Rubin Abdullin: "Dünya musiqisi Qara Qarayevsiz bütöv olmazdı"

Bakıda məşhur bəstəkar Qara Qarayevin xatirəsinə həsr olunmuş pianoçuların I beynəlxalq elmi-ifaçılıq müsabiqəsi və pianoçuların "Fortepiano Qara Qarayev yaradıcılığında" I beynəlxalq elmi-ifaçiliq konfransı öz işinə başlayıb. Pianoçuların I beynəlxalq elmi-ifaçılıq müsabiqəsində Rusiya, Gürcüstan, Türkiyə, Qırğızıstan, Küveyt, Tatarıstan, Özbəkistan, Türkmənistan kimi 10-a yaxın ölkədən olan gənc pianoçular öz istedadlarını nümayiş etdirəcək. İştirakçıları xalq artisti Fərhad Bədəlbəylinin rəhbərlik etdiyi 5 nəfərdən ibarət beynəlxalq tərkibli münsiflər heyəti qiymətləndirəcək. Müsabiqənin Üzeyir Hacibəyli adına Bakı Musiqi Akademiyasında gerçəkləşən açılışında Bakı Musiqi Akademiyasının rektoru Fərhad Bədəlbəyli, Moskva Konservatoriyasının rektoru Aleksandr Bonduryanski və bir çox tanınmış musiqiçilər iştirak edib. Adıçəkilən musiqiçilər dahi bəstəkar haqqında fikirlərini "ANS"lə bölüşüblər.

Fərhad Bədəlbəyli Qara Qarayevin həmişə Azərbaycan xalq musiqisindən, muğamlarımızdan ilhama gələrək yaratdığını deyir: "Leyli və Məcnun", "7 gözəl" simfonik poemaları bu silsilədəndir. Biz fəxr edirik ki, o, uzun illər Bakı Musiqi Akademiyasında bəstəkarlıq kafedrasının müdiri olub". Moskva Konservatoriyasının rektoru Aleksandr Bonduryanski Qara Qarayev haqqında nümunəvi, məşhur sovet bəstəkarı kimi, dünya musiqi mədəniyyətinə nadir töhfələr bəxş edən sənətkar kimi danışa biləcəyini bildirib: "Onun bütün əsərlərində hüdudsuz istedad özünü göstərir. İş ondadır ki, məşhur bəstəkar kimi Azərbaycan milli musiqisindən bəhrələnərək qoyduğu yaradıcı irsi onu böyük zirvəyə qaldırıb. Bununla bərabər, Qara Qarayev rus musiqisini də çox yaxşı bilirdi. Yəqin, bilirsiniz ki, o, Rusiyada təhsil alıb. Bu təhsil ocağı hər zaman öz tələbəsinin xatirəsini əziz tutur və təsadüfi deyil ki, Moskva Konservatoriyasının rektorluğu Qara Qarayev adına I beynəlxalq musiqi festivalı üçün Moskva Konservatoriyasının xüsusi mükafatını təsis edib". Kazan Konservatoriyasının rektoru Rubin Abdullin də dahi bəstəkar haqqında fikirlərini dilə gətirib: "Qara Qarayevi dünya musiqisinin rəssamı hesab etmək olar. O həm də filosof idi. Musiqinin fəlsəfəsini çox gözəl bilirdi. O özündən sonra silinməz iz qoyub. XX əsrin mədəniyyəti və qısa desək, dünya musiqisi Qara Qarayevsiz bütöv olmazdı".

Həftə içi.- 2010.- 10 dekabr.- S.7.