendində Rəşad Məcid, Günel Eyvazlı, Həyat Şəmi, Tural Cəfərli və başqalarının imza günləri keçirilib. Son zamanlar kitabla bağlı keçirilən layihələrin artmasından məmnunluq duyduğunu deyən AYB-nin katibi Rəşad Məcid bu sərgidə gələcəkdə daha çox nəşriyyatların, kitab evlərinin təmsil olunacağına inandığını qeyd edib: "Kitaba diqqətin, marağın artması bu gün hamımızın arzusu, təmənnasıdır. Mədəniyət və Turizm Nazirliyinin ardıcıl olaraq, iki ildən bir keçirdiyi bu cür sərgi-yarmarkalarda yerli nəşriyyat, kitab evlərindən əlavə, xarici nəşriyyatlar da təmsil olunur, qonaq yazıçılar ölkəmizə təşrif buyurur, azərbaycanlı oxucularla görüşmək şansı qazanırlar. Tədbir daxilində keçirilən görüşlər, tanınmış və gənc yazarların imza günləri də xüsusi diqqətə layiqdir. İnanıram ki, bu, gələcəkdə daha da geniş auditoriyanı əhatə edəcək".

Sərgi-yarmarka çərçivəsində "TEAS Press" nəşriyyatının stendində AYB katibi, yazıçı Çingiz Abdullayevin oxucularla görüşü və imza günü keçirilib. Qəzetimizə açıqlamasında Çingiz Abdullayev oxucuların sərgiyə marağından çox məmnun olduğunu vurğulayıb: "Hələ sərginin təzə başlamasına baxmayaraq, buraya minlərlə oxucu gəlib. Mən sevinirəm ki, onların arasında gənclər böyük əksəriyyət təşkil edir. Bu da onların kitaba marağının, sevgisinin göstəricisidir. Bu, nə qədər çox olsa, bir o qədər yaxşıdır. Bu beşinci sərgi özündən əvvəlki sərgilərdən çox fərqlənir. Bu il bu sərgi-yarmarkada 40-dan çox ölkənin nəşriyyatları təmsil olunur. Bu il xaricdən daha çox qonaqlar, kitab evləri gəlib. Bu gün Milli Akademiyanın Kitabxanasındakı açılışda kitabxanaya Rusiyadan böyük bir dəstə kitab hədiyyə edildi. Biz çalışmalıyıq ki, gənc nəsil yalnız öz dilimizdə deyil, xarici dillərdə də kitab oxumağı bacarsın".

Millət vəkili Sona Əliyeva, Xalq şairi Sabir Rüstəmxanlı, Türkiyə səfirliyinin mədəniyyət müşaviri İrfan Çifçi, AYB-nin mətbuat katibi, şair Xəyal Rza, TÜRKSOY-un Azərbaycan nümayəndəsi Elçin Qafarlı, tərcüməçi Əyyub Qiyas, yazıçı Kənan Hacı, Azərbaycan Yaradcılıq Fondunun təmsilçisi, şair və ədəbiyyatşünas Qismət Rüstəmov, "Kaspi" nəşriyyatının təmsilçisi, şair Fərid Hüseyn, yazıçı Vüsal Nuru və başqaları da sərgi-yarmarka haqqında öz təəssüratlarını bölüşüblər.

Sərgi sentyabrın 30-dək davam edəcək.

Ekspress.-2017.-29 sentyabr.-S.13.