Puşkin-210

Şairin yubileyi

Bakıda Puşkinin doğum gününə həsr olunmuş mərasim keçirildi

Dekabrın 21-də M.F.Axundov adına Milli Kitabxanada Mədəniyyət və Turizm Nazirliyinin təşkilatçılığı ilə dahi rus şairi Aleksandr Sergeyeviç Puşkinin anadan olmasının 210 illiyinə həsr olunmuş tədbir keçirilib. Mərasimdə mədəniyyət və turizm nazirinin müavini Ədalət Vəliyev, Rusiyanın Azərbaycandakı səfiri Vladimir Doroxin də iştirak edib.

Tədbiri açan Azərbaycan Yazıçılar Birliyınin üzvü, əməkdar mədəniyyət işçisi Çingiz Əlioğlu şairin yaradıcılığından danışıb.

Sonra Ədalət Vəliyev çıxış edərək bildirib ki, Azarbaycan xalqı hər zaman Ruşkinin xatirəsini uca tutub: "Onun əsərləri bu gün də Azərbaycanda sevilir, oxunur".

Rusiyanın Azərbaycandakı səfiri Vladimir Doroxin Azərbaycanda Puşkinin xatirəsinin dövlət səviyyəsində yad edilməsindən məmnunluq duyduğunu qeyd edib. "Mən Azərbaycana gələndən bir müddət sonra dahi şairin yaradıcılığının ən gözəl nümunələrini dinləmişdik. Həmin mərasimdən sonra da Azərbaycan xalqı onun yaradıcılığına dəfələrlə müraciət edib. Bu gün də belə önəmli günlərdən biridir. Biz hamımız bir daha Puşkini anmağa gəlmişik. Bu çox yüksək səviyyəli mərasimdir", -deyə səfir bildirib.

Onun sözlərinə görə, Azərbaycan xalqının Puşkini hər zaman yad etməsi çox sevindirici haldır: "Azərbaycan hər zaman Puşkinin xatirəsini yad edib. Sizin xalq nəinki Puşkinin yaradıcılığına, ümumiyyətlə, Rusiya poeziyasına yaxşı bəllidir. Bildiyimə görə, Azərbaycanın yeni nəsli Puşkin yaradıcılığına qayıdır və bununla bağlı yeni tərcümələr də olunub. Bunu yalnız alqışlamaq olar. Rusiya mədəniyyəti Azərbaycan mədəniyyətinin bir hissəsinə çevrilib. Bundan isə hər iki tərəf faydalanır. Heç kim təsəvvür edə bilməz ki, mənim üçün iş gününü Puşkinlə başlamaq necə gözəl bir hisdir. Azərbaycan xalqına öz təşəkkürümü bildirmək istəyirəm ki, hər zaman Puşkinin yaradıcılığına müraciət edirlər, onun xatirəsini hər zaman əziz tuturlar. Bu xalq hər zaman ona böyük qiymət verib. Mən çox sevinirəm ki, Puşkin yaradıcılığı bu gün Azərbaycan mədəniyyətində öz yerini tutub". Mərasimdə, həmçinin, ədibin həyat və yaradıcılığını əks etdirən kitablar nümayiş olunub, tanınmış qələm adamlarının, ədəbiyyatsevərlərin, qiraətçilərin iştiraki ilə bədii kompozisiya təşkil edilib.

AYXAN

Ekspress.- 2009.- 22 dekabr.- S. 10.