Humay Qədimovanın tarının sarı simi qırılıb

Hadisə Türkiyədə konsert zamanı olub

Türkiyənin meqa-starı Tarkanı, Rafet El Romanı, Sərdar Ortac və Alişanı müxtəlif konsertlərdə müşayiət edən, gənc olmasına baxmayaraq tarda ifası ilə çox ürəkləri fəth edən tarzən Humay Qədimova yeni bir uğura imza atdı.

İfaçı elə bu yaxınlarda rəhbərlik etdiyi "Humay" qızlar ansamblı ilə birgə Türkiyənin İstanbul şəhərində yaddaqalan konsert verib. Səfərdən çox xoş təəssüartlarla qayıdan tarzən Humay Qədimova uğurlu konsertlə bağlı fikirlərini bölüşüb: "Bu konsert layihəsinə ilk öncə öz vətənimiz - Azərbaycandan başladıq. Azərbaycan Dövlət Akademik Opera və Balet Teatrında konsert verdik. Zənnimcə, həmin çıxışımız yaddaqalan oldu. Sonra biz düşündük ki, bu cür konsert layihəsi ilə artıq Avropaya çıxmaq vaxtıdır və bu turumuzu Türkiyədən başladıq. Konsertimiz İstanbulda çox məşhur "Tim Moslak Show Center"də baş tutdu. Həmin məkanda bir neçə il əvvəl bizim xalq artistimiz, ifası ilə dünyaya səs salan Zeynəb Xanlarova konsert vermişdi, eyni zamanda həmin səhnədə Türkiyənin çoxsaylı müğənniləri konsertlər təşkil edirlər".

H.Qədimova bildirib ki, bu konsert üçün Bakıdan 22 nəfərlik heyət Türkiyəyə səfər edib: "Musiqi prodüserimiz Asif Kərimov da bizimlə birgə idi. Azərbaycanın milli musiqilərini, milli xalq mahnıları və rəqslərini, muğamlarını Türkiyədə ifa etdik və yüksək səviyyədə qarşılandıq. Konsertdə azərbaycanlı xanəndə Elnarə Abdullayeva və türkiyəli müğənni Kibariyə də səhnəyə çıxdı. Bizim müşayiətimiz altında onların ifaları səsləndi. Bu konsertlə bağlı Türkiyənin "Tatlısəs" televiziyasında verilişlərə dəvət edildim və qonaq oldum. Maraqlısı o idi ki, mən Bakıdakı konsertimdə çox həyəcanlı idim, yəqin ki, bu öz vətənimdə konsert verdiyimdən irəli gələn bir həyəcan idi. Türkiyədə isə heç bir həyəcanım yox idi, elə bilirdim ki, məşqə çıxıram".

İfaçı konsert zamanı qarşılaşdığı xoşagəlməz bir texniki problemi də peşəkarcasına yola verməyi bacarıb. Belə ki, elə konsertin ikinci nömrəsində Humay Qədimovanın tarının sarı siminin qırılması bütün ansamblı şoka salıb, amma gənc musiqiçi özünü itirməyib: "Sim qırılanda ansambl şoka düşdü. Bakı konsertindən fərqli olaraq Türkiyədəki konsertimizdə nə aparıcı qoyulmuşdu, nə də çoxsaylı müğənnilər yox idi. Fasilə söhbəti də olmadı. Saatyarımlıq konsert oldu, ancaq konsert boyu bir dəqiqə belə vaxtım olmadı ki, tarımın qırılan simini dəyişim. Bütün konsert boyu həmin qırılan simlə çaldım. Görüntülərdə də görəcəksiniz ki, bütün konsertdə sim sallana-sallana qalıb. Çox şükür ki, başqa bir problemlə qarşılaşmadan və bu çıxışımızı uğurla başa vurduq".

Həftə içi.- 2010.- 18 dekabr.- S.15.