Bakı və Dəməşq əməkdaşlığı sıxlaşdırır

Azərbaycanla Suriya arasında 5 hökumətlərarası sənəd imzalandı

Dünən Suriya Ərəb Respublikasının prezidenti Bəşər əl-Əsədin Azərbaycana ikigünlük rəsmi səfəri başlayıb. Suriya prezidenti və xanımı Əsma əl-Əsəd prezident İlham Əliyev və xanımı Mehriban Əliyeva tərəfindən rəsmi mərasimlə qarşılanıb.

Daha sonra prezidentlər təkbətək geniş tərkibdə görüş keçiriblər. Dövlət başçıları ölkələrimiz arasında əlaqələrin inkişafından məmnunluqlarını ifadə ediblər. Prezidentlər iki dövlət arasında əlaqələrin bundan sonra da genişlənəcəyinə ümidvar olduqlarını bildirib, bu səfərin Azərbaycan-Suriya ikitərəfli münasibətlərinin yeni mərhələyə yüksəlməsinə təkan verəcəyini vurğulayıblar.

"Bu, sizin Azərbaycana ilk rəsmi səfərinizdir və mən əminəm ki, səfər çox uğurlu keçəcək. Səfər çərçivəsində imzalanacaq sənədlər və əldə ediləcək nailiyyətlər iki ölkə arasında münasibətlərin yeni səviyyəyə qalxmasına xidmət göstərəcək",- deyə İ.Əliyev vurğulayıb.

Görüşdə ikitərəfli münasibətlərlə yanaşı, regional və beynəlxalq məsələlər barədə də fikir mübadiləsi aparılıb.

Azərbaycan prezidenti bəyan edib ki, Ermənistan rəsmilərinin xalqların öz müqəddaratını təyinetmə prinsipi barədə bəyanatları Dağlıq Qarabağ münaqişəsinə şamil edilə bilməz.

Suriya prezidenti isə bildirib ki, iki ölkə arasında əməkdaşlıq üçün qapılar açıqdır: "Ölkələrimiz dünya səviyyəsində strateji mövqelərə malikdir. Həm bölgədə olan ölkələrlə, həm qonşuluğumuzda olan ölkələrlə dövlətlərimizin dost və xoş münasibəti var. Əminəm ki, bu münasibətlərin ümumən bizim vəziyyətimizə çox müsbət təsiri var".

Dünən prezidentlərin iştirakı ilə iki ölkə arasında sənədlərin imzalanması mərasimi olub. Beş sənəd imzalanıb:

- Azərbaycan Respublikası Hökuməti və Suriya Ərəb Respublikası Hökuməti arasında diplomatik, xidməti və ya xüsusi pasportlara malik olan şəxslərin viza tələblərindən azad olunması haqqında Saziş;

- Azərbaycan Hökuməti və Suriya Hökuməti arasında mədəniyyət sahəsində əməkdaşlıq haqqında Saziş;

- Azərbaycan Hökuməti və Suriya Hökuməti arasında iqtisadi, elmi, texniki və mədəni əməkdaşlıq üzrə birgə komissiyanın yaradılması haqqında Anlaşma Memorandumu;

- Azərbaycan Hökuməti və Suriya Hökuməti arasında sənaye və energetika sahəsində əməkdaşlıq haqqında Saziş;

- Azərbaycan Hökuməti və Suriya Hökuməti arasında sərmayələrin təşviqi və qarşılıqlı qorunması haqqında Saziş.

***

Ərazisi 185,2 min kvadrat kilometr olan Suriyanın büdcəsi əsasən neftdən gələn gəlirlər hesabına formalaşır. Ölkədəki sənaye komplekslərinin 75 faizi dövlətə məxsusdur. Ölkə əhalisinin 20 faizi işsizdir, Suriyanın 6 milyard dollar xarici borcu var.

Xatırladaq ki, Azərbaycan və Suriya arasında ikitərəfli münasibətlər 28 mart 1992-ci ildə qurulub. Suriyanın Azərbaycandakı səfirliyi 16 may 2008-ci ildən fəaliyyət göstərir. Ölkələr BMT çərçivəsində əməkdaşlıq edir. 2006-cı il noyabrın 27-də BMT-nin İnsan Hüquqları Şurasının II sessiyasında Azərbaycan Suriya tərəfindən təklif edilmiş "Suriyanın işğal edilmiş Holan yüksəklikləri. İnsan hüquqları sahəsində vəziyyət" adlı qətnaməni dəstəkləyib.

İki ölkə arasında iqtisadi əlaqələr o qədər də fəal deyil. 2008-ci il ərzində Suriyadan Azərbaycana idxal təxminən $2 milyon, bu ölkəyə ixrac isə cəmi $134 min təşkil edib.

A.Xəlil

Ekspress.- 2009.- 9 iyul.- S. 3.