Unudulmuş Fatma Mehralıyeva

Onun lent yazıları niyə səsləndirilmir?

Son 30 ilə yaxındır səsi telekanallardan və radio dalğalarından gəlməsə də, hələ də qəlbimizdədir Fatma Mehralıyeva. Onun "Kəsmə şikəstəsi" qulaqlarımızdan getməyib, ürəyimizi parça-parça edir, bizi yandırır və yandıra-yandıra saflaşdırır.

Fatma xanım hələ sağlığında da təbliğatı xoşlamayıb. Səsinə, sənətinə, gözəl ifaçılıq tərzinə görə xalqımızın hörmətini, dərin məhəbbətini qazanıb. Bu gün aramızda olmasa da, xalqımızın qəlbində onun əziz xatirəsi daim yad edilir.

Yaxşı yadımdadır: həyatı dərk etdiyim, ağı-qaradan seçdiyim vaxtlarım idi. O dövrdə evimizdə qramafon və bir də "batareya" ilə işləyən radio vardı. Ona el arasında "pryomnik" deyirdilər. Babam Behbud kişi böyük sənətçilərimiz Cabbar Qaryağdıoğlu, Bülbül, Xan əmi, Seyid Şuşinski, Mütəllim Mütəllimovun səsi yazılmış valların arasında Fatma xanımın da valını qramafonda səsləndirərdi.

F.Mehralıyevanın səsi yanğılı idi, mahnıları da ürəkdən oxuyardı. Bəlkə də bu yanğı, bu sızıltı onun dərd-qəmi və bəlkə də neçə-neçə əsrlərdən bəri xalqımızın başına açılmış müsibətlər, ağrılar idi. Fatma xanımın səsi İlahi qüdrətdən yaranmışdı.

Onun ifa etdiyi mahnılar adamın ürəyinə yağ kimi yayılar, qəlbinə, ruhuna hopardı. Hətta ağlayan körpəni də kiridərdi. Böyük sənətkarların böyüklüyü ondadır ki, çox sadə, kövrək olur, ifa etdikləri muğam və mahnılara da möhürlərini vururlar. Məsələn, Yaqub Məmmədov "Heratı"ya, Rübabə Muradova "Qara gilə"yə, Şahmalı Kürdoğlu "Rast"a, Qədir Rüstəmov "Sona bülbüllər"ə möhürlərini vurduqları kimi, Fatma Mehralıyeva da "Kəsmə şikəstəsi" ilə yaddaşımızda qaldı.

Bu gün sənətçilər çoxdur. Bunların arasında özlərini "ulduz" adlandıranlar, hər gün telekanallarda özlərini reklam etdirənlər də var. Təbliğat kampaniyaları nə qədər güclü olsa da, özlərini xalqın qəlbinə sırısalar da, lakin xalq onları qəbul etmir. Xan Şuşinski, Mütəllim Mütəllimov, Səxavət Məmmədov, Fatma Mehralıyeva kimi sənətkarlara isə sənətkar adını xalq verib. Xalqın verdiyi ad isə əbədiyyət qazanır. Fəqət bizi ağrıdan odur ki Fatma Mehralıyeva kimi sənətkarlarımız bir sıra dairələrdə, nədənsə, unudulub. Təəssüflər olsun ki, o bir sənətkar kimi yad edilmir. İmzalar içində imzası görünmür. Artıq radio və telekanallardan da bayağı səslərə qulaq asmaqdan bezmişik. Yaxşı olar ki, axşamdan səhərə qədər bütün gün musiqi verən özəl telekanallar heç olmasa bir dəfə də Fatma xanımın ifasında "Kəsmə şikəstə"ni səsləndirsinlər.

Deyək ki, özəllər şəxsi kanallardır və bu onların şəxsi işidir. Lakin "İTV", "AzTV" isə həm xalqın, həm də dövlətindir. Həmin telekanallara da bizim rəğbətimiz var. Böyük sənətkarlarımız haqqında verilişlər verilir, ifaları səsləndirilir. Amma Fatma Mehralıyevanın ifasına rast gələ bilmirik. Əgər bu gün F.Mehralıyeva kimi sənətçilərimiz unudulursa, sabah digərləri də unudulacaq.

Qulağıma qeybdən bir səs gəldi - bu səs F.Mehralıyevanın "Kəsmə şikəstəsi" idi. Görünür, bu səs də Qarabağ kimi əsirlikdədir. Çox heyf ki bizlər Qarabağdan, Fatma xanımın "Kəsmə şikəstə"si isə qulaqlarımızdan uzaq düşüb.

Qələndər Xaçınçaylı

Həftə içi.- 2010.- 15 dekabr.- S.7.