Enerjili yaxınlaşma

Rusiya prezidentinin birgünlük səfəri zamanı önəmli sənədlərə imza atıldı

Rusiya prezidenti Dmitri Medvedyev iyunun 29-da Bakıya birgünlük işgüzar səfərə gəlib. Xatırladaq ki, bu, RF prezidentinin Azərbaycana ikinci səfəridir.

"Zuğulba" iqamətgahında qonağın Azərbaycan prezidenti İlham Əliyevlə təkbətək görüşü keçirilib. AzərTAc-ın xəbərinə görə, görüşdə iki ölkə arasında əlaqələrin bütün sahələrdə uğurla inkişaf etdiyi bildirilib, bu əlaqələrin gələcəkdə də inkişaf edəcəyinə əminlik ifadə olunub. Tərəflər ikitərəfli, regional və beynəlxalq məsələlərə dair fikir mübadiləsi aparıblar.

Daha sonra hər iki tərəfin nümayəndə heyətlərinin iştirakı ilə geniştərkibli görüş keçirilib. Medvedyev qeyd edib ki, səfəri qısamüddətli olsa da, danışıqların gündəliyi dolğundur və bu, Rusiya-Azərbaycan münasibətlərinin strateji xarakterini əks etdirir: "Bu, dostluq və yaxşı qonşuluq əlaqələridir. Biz bu münasibətlərin bundan sonra da inkişaf etməsi üçün əlimizdən gələni etməyə hazırıq".

İki ölkə arasında birgə bəyanatlar və bir neçə sənəd imzalanıb. Prezidentlərin Xəzər dənizi üzrə birgə bəyanatında sahilyanı ölkələrin Xəzər dənizinin hüquqi statusu haqqında hazırlanan Konvensiya üzrə mövqelərinin yaxınlaşması qeyd edilir: Hazırlanan Konvensiyada bir sıra əsas aspektlər üzrə qarşılıqlı anlayış artır. Bu, "Xəzər dənizinin akvatoriyasının delimitasiyası, cənub hissəsində Xəzərin dibinin bölünməsi, təhlükəsizlik məsələləri, ehtiyatlardan istifadə, tranzit, biosferin qorunması və s. məsələlərə aiddir".

Azərbaycan və Rusiya prezidentləri Xəzəryanı əməkdaşlığın çoxtərəfli iqtisadi sahəsinə və təhlükəsizlik sferasında əməkdaşlığa böyük önəm verir, "müasir çağırış və təhlükələrlə mübarizədə əməkdaşlığın vacibliyini vurğulayırlar". Xəzəryanı dövlətlərin təhlükəsizlik məsələləri üzrə ekspertlərinin yaxın vaxtlarda Bakıda keçirilməsi nəzərdə tutulan görüşü bu məsələyə həsr ediləcək.

Prezidentlər dövlət sərhədinin delimitasiyası və Samur çayının su resurslarının Azərbaycanla Rusiya arasında bölünməsinin əsas prinsipləri haqqında da birgə bəyanat imzalayıblar.

Bundan başqa, dövlət başçılarının iştirakı ilə ARDNŞ-lə "Qazprom" arasında Azərbaycan təbii qazının alışı və satışı haqqında müqavilənin əsas şərtləri imzalanıb. İki ölkənin xarici işlər nazirləri isə Rusiyanın Azərbaycanda, Azərbaycanın isə Rusiyada diplomatik nümayəndəliklərinin yerləşdirilməsi və xidmət etməsi barədə hökumətlərarası sazişin hazırlanması haqqında birgə bəyanat imzalayıblar. Bundan başqa, Azərbaycan və Kabarda-Balkar hökumətləri arasında ticari-iqtisadi, elmi-texniki və mədəni əməkdaşlıq haqqında da saziş imzalanıb.

Sənədlər imzalanandan sonra Azərbaycan və Rusiya prezidentləri birgə mətbuat konfransı keçiriblər. İ.Əliyev iki ölkə arasında yüksək səviyyədə siyasi münasibətlərin, sıx əlaqələrin mövcud olduğunu bildirib. O əlavə edib ki, imzalanan sənədlər son illər ərzində görülən işlərin məntiqi nəticəsidir. Əliyev bu sənədlərin gələn il iki ölkə arasında mal dövriyyəsinin kəskin artacağına təkan verəcəyinə inamını ifadə edib. O, qeyd edib ki, ARDNŞ ilə "Qazprom" arasında yeni imzalanan sənəd münasibətlərdə yeni səhifə açır. Bu, hər iki ölkənin maraqlarını təmin etməklə yanaşı digər enerji sahələrində də əməkdaşlığa təkan verəcək.

Medvedyev Azərbaycan prezidenti ilə çox gözəl və səmərəli danışıqların aparıldığını deyib. Prezidentlərin tez-tez görüşməsini strateji əməkdaşlığın möhkəmləndirilməsi üçün əsaslı zəmin yaratdığını vurğulayan Medvedyev digər sahələrlə yanaşı qaz sahəsindəki əməkdaşlıqda yeni mərhələnin başlandığını qeyd edib. Rusiya prezidenti bu sahəyə dair imzalanan sənədin yaxşı başlanğıc olduğunu deyib.

Medvedyev sərhədlərin delimitasiyası məsələsində də kompromisin əldə olunduğunu və bu məsələnin tezliklə həll olunacağını söyləyib. O həmçinin bildirib ki, Rusiya Qarabağ nizamlanması çərçivəsində fəaliyyətin davam etdirilməsi üçün əlindən gələni edəcək. Sankt-Peterburqda Ermənistan və Azərbaycan prezidentləri arasında birbaşa danışıqlar tərəflərin irəliləmək əzmini nümayiş etdirib ki, bu da münaqişənin həll edilməsi üçün "şanslar olduğuna ümid verir",-deyə Rusiya prezidenti bildirib: "Danışıqların iştirakçıları müntəzəm olaraq mövqelərdəki ziddiyyətləri aradan qaldırmağa və irəliləməyə hazırdırlar" və münaqişə "çox yaxın gələcəkdə həll edilə bilər və Rusiya da bunun üçün əlindən gələni edəcək".

Prezident Əliyev bildirib ki, "Azərbaycan nizamlanmada irəliləməyə hazırdır". Serj Sərkisyanla Sankt-Peterburq görüşünü uğurlu adlandıran dövlət başçısı vurğulayıb: "İrəliyə doğru bir neçə addım atmağa nail olduq. Bu gün nizamlanmaya ümid bir neçə il əvvəl olduğundan daha çoxdur".

E. Mirzə

Ekspress.- 2009.- 30 iyun.- S. 2.